7
1 Ngoo gi yoem: moo" bo thang da" Aseing jang" mo yoeb myang daja: ri myang bye:. Hau: yoeb myang moo khokham da" khoofoo: bain yham" yu thang: ri vu, fu" doem yug toid lo da" uri Aseing wigi jhenkhyeug dajoem ri phain" so: kaid ziri myang bye:.
2 Hau: yoeb myang mo jhenkhyeug joem gi houg: mung" mo mhain" nyoug pho nyoug joem dangain" ri zo: pyam lho: ngoo gi yoem: moo" bo thang ?Aseing we"- re" byumyu" yiri yooboo khyoid byid: we'? nyangnu" gi khasu" koid se' deung nyid loo: goo" wa lha". Nyangnu" gi atham: loo: nge lo" ziyo' yoem: gye" neing: mo, nghoid ago"? ein: tid kaid bye:.
3 Aseing doem tid zigi ?Nya: emyed ri doem thid lo nghoid rigi nang yoeb myang myang ziyo' dakhyoo" ti" abue" loo wa? ga: tid bye:.
4 Yoem: moo" bo thang da" Aseing mo yoeb myang gootu: daloem: doem myang nhang: zigi houg: jang" moo nyang: gi nya: da" byumyu" yiri myi: wigi yooboo dam byid: wa ga: soin' to" ziri myang. Houg: myi: gi nammugdara thoem" moo" ri nge" pyam lho: mougmyid khyoo: nge" ju" lo nyid bye:.
5 Houg: lang" ngoo gi ?Yoem: moo" bo thang da" Aseing we"- hau: zigi toem' pyam we' re" byumyu" yigi ashid: loo: khasu" yo" se' dei nyid boem loo: wa lha". Nyangnu" gi gye" nge lho: yoem: gye" neing: mo, nghoid nyid?
6 Houg: lang" Aseing gi nya: nheigloem: ri doem thid lho: ?He: zi we' abui" loo: wa? ga: tid.
7 Ngoo gi Aseing jang" mo yoeb myang gootu: daja: ri doem myang bye:. Houg: yoeb myang moo lake' tei" ri ci: lho: zhug to" da" xiyam yang: moo nyang: yab jo, ziri ngoo myang bye:. Nya: lo, khoug: moo lake' tei" ri ci: nyid da:.
8 Nyang: gi ngoo ri tid zigi ?Amo we" nang ce: noem myang? ga: myid: lang"
?Lake' tei" ri myang? ein: tid bye:.
Houg: lang" nyang: tid zigi ?Nga" byumyu" yigi he: xiyam yhang: ti" kam" la' akam" la' ein: ziri toin" shed wa shid re" houg: ziri ngoo ci: yhung: nyid zi nghoid. Nyangnu" ri yooboo dam kaid wa da" nga" nheigloem: ri ngoo thid wa zi nghoid.
9 Isag nya: myid: nya: zoo: yi da" noku joyoo joem gi phyo' shoin' pyam wa zi nghoid. Israela mung" mo gyeung" shang: da" joyoo gi byo, yoin" joyoo moo she: pyam too" shoug" wa. Khokham Yeroboam khoo" ri amyoug: thang nhang: wa? ga: tid.
10 Bethela voo mo khainjung Amazia gi Israela mung" mo khokham Yeroboam jhang khyoo: lu dang: kyo" kaid da:. Amo gi mung" byu yi phung: moo nang ri thougtheung wa khyoo: shoo: bye:. Nyang: tid nyid da" dang: gi mungdain: ri byo, yoin" loo" nhang: wa nghoid.
11 Nyang: gi hidsu" ga: tid yen" ?Yeroboam gi meing: zain: jang: moo shid: wa. Israela byumyu" yigi goo" mung" khyoo: pyoung" she: lo" zi shoug" wa? ga: tid.
12 Hau: thang: Amazia gi Amo ri ?Lapi: phoo we" gi bye: Yuda mung" khyoo: doem tau" lo" lho: houg: moo lo" khoo" we' houg: mo bang: gi nang ri khoo" phoug" shang" goo" baja".
13 He: Bethela mo khanham lapi: api: loo:. He: joyoo gi khokham pho noku da" joyoo. Byu damyu" goin" da" Noku Yhoem: Moo" nghoid? ga: tid.
14 Amo tid zigi ?Ngoo gi phoug" phyid" mo ngei yo' lapi: pi: zo: loo su: anghoid. Ngoo gi gougnyhoug myhu: zoo: su: yo' lafoem' khyam: ri coung: su: danghoid.
15 Nghoid loug we' Aseing gi ngoo ri yang zung" moo" mo shu" yu wigi nya: byumyu" Israela yi jhang khyoo: re" lho: lapi: re" pi: nhang: da:.
16 Houg: yoomo akhid" Aseing tid ziri ?Tam" gyoo: ge'. Nang gi ngoo ri lapi: pe: ziri theung: pyam wa shid re" Israela byumyu" yiri nheig yo: khyoo: ri to" pyam wa shid mo tid da:.
17 Houg: yoomo Amazia we" Aseing gi nang ri tid nyid da:. Re" yhoem: seing: myhi' gi voomoo" khoug: mo shava myhi' bue" loo" wa. Re" zoo: yi we' meing: zain: jang: moo said pyam zi shoug" wa. Re" mougmyid ri we' subi" byumyu" yiri kho' gam byid: pyam boem wa. Nanyang: we' tungbau mung" moo lo" shid: wa. Houg: lho: Israela byumyu" yi we' nyangnu" da" moug: mo zi goomung" khyoo: gyeing" nyang: pyoung" she: lo" zi shau" boem wa? ga: tid.