1 Festu gi hau" mung" moo ju" re" thang: ri soem" nyid" ein: ri nyang: gi Kesare voo mo zi Yerusalem voomoo" khyoo: yhe: lo". 2 Khainjung agyi zeing yi yo' Yuda sayen" vhujhung: yi gi Polu ri yooboo foin: da" khyoo: myoo" sho' ri re" tid kyo" ago". 3 Nyangnu" gi Polu ri khyoolaid' moo gau" said pyam wa ga: phajhi" zheung: khyau" to wigi Polu ri Yerusalem voomoo" khyoo: shu:" ri byid: khyo" nyangnu" ri myonhoo: byid: wa shid mo Festu ri zheung: mho' boem ago". 4 Festu gi nyangnu" ri Polu gi Kesare voogung moo thung: loung" jo, da- ngoo nyang: we' atoung" myang" ri houg: khyoo: doem tau" loo wa zi nghoid. 5 Hougsu" nghoid yoomo nanu" vhujhung: koid bang: gi ngoo yo' dage' cang re" lho: Polu nyang: daja: ja: shoid bye: nghoid rigi nyang: ri yooboo re" foin: goo" baja"- ga: tid. 6 Festu gi nyang: nu yo' dage" za: bidnyid shed' nyid"- daxi: nyid" koo: su" theung: nyid lho: Kesare voogung khyoo: doem lo. Hau: thang: nyid" ri nyang: gi dang: phyed da" tarha" yung" moo zhoung: jo, lho: Polu ri shu" vang loo wa da" amyeung" byid: kaid. 7 Polu ju" vang loo lang" gi Yerusalem voomoo" mo ju" re" da" Yuda byumyu" yi gi Polu ri khyam lheung' ci: lho: wigi nyangnu" ce" sagsi we' ayo" toin" shid da- yooboo myo" sho' ja: ri foin: to" ago". 8 Nghoid loug we' Polu gi ?Ngoo gi Yuda byumyu" yi da" atarha" ziri we' Mangso jhoem: mungdang: ri we' Roma Khosen" ri we' shoid vhang: da" yooboo gi ngoo daja: we' akoid? ga: wigi nya: da" gung ri tid yu da. 9 Festu gi Yuda byumyu" moo myonhoo: shoo: noug yoomo Nyang: Polu ri tid zigi Nang gi Yerusalem voomoo" khyoo: lo" wigi nga" shidkhoin" moo yooboo foin: da" he: khyoo: joem ri myid: ca: yu" nau, la"? ga: myid: da:. 10 Houg: lang" Polu gi ngoo gi ngoo ri dang: phyed eung: da" Khosen" pho da" yung" moo yab, jo, bye:- nanyang: voin: tang: si' bye: ziyo' dakhyoo" ti" ngoo gi Yuda byumyu" yi ri ce" yooboo we' ashoid yu". 11 Ngoo gi tarha" shoid lho: shid: moin: da" yooboo yoo" su: nghoid rigi loid byoin wa shid re" ngoo amho' wa nghoid loug we' nanu" ngoo ri yooboo foin: nyid da" khyoo: gi adeung amain" khyoo: nghoid ziri nyangnu" da" lo, khyoo: ngoo ri hang" we' ayo" ab, byid: nghoid ago". Ngoo ri khosen" pho da" shidkhoin" khyoo: lid: to' kaid wa ziri ngoo mho' nau? ga: tid. 12 Houg: lang" Festu gi nya: da" phajhi" byid: sayen" yi yo' bain sham: go" boem lho: wigi nang: Khosen" pho jhang khyoo: lhid: to' kaid wa shid re" mho' bye: ziyo' dakhyoo" ti" Khosen" pho jhang khyoo: nang yhi: ca" wa"- ga: phoug tu".

13 Dayo, koo: kyo: lo" thang: ri Khokham" Agripa yo' Bernike eig yug gi mung" zoug: phoo' Festu ri being" se' tau, yu wa shid re" Kesare voogung khyoo: lam" ju" yhe: ago". 14 Hau: voogung moo nyangnu" gi myoo" sho' nyid" zheung: nyid thang: ri Festu gi Polu khyoo: yo' sen: lho: wigi Khokham" phoo' ri tid kyo" da. Festu gi Khokham" phoo' ri Hid: moo Philib' wigi thung: lhoung, too" khare" da" thung: byu dayug nyid. 15 Ngoo Yerusalem voomoo" khyoo: ju" yhe: uri Yuda khainjung agyi moo" yi yo' Ludaid' vhujhung: yi gi nyang: ri yooboo foin: lho: nyang: ri dang: phyed byid: wa shid re" ngoo ri mho' ago". 16 Nghoid loug we' ngoo gi nyangnu" ri yooboo foin: zi shau" su: gi nyang: ri yooboo foin: bang: yo' myonhoo: zoem" zhoung: to" lho: nyangnu" yooboo foin: da" khyoo: yo' sen: wigi nya: gung ri tid khoem yu wa da" akhang" shi" abyid: loo- hang" nghoid loug we' yooboo yo" ein: ab, byid: kaid wa shid re" ngoonu" da" Roma thung" tarha" moo aboo ein: tid khoo bye:. 17 Houg: su" nyangnu" gi voogung moo ju" re" boem ri ngoo gi ayo, aze" pain' loo: za: thang: nyid" ri nyang- tarha" dang: phyed byid: da" yung" moo zhoung: jo, lho: hau: yug ri khe: shu" vang loo" wa da" amyeung" ri byid: kaid bye:. 18 Nyang: ri yooboo koid: mo, gi to' yab, lho: wigi yooboo foin: ago". Yooboo daja: we' nyang: ri azug, nghoid ago". 19 Nyangnu" gi nyangnu" da" noku thung" yo' sen: lho: wigi shid: byug bye: da" Yesu ga: yug yo' sen: ziza:- nyang: yo' tid ngeug go" nyid ago". 20 Ngoo gi he: da" moozoo" yo' sen: lho: bue" lo da" khyoo: ri khasu" yo" se' yu wa da" khyoo: ri ayo" myid phyed yoomo ngoo gi Polu ri Yerusalem voomoo" khyoo: yhe: lho: houg: su" yooboo foin: da" khyoo: ri myid: ca: yu" ziri yhe: kham: yu nau, la" ein: nyang: ri myed: bye:. 21 Nghoid sho' loug we' Polu gi Khosen" pho jhang khyoo: lhid: to' kaid byid: wa shid re" mho' da- nyang: rigi houg: su" shi" lhoung to" lho: Khosen" phoo' gi nyang: ri dang: phyed byid: baja" ga: mho'. Houg: yoomo nyang: ri Khosen" pho jhang khyoo: de" kaid da" ayo, ju" sho' thung: lhoung, too" wa shid re" ngoo amyeung" byid: to" ga: tid. 22 Houg: lang" Agripa gi Festu ri hau: yug dang: ngoo nyang: we' tam" gyoo: nau, ga: tid. Festu gi nang nab, kyoo, nya: da" dang: ri shoug" gyoo: wa ga: tid. 23 Thang: nyid" ri Khokham" Agripa yo' Bernike eig yug gi gye" reung: da" aved' asam" khyo" gyizoo: yi- voogung mo vhujhung: sayen" yi yo' dage" za: shava byu yi phoung, nyid da" yhoem: moo" khoug: moo vang lo ago". Hau: lho: Festu gi amyeung" byid: kaid lang" Polu ri shu" vang lo ago". 24 Houg: lang" Festu gi Khokham" Agripa yo' He: khyi moo phoung, nyid mo, dangain" bang: we"- Yerusalem voomoo" yo' hid: mo da" Yuda byumyu" yi dangain" mo, yooboo foin: lho: ngoo ri kau: too" su: gi nanu" myang da" he: yug nghoid bye: ga: tid. Houg: lang" nyangnu" gi nyang: ri gi adei nyhid: too" gi aeung: loo? ga: yoid, nyho: lo ago". 25 Nghoid loug we' nyang: gi shid: moin: da" yooboo ce: noem koid shoid lo ziri we' ngoo gi amyang. Houg: yoomo nyang: rigi Khosen" pho jhang khyoo: de" to' kaid byid: wa da" shid re" mho' zi nghoid yoomo ngoo gi nyang: ri de" kaid wa zi myid phyed to". 26 Nghoid loug we' ngoo gi Roma Khosen" phoo' ri nya: da" moo" yo' sen: lho: wigi goolhoo' za: mougsoug" lhid" lho: wigi sho' kyoo" wa da" khyoo: gi ci aboo. Houg: yoomo ngoo gi nanu" da" shidkhoin" moo shu" vang loo nhang: zi nghoid. Nyang: ri Khosen" phoo' bain myid: ca: yu" lang" gi Ngoo gi Khosen" pho jhang mougsoug" lhid" foin: kaid wa khyoo:- dakhoin" dayoo: yoo" wa shid re" 27 Je" wigi Khokham" Agripa shidkhoin" moo shu" lo" zi nghoid. Khasu" wim gari thung: byu dayug ri de" kaid nghoid rigi nyang: ri yooboo foin: da" khyoo: jhung za: lhid" lho: atoin" shid kaid rigi khyoo" ajang wa zi nghoid? ein: ngoo jho: nyid ga: tid.