5
1 Anani ga: da" byu dayug yo' nya: yhoem: seing: myhi' Saphira gi nya: eig yug seung: da" yoo mougmyid dayham" ri oung" pyam ago".
2 Nghoid loug we' nya: Yhoem: seing: myhi' myed veung" ziyo' dakhyoo" ti" ngei dayham" ri nya: eig yug shid re" myho, yhoem" to" lho: wigi deung da" ngei ri lagyoo: yi da" lo, khoug: moo yhe: ab, byid: da.
3 Petru tid zigi Anani we" nang gi yoo mougmyid ri oung" pyam da" ngei- dayham" ri myho, yhoem" to" lho: gyeungshang: da" Venyi: ri mhau' pyam bye: da- Re" gungdu: ce: noem koid wigi satan ri vhoeb khang" nhang: lha".
4 Hau: mougmyid gi a-ung" shi" gu: we' nang seing: shi"- ung" pyam thang: ri we' hau: mougmyid phoug" ngei we' re" ngei nghoid. Houg: su" nghoid ri ciwim wigi hougsu" koid wa shid re myid phyid pyam lha". Nang gi byu ri mhau' zi anghoid- Mangsoo ri mhau' zi nghoid- ga: nyang: ri tid.
5 Anani gi he: da" dang: ri shoug" gyoo: yo' dage" dalheung: dam shid: leung loo" khare" khyoo: ri shoug" gyoo: mo, gi gye" gyo: gyoug nyid boem ago".
6 Zoolu: yi re" lho:- Anani manggung ri pain" du wigi thoeb, lho: nghi: khyoo: dang thu' lo" boem wigi yhe: myhoeb, pyam boem ago".
7 Nayi: ayo, soem" loem: koo: kyo: ri Anani da" yhoem: seing: myhi gi cibue" nyid ziri asi loo: za: ju" vang re.
8 Houg: lang" Petru gi- re" eig yug da" yoo mougmyid oung" da" ngei dangain" he: gu: za: nghoid bye: la". Ngoo ri tid kyoo" we' ga: nyang: ri lhoem: myed, Houg: lang" nyang: tid zigi" Nghoid bye ngei dangain"Hau: gu: nghoid bye ga: phoug tu" da.
9 Houg: yoomo Petru gi re" yhoem: seing: phoo' yo' re" eig yug gi Mangso Venyi: ri ca: yu" wa shid re" ciyoomo wigi nheigloem: sham: shoin" lho: myid phyid go" lha". Re" yhoem: seing: phoo' ri yhe: dang myhoeb pyam bang: gi akhid" khoem" duang: nam, moo ju" lo abye: go". Nyangnu" gi nang ri we' tung: gung khyoo: shau" dang thu' lo" boem wa nghoid.
10 Hougsu" tid' lang" hau: myiyi: myhi' gi Petru da" khyid: yang: moo shid: leung loo" bye:. Zoolu: yi ju" vang lo ri hau: myiyi: myhi' shid: leung, jo, ziri lo zheung: myang wigi nyangnu" gi hau: myiyi: myhi' da" manggung ri tung: gung khyoo: dang thu' lo" lho: yhoem: seing: pho da" anam, moo yhe: zheung: myhoeb pyam ago".
11 Phoung goin" bang: yo' gootu: dangain" bang: hau: khyoo: ri zheung: shau" gyo: lo" boem wigi gye" gyoug nyid boem bye:.
12 Lagyoo: yi da" lo, khyo" wigi mungbyu yi da" mo, phung: moo mau" pho" moozoo" joem ri myoo" sho' zei: shug ago". Loem" jeing" bang: dangain" mo, gi Sholumun da" being" zeing: jang: moo dage" za: foem: phoung nyid boem ago".
13 Mung" byu yi gi nyangnu" ri gye" cung" dang: sang: boem nghoid loug we' gooji gi hang" we' nyangnu" ri avoem" zoem" nghoid ago".
14 Nghoid sho loug we' Mangsoo ri loemkhau: da" yug gi myiyi: yi gi hau: phung: moo daje, loung: lo nyid boem.
15 Petru lid lo" da" uri noo, phyoo" shau" bang: dayham" gi nya: yoebbyoo moo khyalhang" shau" zang" baja" ga: noo, phyoo" shau" mo, ri fu" moo" khyoo: dang thu' re" lho: yhoeb' yoo tho' moo pheing" thain: tho' moo re" lheung: to" boem ago". Nyangnu" houg: su" koid boem zigi lagyoo: yi da" ge lo, moo" ashi" joem nghoid.
16 Yerusalem voomoo" ayam, aqei: mo da" mungbyu yi we' noo phyoo" shau" mo, yo' akhyeung" da" yu vang ci: mo, ri shu" re" boem ago". Houg: bang: dangain" mo, gi noo phyoo" ge shang lo" byug boem bye:.
17 Houg: lang" khainjung zeing yo' nya: byencang" yi nghoid da- Saduke phung bang: gi lagyoo: yi ri gye" anoug, angei zi bue" lo wigi nyangnu" gi lagyoo: yi ri myheug wa khyo" soin' lo boem bye:.
18 Houg: yoomo nyangnu" gi lagyoo: yi ri zheung: myheug yu lho: thung: khoug: moo lhoung, to" abye: go".
19 Nghoid loug we' hau: da" myen" ri Aseing da" moug: lagyoo: dayug gi thung: khoem" duang: joem ri phang pyam byid: boem lho: lagyoo: yi ri nghe: shoid khyoo: shu" thu' lo" wigi
20 Nanu" yhe: ge'- Noku Yhoem: Moo" moo yhe: yab, jo, lho- he: kangso dei khyoo: dangain" ri mungbyu yi ri tid kyoo" ge" ga: nyangnu" ri tid kaid da.
21 Lagyoo: yi we' tid da" dang: ri tam" gyoo: yoomo nyangnu" gi nabsoin: myo myang yid' moo Noku Yhoem: Moo" khoug: moo vang yhe: lho: jhau" byid: nyid boem ago".
Hau: khainjung zeing gi nya: byen, cang" yi yo' Yuda tarha" kongsi: zoebphoung: koid wa shid re" Yuda sayen" vhujhung: yiri khe: zheung" to" ago". Hau: thang: ri nyangnu" gi lagyoo: yi ri nyangnu" da" shidkhoin" moo shu" vang ri" wa amyeung" byid: lho: thung: yhoem: mo, shu" nhang: kaid ago".
22 Nghoid loug we' goemloem gyizoug: mo" jhang moo ju" yhe: lo boem uri nyangnu" gi thung: khoug: mo, lagyoo: yi ri ayhe: myang boem nghoid da- houg: lang" tarha" yab, do, phung: khyoo: doem zheung: tau" lo wigi
23 Ngoonu" thung: moo ju" yhe: ri thung: khoem" joem gi teing teing za: myhid" to" ziyo' zung" mo, we' khoem" duang: moo goolhoo' za: zung" nyid boem ziri yhe: myang. Nghoid loug we' ngoonu" khoem" yhe: phang kaid ri akhoug: moo hang" ri we' amyang loo- ga: ludang: ri lo doem tid kyo" boem.
24 khainjung agyi moo"' yi yo' Noku Yhoem: Moo" mo goemloem gyizoo: yigi he: da" ludang: ri shoug" gyoo: lang" he" lagyoo: yi gi ce: noem bue" boem bye: lha"? ga: gye" mau" nyid boem bye:.
25 Hau: thang: ri byu dayug ju" re" lho" gyo: yu" ge'- nanu" thung: moo lhoung, to" da" byu yi gi Noku Yhoem: Moo" khoug: moo mungbyu yi ri dajhoug" byid: nyid ago"- ga: nyangnu" ri tid kyo".
26 Houg: lang" Noku Yhoem: Moo" mo, goemloem zoug: phoo' gi nya: gyizoo: yi yo' thu' lo" lho: lagyoo: yi ri yhe: doem shu" tau" lo. Nghoid loug we' mungbyu yi gi nyangnu" ri lug zeung du" wa ziri gyoug boem yoomo lagyoo: yi ri anoug, akhyoid akoid nghoid ago".
27 Nyangnu" gi lagyoo: yi ri shu" vang re" lho: wigi tarha" yab, do, phung: bang: da" shidkhoin" moo yab, jo, nhang: ago". Khainjung agyi moo" gi lagyoo: yi ri dang: myed: nyid.
28 Nyang: gi hau: yug myeing ri lang: lho: ci" we' ajhoug" byid: wa shid re" nanu" ri ngoonu" gi jhug jhug nyang: amyeung" byid: too" bye:. Nghoid loug we' yu" ge- nanu" gi Yerusalem davoo goin" jang" moo nanu" da" jhau" shid khyoo: za: byeung" shoin: loo" sho' koid to" abye: go- houg: yoomo nanu" gi nyang: shid: da" xang: gyoug: ri ngoonu" da" atho' moo foin: nau boem ago"- ga: lagyoo: yi ri tid.
29 Petru yo' lagyoo: yi gi ngoonu" gi byu yi da" jhoug" myeung" tho' moo Mangso jhoug" myeing" ri je" tam" gyoo: ca" ga: phoug tu" ago".
30 Ngoonu" phoug" phyid" yi da" Mangsoo gi nanu" wigi pyang" zeing tho' moo baid jen" said pyam da" Yesu ri shid: jangmo doem dei to'' loo nhang: bye:.
31 Israela byumyu" yi we' nheigloem: thid' wa ziyo' nyangnu" da" yooboo ri khyoid pyam byid: zi shau" wa shid mo akhyoo" bo nyheung byid: wa shid re" Mangsoo gi nyang: ri khyoid yu su: yo' vhujhung: khyo" nya: lo yo, shoid moo tu: to' to" abye:.
32 Hau: da" khyoo: joem yo' sen: lho: wigi nyangnu" gi sagsi yi nyang: nghoid boem bye:- Mangso mungdang: phau" cang mo, ri byid: da- Mangso jhungshug gyeungshang: Venyi: gi sagsi nghoid- ga: phoug tu" ago".
33 tarha" yab, do' phung: mo, gi he: dang: ri shoug" gyoo: lang" gi nheig gye" gyo: yo: boem wigi nyangnu" gi lagyoo: yiri said pyam nau boem abye: go".
34 Nghoid sho loug we' nyangnu" mo mungbyu yi dangain" mo, wigi coem, phau" myang: nyid da- tarha" sara Gamale ga: su: Pharishe"" dayug gi tarha" yab, do' phung: mo, bo to' yab, re" lho:
35 Lagyoo: yi ri nghe: shoid khyoo: shu" thu' loo" wa amyeung" byid: kaid lho: wigi tarha" yab, do' phung: mo bang: ri Israela mangnhung" yi we" hid: bang: ri nanu" ce" noem koid wa nghoid loug we' lhid lho: dakoid ge'.
36 Khasu" wim la"? ga: ri shid phyang" we' a toung" myang" shi" ri Thuda ga: su: gi nya: gung ri vhujhung: dayug nghoid ga: tid lho: wigi thu' lo" da" uri byu myed: shoo: koo: nya: thang: moo cang lo" boem ago"- Nghoid loug we' nyang: ri said pyam thang: rigi nya: thang: cang mo, gi dayug dagang khyoo: byo, sain" lo" byug boem wigi nya: moozoo" we' bei: lo" byug bye:.
37 Hau: thang: ri gamgung zhayen" ri koid: yu da" ayo, moo Galile byu Yuda ga: su: doem thu' lo wigi mungbyu yi ri nya: thang: moo cang boem wa shid re" shu" pe: bye:. Nghoid loug we' nyang: ri said pyam thang: rigi nya: thang: cang bang: we' dayug dagang byo sain" lo" byug boem bye:.
38 Houg: yoomo nanu" ri ngoo tid ba- hid: bang: ri nanu" ciwe' ayen: goo"- nyangnu" ri sam" zoo: dayu" too" ge'- nyangnu" soin: to" ziyo' koid da" moozoo" gi Xangsu: byu yi mo pe:shid" zi nghoid rigi hau: zigi bei: lo" byug wa zi za: danghoid.
39 Nghoid loug we' hau: gu: gi Mangso jhang mo nghoid rigi nanu" gi nyangnu" ri ayo" ge oung: pyam boem wa nanu" gi Mangsoo ri gyi koid zi danghoid goo" wa ga: tid.
Yuda Tarha" yab, do' phung: bang: gi Gamale phajhi" byid: dang: ri tam" gyo: lhoem: yu boem ago".
40 Nyangnu" gi lagyoo: ri khe: fang yu lho: nyangnu" ri baid lho: wigi Yesu da" myeing ri lang: lho: khanham we' akho" kyoo" loo: goo" ga: nyangnu" ri amyeung" byid: kaid ago". Hau: thang: rigi nyangnu" gi lagyoo: yi ri nhang: kaid abye: da.
41 Lagyoo: yi gi Yesu da" myeing yoomo sho' thu' khyoo: thoung" shau" zigi kham zoo: moin: da" khyoo: nghoid ga:- Mangsoo gi nyangnu" ri soin: yu byid: bye: yoomo nyangnu" gi ngei pyo: ziyo' Yuda tarha" yab, do mo thu lo" boem bye:.
42 Nyid" khang" moo" Noku Yhoem: Moo" moo we' mungbyu yi jhang moo we' Yesu gi Meshia nghoid ga: da" khyoo: ngeibu: ludang: seig ri xo' lho: jhau" shed kho" kyo" nyid boem ago".