2
Moba
1 Aseing tid zigi ?Moba byumyu" yigi pug lho: pug lho: yooboo koid nyid shi" yoomo ngoo gi nyangnu" ri gyeing" gyeing" nyang: yooboo dam byid: wa. Nyangnu" gi Edom khokham da" shooyoug: ri myiyab bui" sho' nghe' lho: aphoug" akhyoid koid pyam abye: go".
2 Ngoo gi Moba mung" tho' moo myi: khyoo' byid: lho: Keriod da" gyikhoug: zung joem ri nghe' pyam byid: wa nghoid. Gyizoo: yigi nyho: lho: laboo" moid lang" Moba byu yigi gyi khaid thui: ri shau" gyo: lho: shid: lo" byug boem wa nghoid.
3 Ngoo gi Moba khokham yo' hau: mung" mo vhujhung: yi dangain" ri said pyam wa zi nghoid.
Yuda
4 Aseing gi ?Yuda byumyu" yi gi pug lho: pug lho: yooboo ri dakoid nyid shi" yoomo ngoo gi nyangnu" ri gyeing" gyeing" nyang: yooboo dam byid: wa. Nyangnu" gi ngoo jhoug" mho' nyid khyoo: ri aphoug" akhyoid koid pyam boem lho: ngoo pyeing: to" amyeing" dang: we' acang nghoid ago". Nyangnu" da" phoug" phyid" yi dei byid: lo da" yu join: yu phara" yigi nyangnu" ri khyoo: vhang: shu" vhang: loo" khari" bye:.
5 Houg: yoomo ngoo gi Yuda mung" moo myi: ri khyo kaid lho: Yerusalem mo gyikhoug: zung joem ri nghe' pyam wa? ga: tid.
6 Aseing tid zigi ?Israela bang: gi pug lho: pug lho: yooboo ri dakoid nyid boem shi" yoomo ngoo gi nyangnu" ri gyeung" gyeung" nyang: yooboo dam byid: wa. Nyangnu" gi jhen: ayo" xab da" deingmain" mo, yo' khyid: baid dazoem" phoug" lang" ayo" xab da" myung mo, ri join khyo" ung" zo: pyam boem.
7 Nyangnu" gi yoem: neing: mo, yo' ci: ayo" koid mo, ri nang: zeug pyam lho: sho" jhen: mo, ri khyoo: mo keung" khyo' pyam. Nya: phoo yo' nya: zoo: daphoo" thang: gi join myhi' dayug ri za: coem' zoem" goo" yoomo nga" gyeung" shang: myeing gi aved avhu: bue" lo" pyam bye:.
8 Nyangnu" gi sho" jhen: mo, jang" mo jhen: kham: khyo" yu to" da" byimi ri noku joyoo khang" moo" moo myhu" yhoeb ago". Nyangnu" ngei jhen: boo mo, jang" mo yu to" da" zabyid yhid: ri nyangnu" gi Noku Yhoem: Moo" khoug: moo zheung: shug boem.
9 Nghoid loug we' nga" byumyu" yi we" shamu gam yhi' myhang: lho: shookhi" gam ti" yoem: bo da" Amaleg byumyu" yiri ngoo gi jhoid phyo' sain" pyam zigi nanu" gang mo nghoid.
10 Ngoo gi nanu" ri Egutu mung" mo shu" thu lo lho: dain" pyoid yoo khyo" myid: xi: zain shu" loo bye:. Hougsu" wigi Amori mung" ri nanu" seing: wa shid re" ngoo byid: bye:.
11 Ngoo gi nanu" da" yug gi zoo: yi dayham" ri lapi: khyo" khyen: yu lho: nanu" da" zoolu: yi dayham" rigi Naziri byu yi bui" nhang: bye:. Israela byumyu" yi we" he: zigi deung anghoid goo" la" ngoo Aseing tid nyid.
12 Nghoid loug we' nanu" gi Naziri byu yiri zabyid yhid: shug nhang: lho: wigi Lapi: yiri we' nga" mungdang: atid wa shid re" toem' pyam ago".
13 Hougsu" nghoid yoomo akhid" ngoo gi nanu" ri myidjang moo du" khyoeb khyo' pyam lho: nanu" gi gug byeung" sho' tho' lo da" rheing" yo' dakhyoo" ti" noo kyeing" kyeing" nyid goo" wa nghoid.
14 Gye" yo" tang" mo, lang" gi ayo" phang: loid loo" goo" wa. Yoem: boo mo, we' nyangnu" da" yoem: goin byug goo" wa nghoid. Hau: lho: gyizoo: yi we' nyang: da" kangso' ri ayo" khyoid yu goo" wa.
15 Lo, lid: ci: mo, gi nyangnu" joyoo moo ayo" yab jo, loo: goo" wa. Gye" yo" tang" mo, we' ayo" phang: loid loo: goo" wa. Myang: ju: ju: mo, we' nyangnu" kangso' yo" phang: loid loo goo" wa anghoid.
16 Hau: bidnyid moo sarhi' thang da" gyizoo: yi lang" gi nyangnu" da" sham: lham: joem ri she: pyam khare" lho: tang" phang: loo" goo" wa? ga: Aseing tid to" bye:.