9
Lgy. 22: 6-16, 26: 12-18.
1 Hau: ayo, moo Sholu gi Yesu ri loem" jeing" loo mo, ri pyi: sho: shen" yhen wa shid re" kyoug, nyid su nghoid. Nyang: gi khainjung agyi zeung, jhang khyoo: yhe: lho:
2 Aseing da" khyoo: ri phau" cang nyid mo Yuggi myiyi: yi ri myang lang" nyangnu" ri myheug yu lho: wigi Yerusalem voomoo" khyoo: shu" tau" loo" wa shid mo khainjung pho jhang mo Damasku voo moo jo, da- tarha" jung yi jhang being" si' byid: da" akhang" mougsoug" ri yhe: mho' ci: da.
3 Sholu gi Damasku voogung moo ju" yhe: lo" nyid uri nyid' dain' tung"- mougkhung: mo bidbang gi nya: ayam, aqei: moo gye" bang lo.
4 Sholu koem gi myidjang moo leung goeb loo" khare"- hau: thang: ri nyang: gi Sholu- Sholu- nang ngoo ri ce: noem koid wigi shen" yhen nyid lha"? ga: da" thui: ri shau" gyo: kaid.
5 Sholu gi Aseing we' nang hang" nghoid lha"? ga: myed:- hau: thui: gi Ngoo gi nang shen" yhen nyid su- Yesu nghoid ga: tid.
6 Nghoid loug we' nang to' lho: voomoo" khyoo: vang loo" we' houg: moo nang koid ca" da" moo" ri lhoem: tid kyoo" wa"- ga: tid.
7 Sholu yo' dage" gyung: so" loo" bang: gi yab, theung: lho: dang: dakhoin" we' atid loo: nghoid ago". Nyangnu" gi thui: ri shau" gyo: boem nghoid loug we' hang" ri we' amyang boem nghoid da.
8 Sholu gi myidjang mo to' re" lho: nyang: myojid" ri phang kaid nghoid loug we' ci" we' amyang loo: nghoid da. Houg: yoomo Sholu ri nya: lo, mo she: lho: wigi Damasku voogung khyoo: shu" vang lo" boem ago".
9 Sholu gi soem" nyid" nyang: myo, amyang loo- hau: bid, nyid gyoo: moo nyang: gi ci" we' azoo: ashug loo: nyid nyid.
10 Damasku voogung moo loem" jeing" da" Anani ga: da" byu dayug nyid. Nyang: yoeb, myang myang jang" moo Aseing gi Anani we"- ga: tid. Anani gi Aseing we" ngoo hid: moo nyid o"- ga: phoug tu".
11 Houg: lang" Aseing gi nyang: ri to' lho: khyoo: dain: thung" ga: da" fu" moo" khyoo: moo yhe: loo" we' hau: lho: Yuda yhoem: mo, Tarshu voobyu Sholu ga: su: ri yhe: sho: myed: yu we. Nyang: gi akyu" mho' lho: nyid nyid.
12 Nyang: gi yoeb, myang moo Anani ga: su: dayug vang re" wigi nya: myo, doem myang loo wa shid mo Nya: vhuloem tho' moo lo, ki" byid: ziri myang bye:- ga: tid.
13 Houg: lang" Anani gi Aseing we"- he: yug gi Yerusalem voomoo" moo nyid shi" uri Re" phung: byu yi ri agyug alhung: nyang- shen" yhen lid loo bye:- ga: tid go" thui: ri byu myoo" sho' nhoid mo shoug" gyoo: bye:.
14 Hau: tho' moo agoo" nang ri coung" nghei bang: dangain" ri we' myheug yu wa shid re" khainjung agyi moo" yi jhang mo amyeung" mougsoug" ri mho' voin lho: wigi he: Damasku voogung moo ju" ri su: nghoid- ga: tid.
15 Aseing gi Anani ri doem tid zigi yhe: loo" we' tungbau yi ri we' khokham ri we' Israela byu yi ri we' nga" myeing ri cang tid fu" yen" zoore ngoo ri coung" nghei byid: wa shid mo ngoo khyen: yu too" su: nghoid.
16 Nga" myeing yoomo nyang: dayam, dayoo: kham zoo: ca" gu: ri dangain" ngoo, Nyang: ri toin" shid wa nghoid- ga: tid.
17 Houg: yoomo Anani gi Sholu nyid da" yhoem: khyoo: vang yhe: lho: Sholu da" atho' moo nya: lo, yhe: ki" byid: wigi mangnhung" phoo' Sholu we"- nang he: voogung khyoo: do, lo da" uri khyoo: moo nang ri toin" shid byid: da- Aseing Yesu nyang: wigi ngoo ri re" jhang moo nhang: kaid zi nghoid. Nyang: gi nang myo, doem myang loo wa shid mo we' gyeungshang: da" Venyi: yoo" baja" ga: we' ngoo ri nhang: kaid zi nghoid- ga: nyang: ri tid kyo".
18 Houg: lang" Sholu da" myojid" mo wimdo, kyab te" zi yed" gyo" lho: nyang: gi myo, doem myang loo bye:. Houg: lang" nyang: gi to' re" lho: babtisma ri kham: yu bye:.
19 Hau: thang: ri nyang: gi zoo: noem ri doem zo: lho: yoem: doem bo loo bye:.
Sholu gi Damasku voogung mo loem" jeing" bang: yo' dayo, koo: nyid nyid da.
20 Nyang: gi Yuda tarha" jung joem khyoo: dain: yhe: lo" lho: Yesu gi Mangso nya: zoo: nghoid- ga: khyoo: ri kho" kyoo" byid: bye:.
21 Nya: dang: ri shoug" gyoo: mo, dangain" bang: gi gyo: mau" byug boem wigi byu he: yug gi Yerusalem voomoo" moo Yesu ga: su: ri Noku coung" nghei mo, ri lhoung, said pyam nyid su: nghoid- anghoid goo" la"? ga: myed go" nyid boem.
22 Nghoid loug we' Sholu gi kho" jang" moo je" yoem: bo lo wigi Yesu gi Meshia nyang: nghoid ga: ziri sagsi yo' goolhoo' kho" kyoo" byid: yoomo Damasku voogung mo: da" Yuda byumyu" yi gi nya: dang: ri ayo" phoug lo: boem nghoid ago".
23 Bidnyid myoo" sho' nyid" lid lo" thang: ri Yuda byu yi gi Sholu ri said pyam wa da" phajhi" khyau" ago".
24 Nghoid loug we' hau: khyoo: ri Sholu gi se' pyam byid: bye:. Yuda byu yi gi Sholu ri said pyam wa shid re" voogung khoem" duang: moo nyid" ri myen" ri lhoem: nyid boem ago,
25 Nghoid loug we' damyen rigi Sholu da" cangzoo: yi gi nyang: ri shu" yu lho: gyoin khoug: moo zhung: nhang: wigi vang khyam: yam, bang: zo: khoem" khyo" wigi nyang: ri shoid khyo' kaid ago".
26 Sholu gi Yerusalem Voomoo" moo ju" yhi: lang" cangzoo: yi yo' zoem" khoug: wa shid mo yoem: kaid nyid. Nghoid loug we' nyangnu" gi nyang: cangzoo: bue" loo bye: ziri aloem" boem yoomo- nyangnu" dangain" bang: gi Sholu ri gyoug nyid boem ago".
27 Hau: thang: ri Barnaba gi Sholu ri lagyoo: yi jhang khyoo: shu" yhe: lho: khyoo: moo Sholu gi Aseing yo' khasu" shau" go" da" khyoo: ri we' Aseing gi Sholu ri khasu" ga: tid da" khyoo: ri we' Sholu gi damasku voo moo Aseing Yesu da" myeing ri lang: lho: agyug avoem, khasu" ga: kho" kyo" loo bye: da" khyoo: ri we' lagyoo: yi ri tid kyoo" bye:.
28 Houg: yoomo Sholu gi lagyoo: yi yo' dage" yhe- dage" nyid lho: wigi Yerusalem voomoo" moo Aseing myeing: ri lang: wigi agyug avoem, loo: cang kho" kyo" yen" boem ago".
29 Sholu gi Greek myeing" kaid da" Yuda yi we' tid ngeug go" nyid. Nyangnu" gi Sholu ri said pyam wa ga: soin' ago".
30 He: da" khyoo: ri loem" jeing" nyid phung: byu yi se' lo boem wigi nyangnu" Sholu ri kesare voogung khyoo: shu" yhe: lo" boem lho: Houg: mo wigi Tarshu khyoo: nyang: ri nhang: kaid ago".
31 Houg: yoomo Yuda moug:- Galile moug: yo' Samari moug: goin" jangmo, phung: byu yi gi shen" yhen zi ashoug" loo: dayo, daboin: zoo: shau" nyid boem ago". Phoung byu yi gi Aseing Yesu ri gyoug phau" nyid boem ziyo' kangso dei lho: gyeungshang: da" Venyi: wigi, pang" thoug byid: yoomo geingteing lo wigi phung: byu yi gi je" myo: tham: lo nyid boem bye:.
32 Petru gi joyoo khyi khang" moo" khyoo: cang so" koem" yen" lho: dalheung: rigi Luda voogung moo nyid da- Mangso byu yi jhang moo we' doem yhe: koem" yu" kho!
33 Hau: da" voogung moo gung joem: shid: lho: ayo" too loo: shed' zain' loem: loem: nyang- yhoeb' joyoo moo leung jo, da- Ainea ga: su: dayug ri Petru gi yhe: myang bye:.
34 Houg: lang" Petru gi hau: gung joem: shid: su: ri Ainea we"- Yesu Khristu gi nang ri gi byid: bye:- to lho: re" yhoeb' yoo nyheung' we' ga: tid. Houg: lang" Ainea gi to' loo" bye:.
35 Luda voogung yo' Sharon voo moo nyid mo, mungbyu yi dangain" bang: gi Ainea ri zheung: myang lang" gi Aseing jhang khyoo: lheung: lo boem ago".
36 Akhid" Yopa voogung moo Tabitha ga: loem" jeing" da" myiyi: dayug nyid- ( Nya: myeing ri Greek myeing" khyo" Dorka ga: zi nghoid wigi nya: da" dangkang: gi soo" cid", ga: zi nghoid) Nyang: gi khanham we' ge da" moo" riza: zei: nyid wigi sho" jhen: bang: ri bo pang" thoug nyid da" myiyi: nghoid.
37 Hau: da" ayo, moo nyang: gi no wigi shid: loo" bye:. Nya: mang: ri cid" sain' pyam lho: atho' pyam: mo yab, moo mhang' to" ago".
38 Yopa voogung gi Luda voo yo' atoung" thei" vi: nghoid da- houg: yoomo Yopa voogung mo loem" jeing" bang: gi Luda voo moo Petru ju" nyid ziri shau" gyo: boem wigi nyangnu" gi byu eig yug ri Petru jhang khyoo: nhang: kaid lho: ngoonu" jhang khyoo: myab, myab, jen" re" lhoo: we' ga: khi: nhang: kaid ago".
39 Houg: yoomo Petru gi hau: eig yug yo' dage" yhe: loo" bye:- Petru gi ju" yhi: lang" nyangnu" gi Petru ri atho' pyam: khyoo: shu" do' lo" ago". Cougmoo" yi dangain" mo, gi ngau, zoore Petru da" gung yam, moo zeung: foem: lo lho: Dorka nyang: dei nyid shi" ayo, moo coeb too" khare" da" byimi dangain" ri Petru ri ci: shug ago".
40 Houg: lang" Petru gi Nyangnu" dangain" mo, ri tung: gung kyoo: thu' loo" nhang: lho: poid thug thoug wigi akyu" mho' nyid. Hau: thang: ri mang jo, shoid khyoo: lheung: lho:" Tabitha we" too' we' ga: tid. Houg: lang" Dorka gi myo, phang kaid lho: Petru ri myang wigi nyang: gi to' zhoung: jo, bye:.
41 Petru gi nya: lo, yhoin" kaid lho: nyang: ri she: to' kaid. Hau: thang: ri Petru gi cougmoo" myhi' yi yo' dage" loem" jeing" mo, dangain"- nyang: ri khe: yu wigi Dorka dei lo bye: zi nyangnu" ri ab, byid: bye:.
42 He: ludang: gi Yopa voogung goin" moo byeung" sho' fu" lo" wigi byu myoo" sho' mo, gi Aseing ri loem" lo boem bye:.
43 Petru gi Yopa voogung moo xangshid" lheung: moo" zei: bye:. Simun ga: su: yo' dage" myoo" sho' nyid" theung: nyid.