2
1 “Efesa khua pawlpi ih vanmi hemah hihi ngan:
Hipawl hi a vorhla kut sungah arsi pasarih a kengtu, sui meitletnak tungpawl pasarih lakih a vak rero tu ih aanmi an ii.
2 “Na rianŽuanpawl, na thaban leh thinsau ih na innak ka tiah hngai. Thilsual-titule cu na in hngai kho lo ti ka tiah; tirhthlahpawl i naloin ii ah a simtia tu le na hniksak hngai ih an hmaanlo ti na hmuh ngah hngai.
3 Thinsaungai in na ing ih ka min ruangah na tuar kau, culeh na thin a deng lo ti khaw ka tiah.
4 Ihmansela hihi tan ralsanmi ka ngei: a pek ih na ngeihmi dawtnak khi na zam ta.
5 Khawnang in na tla timi hi vonmang Žhan; sual rim, culeh a pek ih na thiltimi khi ti hngai. Culocu, tan pha lang khawh na meitletnak tung cu a omnak in ka thawn thok.
6 Ihmansela ti Žhatmi cu na ngei: Nikolas dungzulle ih rianŽuan cu na hua hngai, acucu ka huat ve mi a ii.
7 Naa a ngeitu ahu ni khaw pawlpile hemah Thlarau ni a sim hngaimi hi ngai seh. A neh tupoh cu Pathian paradise sungih nunnak thing vuang awk ka sen thok.
8 “Culeh Smarna pawlpi ih vanmi hemah hihi ngan:
Hipawl hi a peitatleng leh a netatleng, a thita ih a nungŽhan mi ih aanmi an ii.
9 “Na hartuarnak leh na farahnak cu ka tiah (a inain na lian kau). Judahmi an ti tia nain a i lomi, Satan ih sinakok tu a i mipawl ih an tan thangsiatnak cu ka tiah.
10 Na tuar vel thok mi cu hrul hlah. Ralring law, hniksak nan iknak dingah khawsia ni mi hrekkhat cu thawng a tan thla hngai vel thok, culeh ni hra sung har nan tuarin nan ingtem thok. Thih tiang rinsantlak uh la, culeh nunnak sui lukhum ka tan pia hngai thok.
11 Naa a ngeitu ahu ni khaw pawlpile hemah Thlarau ih a sim hngaimi cu ngai seh. A neh tupoh cu thih hnihnak ni harnak a pia hngai thok lo.
12 “Culeh Pergamum khua ah a ommi pawlpi ih vanmi hemah hihi ngan:
Hipawl hi ha-hnih parmi ralreen a ngeitu ih aanmi an ii:
13 “Na omnak hmun, Satan ih a bawi tokheng omnak, cu ka tiah. Ihmansela ka min na tlai Žho, culeh Satan ih omnak hmun, nanmah lakah thah a ita tu, ka mirinsantlak, ka thutiahpitu Antipas ih om lio hman ah ama zumnak cu na pheh ta lo.
14 Ihmansela tan ralsanmi thil tlawmte ka ngei: Israel mipawl ni mepapawl hemih raihrikmi caw aw in, numipami sualkhat dingah an hmaka ah taubahnak sia dingin Balak a zirh tu Balaam ih thuzirhmi a tlaihtia tu mi hrekkhat na ngei hngai.
15 Acutiin nang khaw Nikolas ih zirhnak a tlaihtia tu mi hrekkhat na ngei hngai.
16 Acuruangah, sual rim. Culocu, ihlet hlanah ka tan pha thokih, ka kaa sungih ralreen rum ral ka do hngai thok.
17 Na a ngei tu ahu ni khaw pawlpile hemah Thlarau ih sim hngaimi cu ngai seh. A neh tupoh cu thuhmi mana hrekkhat ka pia thok, cun thauraang pakhat ka pia thok. Culeh thauraang parah cun a cotu simlo ahuhman ih tiah lomi min thar ngan a ii.
18 “Cun, Thiatira khua ih a ommi pawlpi ih vanmi hemah hihi ngan: Hipawl hi Pathian Tiapa, meihlio mang mitpawl a ngei hngai ih, a kepawl daar rawt mang a imi ih aanmi an ii:
19 “Na rianŽuanpawl – na dawtnak, zumnak, mirennak leh thinsau ih na innak – ka tiah hngai. Peitatleng ih na Žuanmipawl vanin netatleng ih na Žuanmi an pipasawn ti ka tiah.
20 Ihmansela hihi tan ralsanmi ka ngei: ka salle numipami sualkhat ding leh mepapawl hlunmi caw aw dingah zirh hngai in a merkaw hngai tu a khi numi Jezebel, amah leh amah profet tiih a ko tia tu khi na in.
21 Sualrim nak ding caan ka pia kau, ihmansela a numipami sualkhat cu a rim cuang lo.
22 Ralring law, amah cu ihkhun parah ka zam thok, cun an thil timi an rim lo ahcun amah rum a sual khat tupawl cu vansanglamnak hnempi sung ah ka zam hngai thok;
23 culeh a tianaupawl cu thi kau ka tal hngai thok. Culeh pawlpi zate ni kei hi ruahnakpawl leh thinlungpawl hlekhlaitu ka ii ih nan rianŽuanpawl ih an cotlakmi mangin ka tan pia hngai vek thok ti an tiah thok.
24 Ihmansela, Thiatira khua ah hi zirhnak tlaihtia loin, mi hrekkhat ni ‘Satan ih athukmi thuthuppawl,’ tiah an kawh mi zirngah loin ataang rih mipawl nan parah, phurhrit pace ituhman ka suang lo;
25 nan ngeih mi zong belte ka phat tiang tlai Žho uh, tiah ka tan ti hngai.
26-28 A neh tupoh hemah leh a net tiang ka rianpawl a Žuan peh tupoh hemah,
kei khaw ka Pa hemin
thungeihnak ka co mangin
miphunpawl parah,
phalei ampawl khuaizan
an ik mangin,
thir teileng rum uk dingah,
thungeihnak ka pia hngai thok.
A neh tu cu deirel arsi khaw
ka pia thok.
29 Naa a ngeitu ahu ni khaw pawlpile hemah Thlarau ih sim hngai mi cu ngai seh.