28
1 Ngoonu" gi tung: gung khyoo: goolhoo' za: yo" ju" loo" lang" hau: gagyoo: kang gi Meliti ga: ziri goolhoo' nyang: yhe: si bye:.
2 Hau: gagyoo: kang moug: mo da" byu yi gi ngoonu" ri nheig gye" lhoem: yu" khyeug boem- moug: vo lho: ngam" nyid yoomo nyangnu" gi myi: moid: wigi ngoonu" dangain" mo, ri being" lhoem: tau, yu boem ago".
3 Houg: lang" Polu gi thang" kyang" dadeing: koid: yu lho: myikhyoem moo nghe kaid- myiso' yo' nge" loo lang" hau: thang" deing: khoug: mo lhangmyu yu: thu' re" wigi Polu da" lo, moo thei" zhoug lho: xei" lhang" to" da.
4 Hougsu" Polu da" lo, moo lhangmyu, xei" lhang" to" ziri hau: moug: mo byu yi zheung: myang lang" byu he: yug gi byu said su: nghoid nyang: nghoid bye:- panglai: gyid gyi mo loid loo nghoid loug we' deingmain" da" tarha" gi nyang: ri dei nyid wa da" akhang" abyid: loo: nhung- ga: nyang: cang" nyang: tid go" nyid boem.
5 Nghoid sho' loug we' Polu gi nya: lo, mo da" lhangmyu ri myikhyoem khoug: khyoo: pyi: khyo kaid lho: ci: we' aca" loo: za: danyid nyid.
6 Nyangnu" gi Polu ri gung goin" yam: loo wa anghoid lang" gi dalheung: dam, shid: leung, loo" wa" zheung: yu" nyid boem ago". Nghoid loug we' nyangnu" gi houg: su" myang sho' zheung yu" nyid ri Polu moo daja: we' abue" lo ziri myang boem lang" gi nyangnu" da" nheigloem: thid lo lho: he: yug gi yu phara" dayug danghoid ga: tid go" nyid boem.
7 Houg: mo wigi athei" ve: da" joyoo moo hau: gagyoo: kang mo da" agyi phoo' Bobli ga: su: seung: ci: da" mougmyid jo, da. Hau" agyi phoo gi ngoonu" ri goolhoo' za: being" lhoem: tau, yu lho: soem" nyid" nyang: being" di" byid: bye:.
8 Hau: Bobli da" nya: phoo' gi nooyoem" yo' voem: ni no nyid wigi yhoeb cuang moo leung jo. Houg: lang" Polu gi hau: yug da" yab, khyoo: vang lo" wigi akyu" mho' byid: lho: hau: yug da" atho' moo nya: lo, ki" byid: wigi mainkaid byid:.
9 Hidsu" bain bue" lo" thang: ri hau: gagyoo: kang moo nyid da" noo, phyoo" aja: ja: shau" nyid bang: gi Polu jhang moo re" lo boem wigi nyangnu" dangain" bang: gi noo: phyoo" ge:, shang: lo" boem bye:.
10 Nyangnu" gi ngoonu" ri jhungshug joem myoo" sho' ja: byid: ago"- ngoonu" doem gu: loo" wa ein: soin' lo" ri ngoonu" gyung: khyoo: moo zoo: ca" da" zookhoo: joem ri sangphoo' tho' moo re" cang kaid byid: kaid boem shi.
11 Lhammoo" soem" khyab, kyo: lo" da" thang: ri hau: gagyoo: kang mo da" ngam" yo, lo" khau: nyid da" Alesandru voogung mo yu phara" zoozoem, tang: ga: da" sangphoo' tho' moo yhe: do, zhoung: lho: gu: lo" boem bye:.
12 Ngoonu" gi Surakusa voogung khyoo: ju" yhe: lo" wigi hau: voogung moo soem" nyid" yhe: theung: nyid boem.
13 Hau: voogung mo wigi ngoonu" doem xo' gu: yhe: lo" ri Regi voogung moo ju" yhe: lo" boem bye:. Thang: nyid rigi moug: thang: khyo" lid' hau, lo wigi eig nyid" ein: da" nyid ri she' Potioli voogung khyoo: ju" yhe: lo" boem bye:.
14 Ngoonu" gi hau: voogung moo loem" jeing" bang: dayham" ri yhe: zheung: myang wigi nyangnu" gi ngoonu" ri nyangnu" yo' dage" labain daloem: theung: nyid khoo wa shid re" mho' ago". Hau: thang: ri ngoonu" gi Roma voomoo" khyoo: yhe: lo" boem bye:.
15 Roma voomoo" mo loem" jeing" bang: gi ngoonu" da" khyoo: ri shau" gyo: boem lang" gi Api: ga: da" kid" vang" joyoo ju" sho' we' being" do, yhoem: soem" loem: ga: da" joyoo ju" sho' we' zheung: ju" re" boem wigi ngoonu" ri tau, yu ago, Polu gi nyangnu" ri myang lang" nyangnu" gi Mangso jeju" ri coung" nghei boem lho: nheigloem: yoem: gyi" sho' yo" lo boem bye:.
16 Ngoonu" gi Roma voomoo" khyoo: ju" yhe: boem thang ri Polu rigi zung" da" gyizoo: dayug yo' nyang: kyeing" nyid wa da" akhang" yo".
17 Soem" nyid" kyo: lo" thang: ri Polu gi hau: voogung mo Yuda sayen" vhujhung: yi ri khe: yu da- nyangnu" gi zheung: zeung: rilang" ?Nga" Israela mangnhung" yi we"- ngoo gi ngoonu" da" byumyu" yi ri we' ngoonu" phoug" phyid" yi mo xo' kham: yu lo da" thung: ri joem ri we' shoid vhang: da" moozoo" ri ngoo gi daja" we' akoid nghoid loug we' Yerusalem voomoo" moo ngoo ri thung: lhoung, wigi Roma byu yi da" lo, moo ab, byid: pyam boem ago".
18 Ngoo ri bain ca: yu" boem thang: ri we' ngoo shid: moin: da" yooboo- ce" daja: we' abo ziri myang boem yoomo Roma byu yi gi ngoo ri phoid: kaid nau nyid ago".
19 Nghoid loug we' he: khyoo: ri Yuda byumyu" yi ngeug pyam boem wigi ngoo gi nga" byumyu" yi ri ce" yooboo foin: jang: ajo, loug we' Roma khosen" pho jhang khyoo: ngoo ri lhid: to' kaid ge" ein: mho' ca" byug bye:.
20 Houg: yoomo ngoo gi nanu" yo' shau" doem goo" wa shid mo khe: yu zi nghoid. Gyeing" nyang: ga: rigi ngoo hidsu" jang coo" doem wigi tei" zi dashau" rigi Israela byumyu" yi myid byu nyid su: gang mo nghoid da- ga: tid.
21 Houg: lang" nyangnu" gi ngoonu" gi re" da" khyoo: yo' sen: lho: Yuda mung" mo lhid" foin: da" mougsoug" dakhyab, khyalhang" we' ashau" yu. Hau: lho: houg: mo da" byu yi ju" re" wigi re" khyoo: yo' sen: da" ludang: age zi hang" we' are" tid kyoo" nghoid ago".
22 Khasu" wim gari nang bo da" phung: ri khyi khang" moo mungbyu yi ngeug thoug shang" nyid ziri ngoonu" se. Nghoid loug we' nang myid khyoo: ri ngoonu" we' tam" gyoo: nau- ga: tid ago".
23 Houg: yoomo nyangnu" gi Polu yo' bidnyid deing go" ci: ago". Deing go" to" da" bidnyid moo Polu nyid da" joyoo moo byu myoo" sho' zeung: ju" re" boem ago". Polu gi nab, kyoo mo zi mougcoid sho' Mangso mungdain yo' sen: da" mungdang: joem nyangnu" ri phoid: sho' kyo" wigi Moshe tarha" yo' Lapi: yi da" jhoem: mungdang: ri gung: nhi" kaid lho: Yesu ri nyangnu" gi loem" jeing" loo sho' kho" kyo".
24 Nyang: nu" mo dayham" bang: gi Polu tid ziri loem" jeing" lo boem nghoid loug we' dayham" bang: gi aloem" jeing" boem nghoid ago".
25 Houg: yoomo nyang: cang" nyang: aveing" goo" loo: za: thu' lo" nyid boem da" uri Polu doem tid zigi Lapi: Esaia nhoid khyo" gyeungshang: da" Venyi: wigi nyangnu" da" phoug" phyid" yi ri tid da" dang: gi gye" nyang: jo, da" dang: nghoid.
26 Nyang: tid da" khyoo: gi
Nang gi hau" mungbyu yi jhang khyoo: yhe: tid we.
Nanu" gi tam" gyoo: nghoid loug we' ase' gyoo: goo" wa
Nanu" gi yu" nghoid loug we' amyang goo" wa.
27 Khasu" wim gari- he: da" byumyu" yi da" nheigloem: gi
nheig coid' coid' jo, boem zi nghoid nyid wigi
nyangnu" da" nookhyab' joem gi jhed' yoin" to" boem ziyo'
Nyangnu" da" myo, jid" joem gi coem" ci: boem yoomo nghoid.
Hougsu" anghoid boem rigi nyangnu" myojid" joem gi myang lho:
nyangnu" da" nookhyab' joem gi shau" gyo: wigi
Nyangnu" da" nheigloem: moo se' gyo: yu boem lho:
Nyangnu" gi nga" shoid khyoo: phoug lo boem wa nghoid- ga: Mangsoo tid nyid.
Houg: lang" ngoo gi nyangnu" ri ze: gi byid: wa"- ga: nyang: tid nyid.
28 Houg: lang" Polu gi dang: thang khyo" ( Dang: thang khyo" Polu gi) Hau: Mangso da" khyoid khyi: yu da" mungdang: ri tungbau byumyu" yi khyoo: byid: pyam lho: wigi nyangnu" gi hau: da" mungdang: ri tam" gyo: yu lo" boem wa khyoo: ri nanu" se' too" ge"- ga: tid kaid bye:.
29 Ngoo gi tarha" shoid lho: shid: moin: da" yooboo yoo" su: nghoid ri gi loid byoin wa shid re" ngoo amho' wa nghoid loug we' nanu" ngoo ri yooboo foin: nyid da" khyoo: gi adeung amain" khyoo: nghoid ziri nyangnu" da" lo, moo ngoo ri hang" we' ayo" ab, byid: nghoid ago"- ngoo ri khosen" pho da" shidkhoin" khyoo: lid to' kaid wa ziri ngoo mho' nau- ga: tid.
30 Polu gi eig zain' loem: lei:- nyang: ngho" to" da" yhoem: moo nyid nyid lho: nya: jhang ri" bang: ri being" lhoem: tau, yu nyid.
31 Nyang: gi Mangso mungdain khyoo: ri kho" kyo" nyid ziyo' Aseing Yesu da" khyoo: ri agyug avoem,- ciri we' alung" loo: za: jhau" byid: nyid.