7
1 khainjung agyi moo"' gi Stephan ri he: yooboo foin: da" dang: gi gyeing" nyang: deing la"? ga: myid: yu" da.
2 Houg: lang" Stephan gi mangnhung" yi we"- nheig boo mo, we"- tam" gyo: yu" ge. Ngoonu" da" nya: phoug" Abraham, gi Haran voo moo ayhe: nyid shi" ri Mesopotemia mung" moo nyid shi" mo phung" yoeb, bo thang da" Mangsoo gi nya: jhang moo thu' shug lho:
3 Mangsoo tid zigi re" da" ekoin deungkhu: byu yi yo' re" da" mougmyid yoosoo" ri to" pyam kho' wigi nang ri ngoo toin" shid wa da" mung" khyoo: yhe: loo" we' ga: tid to".
4 Houg: yoomo Abraham gi nya: mungdain ri too" kho' lho: Haran voogung moo yhe: nyid. Abraham da" nya: phoo' shid: thang: ri Mangsoo gi akhid" ngoonu" nyid nyid da- he: mung" khyoo: Abraham ri zug pyung" nyhid: kaid bye:.
5 Hau: da" ayo, mo wigi Mangsoo gi Abraham ri hau: mungdain mo da" mougmyid ri nya: mid khyo" lo, dashi" lang" abyid: nghoid da. Nghoid loug we' hau: da" mungdain ri nyang: yo' nya: myed: nya: zoo: yiri byid: wa ga: Mangsoo gi dang: theung too" bye:- Mangsoo gi he: dang: theung byid: da" uri Abraham gi zoo: dayug we' ayoo" shi" .
6 Mangsoo tid zigi Abraham ri re" myed: re" zoo: yi gi tungbau moug: moo yhe: nyid wigi join' bue" lo" ziyo' zain loem: myed: shoo: dayam, dayoo: shen" yhen zi shau" boem wa nghoid.
7 Nghoid loug we' nyangnu" ri join koid nhang: zo: nyid da" byumyu" yi da" atho' moo- ngoo dang: phyed byid: wa. Hau: thang: ri nyangnu" gi hau: mungdain mo thu lo" lho: he: joyoo moo ngoo ri goeb pid lo boem wa nghoid- ga: tid kyo".
8 Hau: thang: ri Mangsoo gi dang: theung to da" asoo" so" to" khyo" shooyid' thang: yham" da" khyoo: Abraham ri byid: bye: yoomo Abraham gi Isag ri khu: thang: ri shed nyid" ein: nyid" moo Isag ri shooyid' thang: yham" da" moo" ri koid byid: bye:. Isag gi nya: zoo: Yaku ri Yaku gi ngoonu" myeing fu" da" phoug" phoo' yi nghoid da- nya: zoo: yi daxe: eig yug ri shooyid thang: yham" da" khyoo: ri koid byid: bye:.
9 Yaku da" nya: zoo: yigi nyangnu" da" nhung" zoo: Yoseb, ri myid nau: boem yoomo Egutu moug: khyoo: join koid nhang: wa shid mo Yoseb ri ung" byid: pyam boem ago".
10 Nghoid loug we' Mangsoo gi nyang: yo' dage" nghoid nyid yoomo nyang: ri yaukhi" kyikhyeig dangain" jangmo loid loo" nhang: bye:. Mangsoo gi Yoseb ri Egutu khokham da" shidkhoin" moo yu" jhed' yu" kang: da" nyid yab, khyoo: nyheung' byid: ziyo' lasi phajhi" byid: wigi Egutu khokham gi Yoseb ri Mungdain goin" da" atho' moo we' khokham khoo" dangain" jang" moo we' Vhoeb' khang" nhang: too" bye:.
11 Houg: lang" Egutu mungdain yo' Khanan mung" goin" jang" moo phang" khoug zeing gyo" lo wigi yaukhi" kyikhyeig shau" nyid boem bye:. Ngoonu" da" nya: phoug" pho we' zoo: noem thang byug yoomo zoo: noem ayo" sho: boem loo: nghoid ago".
12 Yaku gi Egutu mung" moo shoovoo: shiloem, jo, ga: ziri shoug" gyoo: lang- nyang: gi ngoonu" da" phoug" phoo' yi nghoid da- nya: zoo: yiri xangshid" lheung: Egutu mung" khyoo: nhang: kaid bye:.
13 Eig, lheung: ein: lheung: rigi Yoseb, gi nya: mang: bang: ri- nyang: hang nghoid da" khyoo: ri tid kyoo" bye:. Houg: lang" Egutu khokham phoo' gi Yoseb da" yhoem: byu yi khyoo: ri se' lo" da.
14 Houg: yoomo Yoseb gi nya: phoo' Yaku ri yhoem: byu nyhed' xe: wim: yug goin" su- Egutu mung" khyoo: zug byoung: ri" wa shid mo, dang: pyeing: kaid bye:.
15 Houg: lang" Yaku gi Egutu mung" moo yhe: byoung: nyid wigi Hau: mung" moo nyang: yo' nya: zooyi dangain" gi shid: pyam bye:.
16 Nyangnu" da" manggung joem rigi Shekhem: khyoo: dang lo" lho: Hamora nya: zoo: yi mo Abraham ngei byid: lho: qei, yu to" da- loeb, boug moo lo" myhoeb, ago".
17 Mangsoo gi Abraham ri byid: to" da" dang: thang" cab joeb byeung" loo wa bidnyid ju" lo ri Egutu mung" moo nyid da" ngoonu" da" byumyu" yi gi gyi" sho' nyang: nyid myo: lo boem ago".
18 Lo" thang rigi Yoseb ri ase' da" khokham dayug gi Egutu mung" moo khokham koid nyid bye:.
19 Hau: da" khokham phoo' gi ngoonu" da" phoug" phyid" yi ri phajhi" khyau" lho: wigi nyangnu" ri shen" yhen nyid. Nyangnu" da" zoonu" yi ri shid: loo" wa shid mo yhoem: tung: goung, shoid khyoo: agyoo: atho' yhe: she: pyam too" nhang.
20 Hau: ayo, moo gye" young" da" zoonu" Moshe gi khu: loo bye:. Nyang: ri yhoem: moo lhammoo" soem" khyab, za: khu: nyid lho:
21 Moshe gi nya: yhoem: mo tungbau' khyoo: she: pyam zi shau" lang" khokham myiyi: nu" gi nyang: ri koid: yu lho: nya: zoo: khyo" khu: gyi: bye:.
22 Hau: lho: Moshe gi Egutu byu yi da" phajhi" dangain" ri jhau" yu wigi nhoid khoin" thui: yo' lo, moo" boo su: bue" loo bye:.
23 Moshe da" apyaid myed: xi: zain' nghoid lang" gi nyang: gi nya: mangnhung" Israela byumyu" yi, yaukhi" kyikhyeig nyid yoo- yhe: yu" wa shid mo myid phyid ci: bye:.
24 Nyang: gi Israela byumyu" dayug ri Egutu byu dayug wigi shen" yhen nyid lang" ziri yhe: myang: wigi Egutu byu ri yhe: said pyam lho: latoo: phug byid: ziyo' nya: byu ri goemloem yu bye:.
25 Nyangnu" Israela byumyu" yi loid byoin loo" wa da" khyoo: moo Mangsoo gi nyang: ri ci: wa nghoid- ga: da" khyoo: ri nya: byumyu" yi se' gyoo: goo wa ga: Moshe gi myed jho: nyid. Nghoid loug we' hau: khyoo ri nya: byumyu" yi gi ase' gyoo: nghoid ago".
26 Hau: thang: nyid rigi Israela byumyu" eig yug myeing" myoo: go" nyid lang" ziri Moshe yhe: myang wigi nya: eig yug ri mo, byo, kang" lho: tam gyo: yu" ge'. Re" eig yug gi Israela mangnhung" nyang: cang" danghoid ri cenoem wim wigi houg: su" se' byo, go" nyid lha: ga: yhe: tid.
27 Nghoid loug we' nya: byencang" phoo' ri byo, goo" vhookung: lhung: su: gi Moshe ri doin: shu" pyam lho: ngoonu" da" atho' moo vhoeb khang" wa su: yo' tarha" agyi nang ri hang" koid nhang: to" lha".
28 Nang gi Egutu byu dayug ri anyinab, we' said pyam yhang: ti" ngoo ri we' nang said pyam nau la"? ga: Moshe ri myed.
29 Moshe gi he: dang: ri shoug" gyoo: lang" nyang: gi Egutu mung" mo phang: thu lo" lho: Midian mung" moo lo" phang: nyid. Nyang: gi hau: mung" moo yug gi zoo: eig yug lo" yo".
30 Zain' nyid myed: xi: zain' lid lo" thang: ri Sina boem mo dain" pyoid' yoo, moo myi: nge" nyid da" mhain" pung' moo moug: lagyoo: dayug gi Moshe ri re" yab, shug da.
31 Moshe gi hau: ziri myang wigi mau" lo" byug lho: voin: tang: yu" wa ga:- mhain" pung' nam, moo yu: yhe: lo".
32 Nghoid loug we' nyang: gi Aseing da" thui: ri shau" gyo: zigi Ngoo, gi nanu" phoug" phyid" yi da" Mangsoo- Abraham da" Mangsoo- Isag da" Mangsoo Yaku da" Mangsoo nghoid- ga: da" thui: ri yhe: shoug" gyoo: yoomo Moshe gi gyoug nain" ziyo' avoem" yu" loo.
33 Aseing gi nyang: ri re" da" khyidbaid khyoid pyam we' khasu" wim ga: ri Nang yab, jo, da" joyoo gi gyeungshang: da" myed jang: nghoid nyid ga: tid.
34 Nga" byumyu" yi gi Egutu mung" moo dayam, dayoo:- yaukhi" kyikhyeig shau" zo: nyid ziri ngoo myang bye:. Ngoo gi nyangnu" da" nookyeing" thui: ri shoug" gyoo: bye: yoomo nyangnu" ri khyoid yu wa ein: ngoo ju" re" zi nghoid. Akhid" nyang: nang ri ngoo Egutu mung" khyoo: nhang: kaid wa ga: tid.
35 Moshe gi Israela byumyu" yi wigi ngeug pyam zi shau" da" byu dayug nghoid. Nang ri ngoonu" tho' moo vhoeb khang" wa ziyo' tarha" agyi koid wa zi hang" wigi nyheung to" lha: ga: khyo" wigi ngeug pyam ago". Moshe gi Israela byumyu" yi ri vhoeb khang" wa ziyo' nyangnu" ri khyoid yu wa shid re" myi: nge" nyid da" mhain" pung' moo yab, shug da" moug: lagyoo: da" lo, wigi Mangsoo nhang: kaid su: nghoid nyid.
36 Nyang: gi Egutu Mung" moo we' gyid thoem" ni moo we' dain" pyoid yoo moo zain loem: myed: xi: mau" pho" alhoo: again yo' mau" pho" moozoo" joem ri zei: shug lho: Israela byumyu" yi ri Egutu mung" mo shu" thu loo bye:.
37 Mangsoo gi ngoo ri nhang: kaid ziyo' dakhyoo" ti" Lapi: dayug ri nanu" jhang khyoo: nhang: kaid byid: wa nghoid. Nyang: gi nanu" byumyu" mo nghoid wa ga: tid su: gi Moshe nyang nghoid bye:.
38 Nyang: gi dain" pyoid yoo moo Israela byumyu" yi yo' dage- shoin" nyid lho: houg: moo ngoonu" phoug" phyid" yi yo' dage" Sina boem tho' moo nang yo' dang: tid go" da" moug: lagyoo: yo' dage" nyid loo su: nyang: nghoid bye:. Ngoonu" ri lhid" kaid da" kangso dei nyid da" Mangso jhang mo mungdang: we' yo" kham: yu su: nghoid.
39 Nghoid loug we' ngoonu" da" phoug" phyid" yi gi nya: dang: ri zheung: ngeug pyam boem bye:. Nyangnu" gi Moshe ri ngeug pyam lho: Egutu mung" khyoo: doem tau" loo" nau myid bo ago".
40 Hau: lho: nyangnu" gi Arun ri ngoonu" ri shu" vhu" shi: wa da" yu phara" soolhoo joem ri ngoonu" ri koid: byid: we' ngoonu" ri Egutu mung" mo shu" thu lo da" Moshe ga: su: gi cibue" byug bye: ziri ngoonu" ase' boem loo- ga: tid ago".
41 Hougsu" wigi nyangnu" nujung soolhoo: daloem: ri koid shab to" lho: wigi hau: nujung lhoo: ri xoin" to' byid: ziyo' nyangnu" koid to" da" yu phara" ri coung" nghei byid: da" pui" zeing koid boem ago".
42 Houg: yoomo, lapi: yi da" jhoem: pug moo
Israela mungbyu yi we"- dain" pyoid yoo moo myed: xi: zain
goin" nanu" gougnyhoug xoin" ngei" byid: da" khyoo: gi
ngoo ri ngei" byid: zi anghoid go" da-
43 Nanu" nyang: goeb pid wa ga: koid to" da" yu phara" soolhoo:
nghoid da- Moleg' yu phara"- nanu" da" Rephain: ga: kyi: yu phara"-
soolhoo: ri nanu" loemkhau: lo boem ago". Houg: yoomo ngoo gi
nanu" ri Babelon mung" lid' sho' myheug shu" loo" nhang:
pyam wa- ga: tid to" ziyo' dakhyoo" ti" Mangsoo gi nyangnu"
jhang mo myonhoo: lheung: lo" lho: mougkhung: mo kyi:
joem ri goeb pid nyid boem wa shid mo nyangnu" ri she: pyam to" abye:.
44 Ngoonu" da" phoug" phyid" yi gi nyangnu" yo' dage" za: dain" pyoid yoo moo Mangsoo bo da" khyoo: sagsi: zoem" ri koid boem bye:. Mangsoo gi Moshe ri: koid we' ga: tid da" alhoo: yo' dakhyoo" ti" hau: zoem" ri koid boem bye:.
45 Hau: thang: ri nyangnu" da" phoug" phyid" yi jhang mo Hau: da" zoem" ri xo' kham: yu boem ago". Nyangnu" da" phoug" phyid" yi gi Mangsoo wigi khaid sain" pyam da" byumyu" yi Khanan mung" khyoo: Yoshu yo' dage" vang lo" boem uri hau: zoem" ri we' vu, vang lo" boem ago". Hau: da" zoem" gi David da" apyaid moo ju" sho' hau: mungdain moo dajo, jo.
46 David khokham gi Mangso shidkhoin" moo myonhoo: yo" wigi Yaku da" Mangsoo nyid nyid wa shid re" joyoo koid wa shid mo akhang" mho' nyid,
47 Nghoid loug we' Mangso shid re" yhoem: koid su: gi Sholumun danghoid nyid.
48 Nghoid sho loug we' myhang: thang da" Mangsoo gi byu yi da" lo, yo' koid to" da" yhoem: khoug: moo nyid wa zi anghoid.
Hau: da" khyoo: ri lapi: phoo' tid to" zigi mougkhung: mougdi gi nya: da" zhungtang nghoid.
49 myidjang gi nya: da" khyid: theing goo, nghoid- Nang gi Nga" shid mo, khate" da" yhoem: yo" koid byid: wa lha". Nga" shid mo nyid wa joyoo kha: khyi moo nghoid lha".
50 Hau: gu: dangain" ri ngoo, nyang: phain" to" zi anghoid la"? ga: wigi Aseing tid nyid.
51 Stephan gi xo' lho: doem tid zigi nanu" gi nheigloem: gye" thain: nyid ago"- nanu" da" nheigloem: ung: khoug: moo gi Mangsoo ri ase' boem nghoid go". Nanu" gi nanu" nya: da" phoug" phyid" yi yhang: ti" Mangso mungdang: ri ashoug" gyo: da" noojed mo, nghoid boem ago". Gyeungshang: da" Venyi: ri khanham we' ngeug pyam mo, nghoid nyid boem ago".
52 Nanu" da" phoug" phyid" yi wigi ashen" yhen yu" da" lapi: ga: zi kha: yug nyid yu go" Nyangnu" gi Mangso da" deingmain" su: ju" ri" wa ga: da" khyoo: ri tid fu" kyo" da" Mangso lagyoo: yi ri we' said pyam boem abye: go". Akhid" nanu" gi hau: yug ri ab, byid: pyam lho: said pyam boem abye: go".
53 Nanu" gi lagyoo: yi da" nhoid' khoin" thui: khyo" Mangso tarha" ri shau" kham: yu mo, nghoid ago". Nghoid loug we' nanu" gi hau: ziri aphau" cang boem nghoid ago"- ga: tid.
54 Yuda tarha" yab, do' phung: mo bang: gi hau: da" dang: ri shoug" gyoo: lang" nyangnu" da" nheigloem: gi phoid' phoid' ga: zhu: ri" sho' nheig gyo: yo: boem wigi Stephan gi: zei ngaid' ci: sho' nheig yo: nyid abye: go".
55 Nghoid loug we' Stephan gi gyeungshang: da" Venyi: byeung" jo, yoomo mougkhung: khyoo: tu: yu" kaid ri Mangso phung" yoeb, yo' Yesu gi Mangso lo, yo shoid moo yab, jo, ziri myang kaid.
56 Houg: lang" Stephan gi yu" ge'- mougkhung: gi bang" lo" wigi byu da" nya: zoo: gi Mangso da" lo, yo shoid moo yab, jo, ziri ngoo myang kaid bye:- ga: tid.
57 Houg: yoomo nyang: nu gi nyho: wigi nyangnu" da" nookhyab' moo lo, nyhau" thau" jhed' ci: lho: dangain" mo, dalheung: dam, Stephan jhang khyoo: gei, yhe: lo" ago".
58 Hau: lho: nyang: ri vooyam, shoid khyoo: zheung: doin: goin' thu' lo" wigi lug go' yo' du" ago". Sagsi: yi gi nyangnu" da" thobyi: byisheung: joem ri Sholu ga: da" zoolu: pho khyid: yang: moo khyoid boem, to" lho: zung" nhang: ago".
59 Nyangnu" gi Stephan ri houg: su" lug go' wigi du" go" nyid da" uri Stephan gi Aseing" we" Aseing we"- nga" Venyi: ri kham: yu byid: we' ga: Aseing ri mho' yoid nyid.
60 Nyang: gi poid' thug thoung, lho: Aseing we"- nyangnu" da" yooboo ri axoem" too" byid: o" ga: nyho: kaid- he: dang: bain tid lang" Stephan gi kang: gyo" loo" bye:.