THUPPHUAN
Johan hemih Thupphuan
Vulei leh van karlakah Pathian leh amah a zumtule dokalh in a tekcak rero tu huham siava a om. Santhuanthu hi San Sia leh San Òha tiin Žhen a ii ih, atu hi San Sia a ii. Pathian ni ahi San Sia leh a sungih rianŽuantu huham siava hi neh hngai dengin San Òha timi San Thar a suahsak leh thok timi thuthup phuannak phun ruahnak hi kum 100 BC leh AD kum 100 karlakah a langsar ngai. Pathian zumtupawl harnak an tuarmi hi a tuarsak tupawl khaw an tuar leh ve thok tiin thapiak dawtu an om ve. Cupawl ni mihremtule ih tiahthiam lo dingmi nambat iseh, minhlinnak iseh, an hmang. Hi laibu mang phun ngantu ni a cangciami khi cang laithok mangin sim an rau. A laibu hi khummi, hrenmi, thuhmi hon, kaau, phorh, leh lansaknak phun a ii. Thukam Hlun ih Daniel mang phun khi a ii. Daniel a hmang ngai.
A Ngantu, Ngan Kum leh Ngannak Hmun. A ngantu hi Johan a titia ih (1:1, 4, 9), kaizul Johan, Upa Johan timi pahnih lakih pakhatkhat ik ni cu a hoih lo (1:9; 21:14). Hi laiphun cu ngantu ni ahu in an kawhtiak ah khaw a relsak dawtmi le ni an tiah hluahhlo. A thusim ruangah pon tuakin Patmos tikulh ah riankhung Žuan dingih kuat mi a ii (1:9) ih a simtiak vial in an tiahthiam. Acangkho tleng mi cu Efesa khua ih kaizul Johan dungzulle mibuur pakhatkhat ih sungtel ik ni a hoih timi a ii. A ngan kum cu Domitian timi Rom Khumpi thih (AD 96) hrialkam ah ik ni a hoih tleng. A ngannak hmun khaw a thawngtlaknak Patmos tikulh in a thawh thokih, Domitian thih hnuk Efesa ih a kirŽhan ah ngan peh in a uuk leh a i thok ti hi zum khawh tleng mi a ii.
A Ngansaktu Thupawl leh a Tumtahmi. Khristianpawl cu Khumpi Nero in thawh in (AD 54-68) hrem an tuar ih, Domitian san cun (AD 81-96) a rauh hlehhlo. Zumnak ruangih thah tuar a Žul teuti hmen maw? timi thudilnak, itu an ngah leh thok? timi donharnakpawl hi Žhate ih leh an Žul. An tuarmi cu alaangte ceu a i thok (2:10 3:10), anmah a hrem hngai tu cu hrem a tuar rang ve thok (18), an dungla in a tekcaktu Satan amah hrimhrim thawng thlak leh hell ih thlak a i leh thok (20), vulei thar leh van thar ruahsan in an om awk a ii (21-22), tiin thapiak hngai a daw. Anmah hremtu leh zumtupawl cihmih a dawtu khumpi uknak dungla ah Satan a tekcak rero, ihmansela Pathian leh amah lasan ih Žang tupawl ni an neh leh thok. Curuangah Thukam Hlun ih Judahpawl ni an ruahsanmi cu zumtupawl dinhmun ah a kimsuak rero ti tiahthiam in tha an lat ding a daw. An zumnak zamtain dungsip loin, thinsau in tuarih nehtu an ik ding a torh hngai. Zirhtusual an om thahthah ih cupawl ralringin, an zirhmi zulh lo ding, an dinhmun remtiak, kilkhawi, ngaisirtiak an Žul zia a sim hngai cih (2-3).
A Thupithlurpawl. (1) Khumpi biak peita ceu ah an dawtmi Pathian biak kho thok timi thusuah tangih nung tu Khristianpawl ni Jesuh cu itumang minung a ik, Pathian cu itumang Pathian a ik tiahthiamin amah ceu zum leh biak ding(1-5); (2) Hi vulei parih rian a Žuan rero tu huham tangah thi tiangih a tuartu Khristianpawl cu Pathian ni an ngahvo a piak hngai teuti thok ruangah thinnau lo leh thindeng loin tuar ngam ding. Cucu Khrih ih tuarnak lansaknak a ii(2:3; 6:9). Sualnak sungin a run hngai ruangah (1:5), amah caah Žhate ih nun thok, ziaza leh Žuanmi mangin thuŽhen thok a ik ruangah (2:23; 20:12-13), atu lio ih hniksaknakpawl intuar in, nehtupawl ik a Žul (2:7, 11, 17, 16; 3:5, 12, 21). (3) Hmuhtuahmi thilzongza hi Pathian hmuhnak, tiahnak leh a aw zaknak, vancungla thil mitthlam ih cuansak khawhnak, ah hman ding (1; 4; 21). (4) Jesuh cu: Pathian ni minungpawl rung hngai dingih a tehcahnak; hi vulei huham sungin rungtu(1:5b; 6; 5:9-16; 7:15; 12:11), tusuan, Bawipa, a mipawl caah a piatia tu (5:6,9, 12), Pawlpi caah Bawipa(2-3), tlangbawi ah mi a cansak tu a ii (1:6, 5:10), acucu hnukla ah a kim leh thok (20:6; 22:5); atulio ah Bawi, cun hinhnuk ih a phathok tu Pathian a ii. (5) Tusuan ih nunliam thihnak thawngin Khristianpawl cu san deng tikih cang thok mi runnak a co romih nunpi lio tule an ii (1:5b-6; 5:9-10; 19:3-4), Pathian uknak sungah an tel rom (1:9). Vancung ih a kimngah thokmi runnak cu hi vulei ahhin a thawh rom, rulhreng khaw hret a i rom. (6) Pawlpi hi ukhruainak a i lo, sungtelpawl cu sal leh riantu an ik vek ruangah suahpi unau mangih pehtlaihtiak vek thok (1:9; 19:10; 22:9; 2:20; 7:3; 19:2,5; 22:3). Vanmipawl hman sal hawipi an ii (22:9). Pawlpi vanin Pathian uknak a thupi sawn. (7) Pathian ni hi huham Žhalo rian a Žuannak vulei hi tharsuah hratin Žhat lonak a neh ngah thokih a mipawl hemah omhmun khuarin khua a sa thok (21:3-4), acu a cansuah ding omzia cu minhlin bai dingah thilcang ding phun sarih in voi sarih a sim: tacik pasarih (6:1-8:1), tawtawrawt pasarih (8:2:11-19), rulhreng uknak lansaknak pasarih (12:1-3:18), Pathian Tusuan phat ding lansaknak (14:1-20) Žhat lonak parih, Pathian thinsiatnak hai pasarih (15:1-16:21), Babilon tlaksiat ding lansaknak pasarih (17:1-19:10), thil netnak thok lansaknak pasarih (19:11-21:4). Ahipawl simlo pawlpi pasarih hemah an bulvekin lai a kuat hngai rih (2-3).
1
1 Hihi Jesuh Khrih ih thupphuan, ihlet hlanih a cang thokmi thil, a salle hemah hmuh hngai dingin Pathian ni a hemih a piakmi a ii; Jesuh Khrih ni a vanmi thlah in a sal Johan hemah a tiah sak.
2 Johan ni Pathian ih thu leh Jesuh Khrih ih thu simthan cu, a hmuh mi a zate in a simthan.
3 Profetthusim aankapawl dakpi in a rel tu cu mithluasuak a ii, culeh a sungih nganmi a za ih a zul tupawl cu mithluasuak an ii; icatile a caan a nai.
4 Johan ni Asia ram sungih a ommi pawlpile pasarih hemah biaksonnak ka tan kuat hngai: a omlio mi, a omta mi leh a om laithok mi hemin, culeh a toŽhiang hmala ih a omtu thlaraule pasarih hemin,
5 culeh rinsantlak thutiahpitu, mithi lakih hrin-u, culeh vulei siangpahrangpawl uktu, Jesuh Khrih hemin veel leh daihnak cu nan hemah pha kau seh. A man daw ih, a thisan thawngin kan sualnakpawl in a man luatsak tu,
6 culeh a siangpahrang uknak, a Pathian leh Pa riantu ding tlangbawipawl ah a man vua tu, amah hemah sunparnak leh uknak cu a kumkhua in kumkhua om kau seh. Amen.
7 Zohhman! Meici rum
a pha thok;
mit cang ni amah
an hmu thok,
amah a sun tule hman ni;
culeh amah ruangah
vulei cungih hrinpawl
an zate an Žapraak thok.
Ahihi a i taktak thok. Amen.
8 “Kei cu Alfa leh Omega, ka ii,” tiah Bawipa Pathian, a ommi, a omta mi leh a om laithok mi, Zongzatikho ni a ti.
9 Kei, Johan, hremnak leh uknak leh thinsau ih tuarnak ah Jesuh sungah a tan Žom hngai tu nan unaupa cu, Pathian thu leh Jesuh ih thu ka simthan ruangah Patmos timi tikulh ah ka om.
10 Bawipa Ni ah Thlarau sungah ka om ih, ka dungla in tawtawrawt mang aw dakpi pakhat,
11 “Na hmuhmi hi laibu sungah ngan la, pawlpile pasarih – Efesa, Smarna, Pergamum, Thiatira, Sardis, Filadelfia, leh Laodisia – hemah kuat hngai,” tiah a ti tu ka za.
12 Cutikah ama bia tu aw cu ahu ih aw a ik tiah dingin ka mertia ih, ka mertiak fangah sui mei tletnak tungpawl pasarih ka hmu hngai,
13 culeh meiinnpawl lakah cun Mi Tiapa mang pakhat, angki tualpi leh a Žang ah sui Žangkham in a thuamtia mi ka hmu.
14 A lu leh a sam cu tuhmul mang, vur mangin an raang; a mitpawl cu meihlio mang an ii,
15 a ke cu somei sungih rawtmi daar mang a ii, culeh a aw cu ti tampi aw thawng mang a ii.
16 A vorhla kut ah arsi pasarih a puttia ih a kaa in ha-hnih parmi ralreen a suak, culeh a hmai cu nii a tha ngeih hmawh in a tlaan lio mang a ii.
17 Amah ka hmuh tikah, thi ningla mangin a ke hramah ka ngal. Ihmansela ka parah a vorhla kut siain, “Òih hlah law; kei hi a peitatleng leh a netatleng,
18 culeh anung mi ka ii. Ka thi ta, zohhman, kumkhua in kumkhua ka nung; culeh Thihnak leh Mithikhua ih tawhpawl ka ngei hngai.
19 Atu ah na hmuh rommi – a ommi, culeh ahi hnukih a cang dingmi thil hi ngan hngai.
20 Ka vorhla kut sungih na hmuhmi arsipawl pasarih, sui meiinn pasarih ih thuthuk cu: arsi pasarih cu pawlpile pasarih ih vanmile an ii, culeh meiinn pasarih cu pawlpile pasarih an ii.