10
Kesare voogung mo ?Itali dab? ga: da" Roma gyidab, dadab ri vhoeb da" gyizoug: phoo' Koneli ga: su: dayug nyid. Nyang: gi Mangso khyoo: ri kang: lung' bu, su: nghoid wigi nyang: yo' nya: ekoin deungkhu: byu yi dangain" mo, gi Mangsoo ri Noku nyid ago". Nyang: gi sho" jhen: da" Yuda byu yi ri myoo" sho' pang" thoug byid: wigi Mangsoo ri beung: abyid akyu" mho' nyid su: nghoid. Danyid" mo da" myenthang: soem" nayi: koo: moo Mangso moug: lagyoo: dayug gi nya: jhang moo ju" re" lho: ?Koneli we"? ga: re" yoid ziri yoeb, myang moo bang bang za: shau" myang kaid. Nyang: gi gyoug ziyo' moug: lagyoo: ri yu" zhug to" lho: ?Aseing we" ce: noem lha"? ga: myed: moug: lagyoo: nyang: ri ?Mangsoo gi re" da" akyu" mho' thui: yo' re" alu jhungshug ri, ngei yoomo tu" byid: wa zi jen" jen" nghoid bye:-
Houg: yoomo akhid" Yopa voogung khyoo: byu nhang: kaid lho: Simun Petru ga: su: ri yhe: khe: shu" loo nhang: we'.
Nyang: gi panglai: gyid yam, mo shoo" yid' moo" zei: su: Simun ga: su: yhoem: moo theung: nyid da? ga: tid.
Hau: moug: lagyoo: lo" byug thang: ri Koneli gi nya: yhoem: mo deizoo: eig yug yo' Mangso khyoo: ri kang: lung' bu nyid da- Nya: gung jung" gyizoo: dayug ri khe: yu lho: Bue" lid loo bye: da" khyoo: dangain" ri nyangnu" ri tid kyo" lho: nyangnu" ri Yopa voogung khyoo: zheung: nhang: kaid.
Hau: thang: nyid" moo nyangnu" yhe: lo" wigi Yopa vooyam, moo ju yhe: lo" nyid boem bye:. Bid gung tu: ri" yo, moo Petru gi akyu" mho' wa shid mo yhoem: atho' pyam: khyoo: do, lo.
10 Nyang: zooyoid loo yoomo zoo: noem zoo: nau, lo da. Zoo: noem soin nyid da" uri nyang: gi yoeb myang daja: ri myang bye:. 11 Hau: da" yoeb, myang gi mougkhung: bang" lo" wigi myed: khyoug: goin" jang" moo zei: ci: da" mi yo' du da ja: ri myidjang tho' khyoo: yhoin" khyo' kaid ziri nyang: myang.
12 Hau: akhoug: moo myed: khyid: dab da- gougnyhoug acang: joeb, sho' do: yu: yen" da" gougnyhoug ja: yo' siyoo mo ngho' zoo: yen" zoo: acang: joeb, sho' bo nyid. 13 Houg: lang" Petru gi to' lho: said zoo: we' ga: da" thui: da thui: ri shoug" gyoo: bye:.
14 Nghoid loug we' Petru tid zigi Aseing we" hau: zigi dajhi we' age bui" nghoid da- houg: yhang: te" aco' ajhoid' ja: ri ngoo khanham we' alhoung: zoo: ga: phoug tid.
15 Doem phoug tid lo da" thui: gi Mangsoo gyeungshang: ga: ziri nang agyeungshang: ein: asoin: yu, ga: doem tid.
16 Soem" lheung: ju" sho' houg: su" bue" nyid lho: thang: rigi hau: ziri mougkhung: khyoo: doem to' yu pyam bye:.
17 Petru gi he: da" yoeb, myang ri myid mau" nyid shi" uri Koneli wigi nhang: kaid da" byu yi gi Simun da" yhoem: ri sho: myid: yu" lho: nyangnu" gi yhoem: pain' khoem" moo" duang: moo re" yab, jo, boem bye:.
18 Nyangnu" tid zigi Simun Petru ga: da" being: voo dayug anyid la"? ga: myid: ago".
19 Petru gi hau: da" yoeb, myang yo' sen: wigi damyid yu" nyid shi" uri gyeungshang: da" Venyi: gi nyang: ri yu" we' hid: moo byu soem" yug gi nang ri sho: nyid boem ago".
20 Nyangnu" yo' shau" goo" wa soin' nyheung lho: gyoo" loo" we' khasu" wim gari ngo wigi nhang: kaid zi nghoid yoomo ug vho" zi aboo loo: za: nyangnu" thang: moo cang yhi: we' ga: tid. 21 Houg: yoomo Petru gi gyoo" lo wigi nyangnu" ri nanu" sho: nyid su: gi ngoo nghoid- nanu" cikoid ju" ri" go" ga: myed.
22 Nyang: ri" tid zigi ngoonu" ri gyizoug: phoo' Koneli wigi nhang: kaid zi nghoid, nyang: gi byugi dayug nghoid lho: wigi Mangsoo ri coung" nghei nyid su: dayug we' nghoid ziyo' Yuda byu yi dangain" mo, coem phau" myang: nyid su: nghoid. Re" da" mungdang: ri nyang: shau" tam" gyo: yu wa shid re- moug: lagyoo: dayug gi Nang ri nya: yhoem: khyoo: khe: yu wa shid re" nyang: re" tid bye:. 23 Houg: lang" Petru gi nyang: ri khe: yu lho: hau: myen, yhoeb wa shid mo nyangnu" ri lhoung: to". Thang: nyid" ri Petru gi to' wigi nyangnu" yo' dage" cang yhe. Yopa voo moo nyid da" loem" jeing" bang: dayham" we' Petru yo' dage" cang yhe: lo" boem.
24 Hau: thang: nyid" moo Koneli gi kesare voogung moo nya: byumyu" mangnhung" bidnoem yi yo' nyang: khe: to" da" bidnoem yi yo' dage" Petru ri lang" nyid boem ago". 25 Petru ju" vang loo lang" Koneli gi nyang: ri yhe: tau, yu lho: Petru da" khyid: yang: moo goeb gyo" lo" wigi nyang: ri pid.
26 Nghoid loug we' Petru gi to' yab, we' ngoo we' byu za: danghoid- ga: tid lho: nyang: ri she: to' kaid.
27 Petru yo' Koneli gi doem go" zoore yhoem: khoug: khyoo: vang lo" boem ri yhoem: khoug: moo mungbyu yi myoo" sho' zeung: foem: nyid ziri Petru lo" myang. 28 Petru nyangnu" ri tid zigi Yuda byu dayug gi tungbau byu yi yo' age zoem" goo"- dage" age nyid ga: ziri nya: noku thung" khyo" toung: to" zigi nanu" nyang: voin: tang: si' gu nghoid bye:. Nghoid loug we' hang" ri nghoid loug we' Noku thung" khyo" agyeungshang: yung" alhoo, ein: wigi hang" ri we' ngoo age myed lo: khyoo: ri Mangsoo gi ngoo ri toin" shid too" bye:. 29 Hougsu" wigi Nang ngoo ri khi: nhang: kaid da" uri ngoo gi ci" we' ahi: loo: za: cang ri" bye:- Houg: yoomo nang ngoo ri khi: nhang: kaid da" khyoo: ri akhid" tid kyoo" we' ga: tid.
30 Houg: lang" Koneli gi lid lo" da" soem" nyid" koo: moo myenthang: soem" nayi: yo, ri ngoo gi yhoem: khoug: moo akyu" mho' nyid uri nyid' dain' tung" lo, lo, bang da" byimi, void, ci: da" byu dayug gi nga" shid moo re" yab, jo, lho: 31 Koneli we" re" da" akyu" mho' thui: ri Mangsoo shau" gyo: abye:- Re" da" khoug: loem alu: gam, byid: da" khyoo: ri we' myang abye:. 32 Houg: yoomo Yopa voogung khyoo: byu nhang: kaid lho: wigi Simun Petru ga: su: ri khi: nhang: kaid we. Nyang: gi panglai: gyid yam, mo shooyid' moo" zei: da- Simun ga: su: yhoem: moo being" do, nyid da- ga: ngoo ri tid. 33 Houg: yoomo ngoo gi houg: jang: nyang- re" jhang khyoo: byu nhang: kaid bye:- Nang ju" ri" yoomo gye" goug, bye:. Nyang: nang ri tid nhang: kaid da" mungdang: dangain" ri tam" gyo: yu wa shid mo akhid" ngoonu" dangain" mo, gi Mangso shidkhoin" moo lang" nyid boem- ga: tid kyo".
34 Houg: lang" Petru gi Mangsoo gi yug khang" moo" ri myonhoo: vhuzung' akhyen: loo: za: koid nyid ziri akhid" ngoo gyeing" nyang: si' bye:.
35 Ce: noem byumyu" nghoid sho" loug we' Nyang: ri coung" nghei lho: deingmain" da" khyoo: moo cang loo su: rigi Mangsoo lhoem: kham: yu nyid. 36 Dangain" mo, da" aseing: nghoid- Aseing Yesu Khristu khyo" wigi Israela byumyu" yi ri Mangsoo tid fu" byid: da" ngeipyoo: yug yo ludang: seig nghoid mungdang: ri nanu" nyang: se' abye: go". 37 Yohan gi nya: babtisma mungdang: ri bain kho" kyoo" lang" Galile moug: mo bue" shed" lho: wigi Israela mungdain goin" jang" moo bue" ju" loo" bye: da" khyoo: ri nanu" nyang: si' gu nghoid bye:. 38 Houg: yoomo Nazared mo da" Yesu ri Mangsoo gi gyeungshang: da" Venyi: yo' yoemso khasu" foid, shoin" kaid byid: bye: da" khyoo: ri nanu" si' abye: go". Khasu" wim gari Mangsoo gi nyang: yo' dage" nghoid wigi ge da" moozoo" ri zei: lho: yu, join: yoemso khoug: moo loung" jo, mo, dangain" ri cang ge loo" nhang: yen" bye:. 39 Yerusalem voogung yo' Israela mungdain goin" Yesu koid da" lo, moo" dangain" yo' sen: lho: wigi ngoonu" gi sagsi nghoid nyid. Hau: tho' moo nyangnu" gi Yesu ri pyang" zeing moo jen" said pyam abye: go". 40 Nghoid loug we' soem" nyid" kyo: thang: ri Mangsoo gi nyang: ri shid: bye: jangmo doem dei, to loo nhang: wigi 41 Yug khang" moo" ri anghoid loo: za: sagsi joem ga: Mangso wigi khyen: yu too" mo ngoonu" ri za: toin" shid lho: nyang: doem dei, to' lo thang: ri nyang: yo' dage" zoo: noem shoin" zo: boem bye:.
42 Nyang: gi byu dangain" mo, ri ngeibu: ludang: gi ri kho" kyoo" byid: wa ziyo' Kangso dei nyid shi" mo, yo' shid: loo" bye: mo, ri tarha" dang: phyed wa shid re" Mangso wigi nyheung to" da- tarha" agyi zeing nghoid da" khyoo: ri sagsi kham wa shid mo ngoonu" ri nyang: amyeung" byid: too" bye:. 43 Nyang: ri loem" jeing" bang: yug khang" moo" gi nya: myeing mo amyeung" akhang" khyo" wigi yooboo khyoid pyam byid: zi shau" wa shid re" nya: khyoo: yo' sen: lho: lapi: yi dangain" bang: gi tid boem abye: go" ga: tid.
44 Houg: su" Petru gi dang: da tid nyid shi" ri nya: mungdang: ri tam" gyo: nyid da" byu dangain" mo, atho' moo gyeungshang: da" Venyi: gi ju" gyo" loo bye:.
45 Tungbau byumyu" yi da" atho' moo we' Mangsoo gi nya: gyeungshang: da" Venyi: jhungshug ri foid shoin" kaid: byid: bye: yoomo Yopa voo mo Petru yo' dage" ju" ri" mo, Yuda byumyu" yi mo loem" jeing" mo, gi mau" hang" to" boem ago". 46 Khasu" wim gari nyangnu" gi myeing" aja: ja: kaid wigi Mangso da" gyi: thang phung" yoeb, ri gyisho' coung" nghei byid: nyid ziri nyangnu" shau" gyo: boem yoomo nghoid da. 47 Houg: lang" Petru gi Hid: bang: gi ngoonu" yo' dakhyoo" ti" gyeungshang: Venyi: ri yo" kham: yu boem ago"- Houg: yoomo nyangnu" gi gyid' moo babtisma kham: yu boem wa ziri we' hang" yo" toem too" wa go" lha"? ga: tid thu' kaid da. 48 Houg: yoomo Petru gi nyangnu" ri Yesu Khristu da" myeing khyang" mo wigi babtisma kham: yu boem wa shid re" amyeung" byid: bye:. Hau: thang: ri nyangnu" gi Petru yo' dage" dayo, zoo: theung: nyid wa shid mo mho' ago".