1 Ngoonu" ri Itali mung" khyoo: gyid sangphoo' khyo" re" de" kaid wa shid mo bain myid phyid lang" Polu yo' thung: byu dayham" ri Khosen" pho gyidab, ga: da- Roma gyidab, daloem: mo gyizoug: phoo' Yuli ga: su: lo, khyo" wigi nyangnu" ri ab, byid: kaid. 2 Ngoonu" gi Asia mung" thoem" yam, gukhuang" khyo" gu: yhe: loo" wa soin' nyid boem- Adramuti mo gyid sangphoo' tho' moo yhe: do, zhoung lho: gu: yhe: lo" boem bye:. Thesaloni voogung mo Makedoni byu- Aristaku gi ngoonu" yo' dage" bo cang re. 3 Hau: thang: nyid ri ngoonu" gi Sidon voogung khyoo: ju" yhe: lo" boem bye:. Gyizoug: phoo' Yuli gi Polu ri nheig yu" khyeug wigi Nya: da" bidnoem byencang" yi jhang khyoo: yhe: shau" goo" nhang: lho: Nyang: moo ca" yo, da" khyoo: dangain" ziri yu" cung: wa da" akhang" byid:. 4 Ngoonu" gi houg: mo doem to' lo" ri lid' agi yoomo Kupru gagyoo: kang lid' yo" jang" khyoo: gu: yhe: lo" boem bye:. 5 Kiliki yo' Pamphuli mung" tu, tab'- pang lid thoem" ri gu: phyed yhe: lo" wigi Luki mung" mo Mara voogung moo ju" yhe: lo" boem bye:. 6 Gyizoug: phoo' gi hau: voogung moo Itali mung" khyo" yhe: loo" wa da" Alesandru voogung mo gyid sangphoo' ri yhe: myang wigi nyang: gi ngoonu" ri hau: sangphoo' tho' moo do, zhung: nhang. 7 Ngoonu" gi myoo" sho' nyid" yen, yen, za: gu: yhe: lo" lho: gye" yau: khe" khyoo: joem ri thoung" shau" ziyo' lo" thang moo gi Kidu voogung tu, tab' khyoo: ju" yhe: lo" boem bye:. Lid' agi yoomo shid khyoo: ayo" xo' gu: loo" loo: wigi ngoonu" gi Salmon gyid koin: khyo" gu: phyed yhe: lho: Kreti gagyoo: kang goo, jo, jang" khyo" gu: yhe: lo" boem bye:. 8 Gagyoo: kang gyid yam, tab' khyo" gu: yhe: lo" wigi yau: khe" khyoo: gye" shau" ziyo' Lasea voogung yo' atoung" vi: go" da" Gau: da" gu: khuang" ga: da" joyoo khyoo: ju" yhe: lo boem bye:. 9 Ngoonu" gi hau: joyoo moo myo" sho' nyid" theung: nyid lho: yooboo khyoid da" xoin" to' pui" bidnyid lid lo" byug bye: yoomo gyid sangphoo' khyo" gyung: xo' soo" wa shid re- gyug ca" da" ayo, ju" loo bye:- Houg: yoomo Polu gi ngoonu" ri Ludaid' sayen" yi we"- ngoonu" gi he: joyoo mo 10 Xo' gu: yhe: lo" rigi gyug ca" wim bye: myang- gyid sangphoo' yo' kid" xoin: joem soem" lo" byug ziyo' ngoonu" da" kangso' joem lang" joem: lo" byug wa da" khyoo: ri ngoo myang bye: ga: phajhi" byid: tid poin" bye:. 11 Nghoid loug we' gyizoug: phoo' gi Polu tid da" tho' moo Gyid sangphoo' khang" su: yo' sangphoo' yhoem: seing: tid da" dang: ri je loem" jeing" da. 12 Hau: gu: khuang" gi ngam" yo, lid sho' theung: nyid wa zi agi yoomo byu myoo" sho' gi hau: gu: khuang" mo to' lho: ge bue" nghoid rigi Phonig voogung ju" sho' yoem: kaid gu: yhe: lo" wigi hau: voogung moo ngam" ayo, gu: moo yhe: theung: nyid nau, ago". Phonig gu: khuang" gi Kreti gagyoo: kang moo nghoid wigi bidvang, moug: thang: shoid yo' bidvang, mougzhung: shoid khyoo: myonhoo: shu: to" da" gu: khuang" nghoid nyid.

13 Gyid byeung: shoid khyo" lid jham" hau, loo yoomo gyid sangphoo' khang" mo, gi nyangnu" myid to" ziyo' dakhyoo" ti" yo" koid wa"- ga: zheung: jho: boem yoomo nyangnu" gi joto' nghui" ri she: to' yu boem lho: sangphoo' ri Kreti gagyoo: kang ayam, khyo" cang rigi yo" tab' yhi' mo tab' lho: gu: yhe: boem ago". 14 Nghoid loug we' khamyhang amyang" shi" ri bidthu mougzhung: uglid ga: da" gye" yoem: bo da" uglid moo" gi gagyoo: kang atho' shoid khyo" hau, gyoo" loo bye:. 15 Hau: ug' lid gi gyid sangphoo' ri lo doin: wigi gyid sangphoo' gi uglid ri ayo" thoug shang" loo: yoomo ngoonu" da" yoem: kaid khyoo: ri no: pyam lho: lid' wigi doin: lo" jang" khyoo: bo myu: lo" nyid boem bye:. 16 Koda ga: da" gagyoo: kang gyid byeung: shoid khyoo: myu: lid ju" gyo" lo" nyid boem bye:. Uglid dajhi' tam" loo" lang" gi lid' goo dajhi' yo" yu boem bye:- hau: khyi moo gyid lhid abyo, loo" wa shid re" ayoug: akhi" wim wigi gyid sangphoo' mo kang: khyu: lhid ri abyo, sho' yo" zei: toem to" boem bye:. 17 Nyangnu" gi hau: da" lhid ri sangphoo' tho' khyoo: she: to' yu lho: tei" shoem' joem yo' sangphoo' zeing moo teing za: tei" tab' to" boem. Nyangnu" gi Libya yo' tu, tab' mo da" midcoo: doem: moo gyid sangphoo' lo" thau" zhug too" wa ziri gyoug boem yoomo gyid sangphoo' mo da" pain" ruang: joem ri vhoo: khyoo: khyo' yu lho: lid' doin: lo" jang" khyoo: bo cang myu: lo" ago". 18 Thang: nyid" ri we' lid' daxo' hau' nyid shi" yoomo nyangnu" gi sangphoo' tho' mo lid: da" jonu" joem dayham" ri thoid' khyo pyam boem ago". 19 Hau: lho: hau" thang: nyid" ri nyangnu" gi gyid sangphoo' yo' sen: da" ziyoo joem ri we' thoid' khyo pyam boem ago". 20 Ngoonu" gi myoo" sho' nyid"- bid kyi: joem ri ashau" myang boem' loo- uglid gi gye" thain: khyo" dahau' nyid shi"- Houg: su" lo thang moo ngoonu" gi kangso' loid' byoin, loo" wa da" khyoo: ri myed abyu lo: boem. 21 Gyid sangphoo' moo zhung: bang: gi zoo: noem azoo: loo: myoo" sho' nyid" lid lo" boem thang: ri Polu gi nyangnu" da" shidkhoin" moo to' yab, lho: Ludaid' sayen" yi we"- nanu" nga" da" dang: ri tam" gyo: lho: Kreti gagyoo: kang khyo" agu: lo" boem nghoid yoomo ngoonu" gi hid: su" soem" lo" boem ziyo' byo, soem" zi shau" boem wa anghoid. 22 Nghoid loug we' nheig angi, goo"- nanu" hang" dayug we' kangso' asoem" goo" wa gyid sangphoo' za: date: soem" lo" byug wa. 23 Khasu" wim gari Ngoo noku nyid da" nga" Aseing- moug: lagyoo: dayug gi amain nga" jhang moo ju" re" lho: 24 Polu we" agyug nang gi Khosen" pho shidkhoin" moo shau" yab, jo, wa zi nghoid- Mangsoo gi nang ri nheig khyeug gi koid nyid su: nghoid wigi nang yo' dage" gyid sangphoo' zhoung: lo nyid mo, ri kangso' loid byoin, loo" nhang: wa"- ga: tid da. 25 Houg: yoomo Ludaid' sayen" yi we"- nheig angi, goo"- Khasu" wim gari ngoo ri re" tid to" ziyo' dakhyoo" ti" bue" loo wa zi nghoid ein: ngoo gi Mangsoo ri loemkhau: nyid. 26 Nghoid loug we' ngoonu" da" gyid sangphoo' gi gagyoo: kang daloem: loem: moo lo" shau" ke" too" wa zi nghoid. 27 Daxe: myed: myen, ein: da" myen" rigi ngoonu" da" gyid sangphoo' gi Medi panglai: thoem" tho' moo gu' lid' doin: lo" shoid khyoo: bo cang myu: yen" da. Myen" gamgung myen: koo: moo ngoonu" gi gyid yam, joyoo daloem: moo tab' lo" kyi, ga: gyi sangphoo' khang" mo, gi shau" myed nyid. 28 Houg: yoomo nyangnu" gyid' ri ke' yu" uri 120 pe: koo: no, ziri yo" se' boem bye:. Hau: thang: daso' ri doem ke yu" boem uri pe: 90 za: date: no, lo: ziri yo" se' yu ago". 29 Nyangnu" gi lug zeing yo' gyid sangphoo' lo" thung" goo" ziri ci' boem yoomo gyid sangphoo' thang: mo da" joto' nghui" myed: loem: ri zheung: khyo' kaid boem lho: myo, phyed myang loo: baja" ga: akyu" mho' ago". 30 Hau: thang: ri sangphoo' mo moo" zei: mo, gi gyid sangphoo' mo lhid nu" ri yen, zoo: she: khyo' kaid boem lho: gyid sangphoo' shid mo da" jo to' nghui" dayham" ri she: khyo' kaid lho: nyangnu" gi gyid sangphoo' mo phang: loid' loo" wa ga: soin' nyid ago". 31 Nghoid loug we' Polu gi gyizoug: phoo' yo' gyizoo: yi ri hau: gyid sangphoo' mo moo" zei: bang: gi gyid sangphoo' tho' moo azheung: nyid to" boem loo: lang" gi Nanu" da" kangso' loid byoin loo" wa zi cilang" nyid cang aboo loo- ga: tid. 32 Houg: yoomo gyizoo: yi gi lhid nu" joem tei" to" da" tei" joem ri zhaid' phyed pyam boem lho: lhid nu" joem ri myhu" kaid boem ago". 33 Myo, myang yid' ri Polu gi nyangnu" dangain" bang: ri zoo: noem zo: boem wa shid re" tid bye:. Nyangnu" gi ce" zoo: noem shug noem we' azoo: ashug loo: lang" nyid boem zigi akhid" nyid" ju" ri daxe: myed: nyid" nyang: nghoid lo" byug bye:. 34 Houg: su" nghoid yoomo nanu" da" kangso' zheung: yo" dei nyid boem wa shid mo zoo: noem daja: ri zoo: ge'- nanu" da" vhudi mo xam: dakhaid lang" byug wa zi anghoid- ga: tid. 35 He: da" dang: ri bain tid lang" Polu gi zooyho' dayham" ri phe' yu lho: nyangnu" dangain" bang: da" shidkhoin" moo Mangso Jeju" ri coung" nghei lho: zo da. 36 Houg: lang" nyangnu" dangain" mo, gi yoem: yo" yu wigi nyangnu" yug khang" moo" we' zoo: noem bo zo: lo ago". 37 Gyid sangphoo' mo da" byu yi dangain" bang: gi eig sho: nyhed' xe: khyug yug nghoid. 38 Nyangnu" yug khang" moo" bain zo: gyi: thang: ri gyid sangphoo' soem" loo" wa shid re" nyangnu" da" sungsoo: cen: thung: joem dangain" ziri panglai: gyid thoem" moo de" khyo pyam boem ago".

39 Moug: bo" myo, myang loo lang" gi gyid sangphoo' ku" mo, gi nyangnu" kha: khyi moo ju" nyid bye: ziri asi nghoid ago". Nghoid loug we' nyangnu" gi mid' doem: daloem: ri shau" myang boem wigi ge bue" nghoid rigi hau" joyoo khyoo: sangphoo' gu: dab yhi: wa shid re" yoem: gye" kaid nyid boem ago". 40 Houg: yoomo ngoonu" gi joto' nghui" ri panglai: khoug: khyoo: zhaid' phyed khyo' kaid lho: wigi hau: u" nyang: nyhab, cam" tei" ri we' phoid: pyam ago". Hau: thang: ri nyangnu" gi sangphoo shidvhu" mo pain" ruang: joem ri we' tu: khyo' kaid boem wigi panglai: boug jhoin: midcoo: doem: khyoo: khang" lo" ago". 41 Nghoid loug we' sangphoo' gi midcoo: doem: moo lo" thau" zhoug to". Sangphoo vhuloem ayo" dei, lo: ziyo' sangphoo' thang: moo gi gyid beingmhoid' joem lo baid nyid yoomo adu atoem byo, sain" loo" bye:. 42 Houg: lang" gyizoo: yi gi thung: byu yi gi gyid shab shab lho: phang: loid lo" boem wa ziri seing" kho" boem yoomo thung: byu yi dangain" ziri said pyam wa ga: soin' lo boem ago". 43 Nghoid loug we' gyizoug: phoo' gi Polu ri khyoid yu nau, wigi Nya: gyizoo: yi ri houg: su" akoid wa shid mo toem pyam da.

Houg: yoomo gyizoug: phoo' gi gyid shab se' shab bang: ri xangshid" sangphoo' tho' mo byam, gyoo" nhang: lho: panglai: boug jhoin: middeom: khyoo: shab dab loo" nhang: da. 44 Hau: lho: deing shi" da" byu dayham" rigi seig thi" khyam" yo' dayham" rigi sangphoo' byo, da" adu joem moo zei: nhang: lho: shab dab loo" wa shid re" amyeung" byid: kaid. Ngoonu" dangain" mo, gi hau: joyoo khyoo:- houg: su" ci: aca" loo: yo" gu: dab lo" boem bye:.