19
1 Ahi hnukah vancung ahkhin mirual pi ih aw dak mang a timi ni,
“Hallelujah! Runnak leh sunparnak leh
huham cu kan Pathian ta an ii,
2 icatile a thuŽhenpawl cu
an hmaanih an ding;
a misualpinak rum vulei
a siatsuahtu a nasami
numizuartia cu thu a Žhen rom,
cun a salle ih thisan cu
amah nu parah
phu a lam rom,”
a timi ka za.
3 Voikhat la,
“Hallelujah!
Amah nu hem in meikhu cu
kumkhua in kumkhua a tho,”
tiah an ti.
4 Culeh upale kulhluan-li leh thilnungle pali cu an pokih toŽhiang parih a to tu Pathian biain,
“Amen. Hallelujah,”
tiah an ti.
5 Culeh toŽhiang in aw pakhat a suakih,
“Kan Pathian cu thangŽhat uh,
nangmi a salle nan zate,
cun amah a Žihzah tu
a hnem a tiin nan zate in,”
tiah a ti.
6 Cutikah mirualpi aw mang a timi, ti tampi aw mang leh khuari tiakpi aw mang a imi ni,
“Hallelujah!
Icatile kan Bawipa Pathian
Zongzatikho ni a uk.
7 Lungawi in thanuam le hu,
culeh amah hi sunparnak
pia le hu,
icatile Tusuan ih nupitnak
a pha rom ih, mo khaw
a tuahtimtia rom;
8 a tle ih a thianghlimmi
sianglaraang puan mawi in
thuamtia dingah amah
piak a i rom,”
tiah a au ka za.
Icatile sianglaraang puan mawi cu mithiangpawl ih a dingfelmi thiltimipawl a ii.
9 Culeh vanmi ni, “Hihi ngan: Tusuan ih nupitnak puai zanriah sawm a i mipawl cu mi thluasuak an ii,” tiah a ma ti. Cun, “Hipawl hi Pathian ih ahmaanmi aankapawl an ii,” tiah a ma ti.
10 Cutikah a ke hramah bokin biak ka khaitia, ihmansela, “Acucu na ti awk a i lo! Kei cu na sal ikpi leh Jesuh ih simphuanmi a tlaihtia tu na hawipile lakih pakhat ka ii. Pathian tu bia! Icatile Jesuh ih simphuanmi hi profet thusimnak thawkhumtu a ii,” tiah a ma ti.
11 Cutikah vancung hongtia in ka hmu, culeh sai raang pakhat a om. A citiatu cu Zumtlak leh Ahmanmi tiih kawh a ii, culeh dingfelnak in thu a Žhenih ral a do.
12 A mit cu mei alh mang an ii, ih a lu parah bawilukhum tlungpi an om; culeh amah simlo ahuhman ih tiah lomi min nganmi a ngei.
13 Thisan sungih hnimmi angkitual a khawhtia ih a min cu Pathian ih Thu ti a ii.
14 Culeh van ralkappawl, a raang ih a thianghlimmi sianglaraang puan mawi a sin tu - pawl ni sai raang citia in an zul.
15 A kaa sung in miphunpawl vat hngai dingah a parmi ralreen a suakih, thiir teileng in a uk hngai thok; Pathian Zongzatikho ih thinsiat hehharnak sabit rialnak cu a ke in a tei thok.
16 A angkitual leh a phei parah min pakhat, “Siangpahrangpawl ih Siangpahrang, bawipawl ih Bawi,” tiih nganmi a om.
17 Cuhnukah nii sungih a ding tu vanmi pakhat ka hmu ih vancung laisim ih a soi tu vatepawl an zate aw dakpi in, “Pathian ih puai pi ah suak uh,
18 siangpahrangpawl ih sa, ralbawipawl ih sa, midikpawl ih sa, saipawl leh a citiatule ih sa – miluat leh sal an phun hnih, a tiin leh a hnem an phun hnih, an zate ih sa aw dingah vontumtia uh,” tiah a ko hngai.
19 Cutikah sahrang leh vulei siangpahrangpawl cu an ralkaple rum sai a citiatu leh a ralkaple raldo dingah an von tumtiak ka hmu.
20 Culeh sahrang cu a om hngan ah minhlinnak vua hngai in sahrang ih minhlinnak a co ih a mepa a biatupawl a deu hngai tu ahman lomi profet rum pon an tuak. Ahile an pahnih an nung in kat rum a kaang mi mei tili sung ah zam an ii.
21 Culeh a taang mipawl cu sai a citiatu ih kaa sungin a suakmi ralreen in an zate thah an ii; an sa cu vatepawl an zate ni khim kau an awktia.