LAGYOO:
MOUGSOUG"
(Acts)
Lagyoo: mougsoug" gi Sara Luka lhid" to" da" ngeibu: lu dang: da" axo' nghoid. Lagyoo: mougsoug" da" myed young, khyoo: ajhung: gi- gyeungshang: da" Venyi: wigi khyooshed' vhu" she: khyo" xangshid" mo Yesu da" thang: cang mo, gi Yerusalem- Yuda moug: goin" yo' Samari moug: goin" mo mougmyid goem: sho' moo Yesu khyoo: ngeibu: ludang: gi ri khasu" tid pyo: kaid da" khyoo: ri tid kyoo" wa, shid mo nghoid. 1:8,
Lagyoo: mougsoug" moo bo da" khyoo: joem gi Yuda byumyu" yi da" akhoug moo shed" da" Khristain yi da dei loeb, khyoo: nghoid wigi xo' lho: mougmyid Xangsu: byu yi dangain" mo, da" loem" jeing" khyoo: bue" lo khyoo: nghoid. He: mougsoug" lhid" su: gi Khristain yi gi Roma kho: sen" da" mung" ri phyo' shoin pyam wa ziri tu: lhoin" bang: anghoid khyoo: ri we' Khristain yi da" loem" jeing" khyoo: gi Yuda noku thung" ri joeb byeung" loo nhang: da- noku thung" nghoid khyoo: ri nya: da" mougsoug" nghab mo, jhug jhug tung" za: se' gyo: loo goo" wa ziri nheig byu: lho: lhid" to" zi nghoid.
Yesu da" khyoo: ngeibu: ludang: gi seig ri tid fu" lo" da" jang" moo Phoung: cang tam' lo" da" joyoo joem gi je" wigi byo rua lo" da" khyoo: ri toin" shid nyid. Lagyoo: lhid" pug ri soem" du ge khyo yu da. Hau: zigi (1) Aseing Yesu Khristu mougkhung: khyoo: do, lo" thang: ri Yerusalem moo loemkhau: khyoo: bue" shed lo khyoo. (2) Palastina moug: mo zi- joyoo khyi khang" moo" khyoo:- (3) Medi panglai: ayam' aqei: mo mungdain joem yo' Roma voomoo" khyoo: ju" lo" jang" moo ju" sho' byo jam: lo" khyoo: nghoid.
Lagyoo: mougsoug" mo yhau: gyen: khyoo: dakhaid gi Pentikoti bidnyid moo Yerusalem voomoo" mo loem" jeing" bang: da" atho' moo yoem moo" so' moo" yo' ju" gyo" lo da- gyeungshang: Venyi: da" moo" zo" khyoo: nghoid. Hau: gyeungshang: da" Venyi: gi Phoung: byu yi yo' phung shu" vhu" mo, ri khyooshed' vhu" she: yoem so' boo nhang: da" khyoo: joem ri lagyoo: lhid" pug mo mhoomyid: joem moo shau" myang nyid. Khristain yi da" xangshid" mo mungdang: akang' ajhung: joem ri shau" myang nyid. He: lagyoo: mougsoug" moo da" tarha" kho" dang: joem ti" leung" khyo" lhid" to". Lagyoo: mougsoug" moo lhid" to" da- bue" lo khyoo: joem gi- loem" jeing" bang: da" kangso' dei da" khyoo: yo' phung: byu yi da" zoem" khau: khyoo: joem moo- he: mungdang: da" yoemso ri toin" shid nyid.
1
1 Jheddab da" Thophilu we' Yesu gi nya: moozoo" zei: shed" da" bidnyid mo wigi nyang: ri mougkhung: khyoo: to' yu" da" bidnyid moo ju" sho- zei: lo ziyo' jhau" byid: lo da" khyoo: dangain"- ngoo xangshid" lhid" kaid jang" moo boo bye:.
2 Yesu gi mougkhung: khyoo: to' yu zi ashoug" shi" uri nya: lagyoo: yi ga: nyang: khyen: yu too" mo, ri nyang: gi gyeungshang: da" Venyi: khyo" wigi pyeing: dang: joem ri byid: too" khari" bye:.
3 Nyang: shid: kham: thang: ri myed: xi: nyid" agyoo: moo nyang: gi myoo" sho' lheung: lagyoo: yi jhang moo nya: gung ri cang toin" shid lho: nyang: gi dadei nyid khyoo: ri loem' ge" da" sagsi myoo" sho' yug ri toin" shid too" bye:.
Lagyoo: yi gi Yesu ri shau myang boem wigi Nyang: gi nyangnu" ri Mangso mungdain khyoo: tid kyo".
4 Nyangnu" gi dage" zeung: lo boem uri Yesu gi lagyoo: yi ri Yerusalem voomoo" mo a thu loo" goo- nanu" ri tid kyo" too" gu nghoid- nga" phoo Mangsoo byid: to" jhungshug ri dalang" nyid ge.
5 Yohan gi gyid yo' babtisma byid: bye:- nghoid loug we' khamyhoo, nyid" akyoo: ri nanu" gi gyeungshang: Venyi: wigi babtisma kham byid: zi shau" goo" wa nghoid.
6 Yesu gi lagyoo: yi yo' dage" zeung: phoung, nyid da" uri nyangnu" gi Yesu ri Aseing we" Israela byumyu" yi ri he: ayo moo hau: mungdain ri doem toug" byid: wa la"? ga: myed: ago".
7 Yesu gi nyangnu" ri ?Nga" pho da" myonhoo: phung" yoeb, yo' mhe' phyed to" da" ayo, ri nanu" gi asi noo"? ga: tid.
8 Nghoid loug we' nanu" da" a tho' moo gyeungshang: Venyi: ju" gyoo" loo lang" gi- nanu" gi yoem vhoo" pyeung byid: zi shau" wigi Yerusalem voomoo" mo zi Yuda moug: goin- Samari moug: yo' mougmyid thang sho' moo nga" sagsi yi bue" loo" goo" wa- ga: tid.
9 Hid: su" ga: bain tid thang: ri lagyoo: yi yu" go" nyid uri nyang- Yesu gi mougkhung: khyoo: to' yu zi shau" bye:- hau: thang: ri jhoem" moug" thei" gi nyang: nu da" myo, shid ti: moonyang: ri nghoeb ci: lho: do, lo" byug bye:.
10 Lagyoo: yi gi Yesu do, lo" nyid uri mougkhung: khyoo: nghang' yu" go" nyid ri byimi phyu: void ci: da" byu eig yug- nyeig dain tung" nyangnu" nam" moo re" yab, kaid lho:
11 Galile byu yi we"- nanu" ciwim wigi mougkhung: khyoo: nghang, yu" nyid go" la". Nanu" shidkhoin" mo mougkhung: khyoo: to' yu shau" da" hau: Yesu gi- mougkhung: khyoo: do, lo" ziri nanu" myang ziyo' dakhyoo" ti- houg: su" nyang: doem gyoo" ri" wa zi nghoid- ga: tid kyo".
12 Hau: thang: ri lagyoo: yi gi Yerusalem voomoo" yo' khyoo: main: agung kho' koo: vi: go" da" zhainloin: boem mo wigi Yerusalem voomoo" khyoo: doem lo" boem.
13 Nyangnu" gi voomoo" khoug: moo vang lo" lho: nyangnu" lhoung nyid da" yhoem: tho' pyam: khyoo: do, lo" ago". Nyangnu" gi Petru Yaku Andre- Philib Thoma Batholume- Mathe Alphe nya: zoo: Yaku myu" jhed nheigloem: gyi: da" Simun yo' Yaku nya: zoo: Yuda zheung: nghoid ago".
14 Nyangnu" gi Yesu nya: myhi' Mari yo" we- goo tu: myi: myi: yi yo" we' Yesu da" nya: no, yo" we' atheing: loo: foem: phoung' akyu" mho' lho: danyid nyid boem.
15 Hau: thang: atoung" myang" ri loem" mo, dasho: eig xi: yug koo- zeung: foem: phoung, nyid boem ago, Houg: lang" Petru gi to' yab, lho: wigi
16 Nga" Mangnhung" yi we Yesu ri myheug mo, ri khyoo: shu" shed su- Yuda yo' sen: lho: wigi gyeungshang: da" Venyi: khyo" David da" nhoid mo tid to" da" jhoem: mungdang: gi zung: loo wa zi nghoid bye:.
17 Khasu" wim ga: ri- Yuda gi ngoonu" yo' dage" moo" zei: wa shid re" khyen: too" su: nghoid yoomo nyang: gi ngoonu" phung: moo boo su: nghoid nyid.
(
18 Nyang: gi akhyeung" lo, moo" khyo" yo" da" ngei wigi myed jang: dacu' qei yu lho: houg: moo byid gyo" shid: pyam bye:. Nya: voemdoug: we' boug dang: lo" wigi u: joem dangain" boug sain" pyam bye ga: tid kyo".
19 Yerusalem voomoo" moo nyid mo, dangain- hau: khyoo: ri shau" gyo: boem bye:- Hougsu" wigi nyangnu" gi hau: nya: da" myed jang: cu' ri nyangnu" da" myeing" khyo" Akeladama ga: myheung to" ago"- Akeladama ga: tid zigi suid" mougmyid ga: zi nghoid.)
20 Khasu" wim ga: ri- Coung" nghei pug moo nya: yhoem: gi yhoem: koem: bue" lo" wigi houg: moo hang" we' anyid loo: goo" baja- ga: we' hau: lho: nya: da" aya: ri we' goo tu: byu dayug yu pyam byid: baja" ga: wigi we' lhid" to- ga: tid.
21-22 Hau: yug gi Yohan babtisma mungdang: kho" kyo" ayo, mo shed" lho: Yesu ngoonu" da" shidkhoin" mo mougkhung: khyoo: shu" do, lo" bidnyid ju" sho' Yesu gi ngoonu" yo' dage" so" yen" da" ayo, bain sho' ngoonu" da" phung: moo boo su: dayug nghoid da-
23 Hougsu" wigi nyangnu" Yustu ga: myeung zoo: we' yoo" su--- Barsaba ga: su: Yoseb yo' Mathia ga: su: mo dayug yug ri doem khyen: yu wa dang: fang kaid ago".
24 Hau: thang: ri nyangnu" akyu" mho' zigi Aseing we" Nang gi yug khang" mo" da" nheigloem: ri sisu: nghoid- Yuda gi nyang: yo' sen: da" joyoo khyoo: yhe: loo" bye:.
25 Too" kho' da" nya: joyoo moo lagyoo: dayug khyo" moo" voin vu, wa shid mo- he: eig yug mo kha: yug ri nang khyen: yu bye: khyoo: ri ngoonu" ri toin" shid byid: we- ga: mho' nyid ago".
26 Houg: lang" nyangnu" gi- hau eig yug mo khyen: yu wa shid re" me" coem kaid ago"- Mathia gi me" ung: yoomo lagyoo: daxe: dayug phung: moo bo kaid loung: yu boem bye:.