11
Hougsu" nghoid yoomo ngoo gi Khristu da" khoo" shid: ri cang lo yhang: ti" nanu" we' nga" da" khoo" shid: ri cang nyid ge.
Nanu" gi khyoo: khaid gu: khang" moo" moo: ngoo ri boin: so" nyid wigi ngoo nanu" ri byid: too" bye: da" jhau" shed thui'- nanu" cang zei: lo nyid boem bye: yoomo ngoo nanu" ri cung' byid: nau. Nghoid loug we' yuggi yi dangain" bang: da" vhuloem gi Khristu nghoid nyid. Myi yi: yi da" vhuloem koem gi yuggi yi nghoid. Khristu da" vhuloem gi Mangsoo nghoid nyid da" khyoo: ngoo nanu" ri se' gyoo: nhang: nau. Yuggi yi kha: yug we' akyu" mho' nyid uri hougsu" anghoid lang" shava noku phung' moo Mangso mungdang: kho" nyid uri vhuloem moo: nghoeb, ci: nghoid ri Khristu da" myonhoo: phung" yoeb, ri phue: loo" nhang: zi nghoid. Myiyi: yi kha: yug nghoid loug we' akyu" mho' nyid uri hougsu" anghoid lang" shava phung: moo Mangso mungdang: tid nyid uri vhuloem ri anghoeb ci: loo: koid nghoid rigi yhoem: seing: phoo da" myonhoo: ri phue: loo" nhang: nyid ziyo' vhu" dung: dung: pyam da" myiyi: yo' dayhang: ti" nghoid da. Myiyi: yigi vhuloem ri anghoeb ci: wa nghoid rigi xam: ri we' pyoid pyam goo" baja" nghoid loug, we' xam: ko' pyam wa anghoid lang" gi vhudung: dung: pyam zigi myiyi: yi sho' ja: nghoid yoomo nya: vhuloem ri nghoeb ci: baja. Yuggi yi gi Mangso da" myonhoo: phung" yoeb, ri thu' loo nhang: mo, nghoid nyid boem yoomo vhuloem moo: nghoeb, ci: anoo"- myiyi: zoo: gi yuggi da" myonhoo: phung, yoeb ri thu' loo byid: nhang: nyid su nghoid. Khasu" wim ga: ri yuggi gi myiyi: mo phain" to" zi anghoid- nghoid loug myiyi: gi yuggi mo, phain" to" zi nghoid. Hau: yuggi gi myiyi: shid mo, phain" to" zi anghoid- myiyi: rigi yuggi shid re" phain" to" zi danghoid. 10 Hau: mougkhung: lagyoo: yi yoomo myiyi: zooyi gi vhuloem ri nghoeb ci: ca"- hougsu" koid da" khyoo: gi nyang: nya: da" yhoem: seing: pho da" vhoo: moo: nyid nyid ein: da" alhoo: again, ri toin" shid nyid zi nghoid. 11 Nghoid loug we' hau: Aseing khoug: moo: myiyi: yi gi yuggi yi moo: nghe: khau: nyid ziyo' dakhyoo" ti" yuggi yi nghoid loug we' myiyi: moo: danghe: khau: nyid. 12 Khasu" wim ga: ri myiyi: gi yuggi jhang mo phain" to" zi nghoid loug- yuggi gi myiyi: mo khu: lo zi nghoid. Hau: tho' moo: gootu:- jo, moo: jo, ri bue" loo nhang: su: gi Mangsoo nyang: nghoid bye:.
13 Myiyi: gi vhuloem ri anghoeb ci: loo: za: noku joyoo moo: akyu" mho' nyid rigi du la" ein: ziri: nanu" myid phyed yu ge. 14 Yuggi gi xam: sheing: to" ri nya: myonhoo: soem" joyoo nghoid ziri: xangsu: nyid yab, lo da" tarha" wigi: nanu" ri jhau" byid: nyid. 15 Nghoid loug we' myiyi: gi xam: sheing: to" nghoid rigi nya: da" young" lho, khyoo: nghoid nyid. Nya: da" xam: sheing: gi nya: vhuloem ri nghoeb, too" wa shid mo byid: to" zi nghoid. 16 Nghoid loug we' byu dayug yug he: khyoo: yo' sen: lhoo: wigi kyo, too" nau nghoid rigi ngoonu" moo: we' Mangso da" phung: moo we' noku coung" nghei phung, moo: houg: te" vhuloem ri nghoeb, da" thung" mo lid: wigi gootu: aboo loo" ein- ngoo hau" yug ri tid wa nghoid.
17 Nanu" da" noku coung" nghei da" zoebphoung: gi deingmain" ziyo' akyu" yoo" wa khyo" phoung, nyid zi anghoid loo: za: akyu" yoem" wa khyo" phoung, nyid boem yoomo vhoo: moo: tid to" da" khyoo: joem moo ngoo nanu" ri acung" byid: noug. 18 Xangshid" moo nanu" da" phung: khoug: moo: tu: lhoin" thougtheung da" zoebphoung: nghoid ziri: ngoo shoug" gyo. Hau: jang" moo: nyid mo, dayham" rigi: ngoo myid loem. 19 Houg: mo gam, thu' loo" mo, kha: phung: bang: gi jo shoid khyoo: yab, bang: nghoid ein: da" deingmain" khyoo: gi gyeung: gyeung: myang loo wa shid re" nanu" moo: kho' gam, gang: go" lo" zigi nyid gu, nghoid. 20 Nanu" dage" zoeb phoung: nyid shi" ri hau: Aseing da" myen" xoin: zoo: pue" shid re" phoung nyid boem zi anghoid. 21 Khasu" wim gari nanu" zo: nyid uri nyang: tu: nya: zoo: noem ri nyang: boug" zo: ago"- dayham" bang: gi zooyoid boem wigi houg, su" shoug, yed: zo yed koid nyid ago". 22 Zoo: wa shug wa shid re" nyang: tu: nya: yhoem: ayoo" goo" la" Hougsu" anghoid lang" gi Mangso da" phung ri aphoug" amyang:- juang" yi wigi ashoug" ajhen: bang: ri sho' thu nhang: goo" wa la" Ngoo nanu" ri he: khyoo: yo' sen: lho: wigi ce: noem tid wa ein: jho: nyid go" la" Ngoo nanu" ri coung" byid: goo" wa la" Gyeing" nyang: ngoo nanu" ri coung" byid: wa zi anghoid.
23 Khasu" wim ga: ri- akhid" ngoo nanu" ri byid: kaid da" jhoug" myeing" jhoug" thui: gi hau: Aseing jhang moo ngoo yo" kham: yu khyoo: nghoid. Hau: zigi gyivoo joem da" lo, moo: ab byid: pyam zi shoug" wa da" myen" ri Aseing Yesu gi zooyho ri yu lho: wigi 24 Jeju" bain coung" nghei lang" zooyho ri ajab, amoin" koid lho: he: zigi nanu" shid re" byid: pyam da" nga" gungdu: nghoid- ngoo ri daboin: nyid wa shid re" hid: su" koid ge ga: tid. 25 Houg: yo' dakhyoo" ti" myen" xoin: bain zoo: lang" goem ri we' yu wigi he: da" goem gi nga" suid" yo' zhoug to" da" Mangso dang: thang cab, seig nghoid- he: ziri: shug, khang" moo" nanu" ngoo ri daboin: nyid wa shid re" hidsu" koid nyid ge" ga: tid.
26 Nanu" gi he: zooyho ri zo: wigi: he: goem mo shug, khang" moo" hau: Aseing shid: kham da" khyoo: ri nyang: doem ju" re" da" bidnyid ju" sho sagsi kham shoug, nyid da" khyoo: nghoid. 27 Hougsu" nghoid yoomo hang" nghoid loug we' amoin: ayi" ziyo' Aseing zooyho ri zo wigi goem mo, shoug nghoid rigi hau: Aseing: da" gungdu: yo' suid" ri shoid vhang: da" yooboo yoo" bye:. 28 Houg: yoomo hang" nghoid loug we' nyang: tu: nya: da" gung ri xangshid" myid soin: kho' yu" lho: wigi hau: zooyho zo: lho: goem' ri shug, baja. 29 Ci: yoomo gari hau: zooyho ri zo: lho: hau: goem ri shoug, uri Hau: Aseing gungdu: da" dang: kang: ri ase' gyo: su: gi nyang: tu: nyang: ri dang: phyed zi shoug" wa khyo" zo: shoug, nyid zi danghoid. 30 Houg: yoomo nanu" moo: yoem: neung: lo" ziyo' noo phyoo" kyikhyeig shau" lho: shid: lo" zi we' myoo" sho' mo, bo abye: go". 31 Ngoonu" gi nyang: tu: nya: gungdu: ri xangshid"- myid phoid: sho: soin: kho' yu" boem nghoid rigi Mangso wigi: dang: phyed zi shoug" wa anghoid. 32 Nghoid sho loug we' ngoonu" gi Aseing da" lo, wigi: dang: phyed noo, kham zo: khyoo: gi mougmyid byu yi yo' dage" dang: phyed zi ashoug" wa shid mo nghoid nyid.
33 Houg: yoomo nga" mangnhung" yi we"- Aseing da" myen" xoin: zoo: phung' moo: bo loem" wa shid re" nanu" zeung: foem: nyid boem rigi nyang: cang nyang: lang" go" nyid ge. 34 Hougsu" Aseing da" zoo: shug phoung, bo loem" wa shid re" nanu" zeung: foem: nyid uri Mangso wigi: dang: phyed zi ashoug" baja"- byu dayug yug zooyoid nyid nghoid rigi nya: yhoem: moo: lo" zo: yu baja" gootu: ca" da" khyoo: joem rigi ngoo ju" rilang" tid kyo, shang: pyam wa nghoid.