FILEMON
Hemih Paul Laikuat
Punpak Hemih Laikuat. Kan Thukam Thar sungah punpak hem rori ih kuatmi lai pahnih ceu an omih Filemon hi pakhat a ii. Filemon cu Kolosa khua ih ommi milian pakhat, sal tlungpi ngei a ii ih a inn ah Khristianpawl an khawmtiak bil ruangah Khristian a i ve ti a fiang (t. 2). Inntekpa Filemon hemih a nganmi laikuat leh a inn ih puuntiatu Khristianpawl hemih nganmi laikuat hi an sakhah tuk ruangah caan khat sungih ngaan khatmi an ik zum a ii. Cui laikuat pahnih phurtu cu Taikhikas a ii.
A Ngantu, Ngannak Hmun leh Ngan Kum. Hi laikuat hi Paul ih nganmi a i lo ti ih alkhawhloin afiangmi lakah a tel mi a ii. Paul ih ngan a ik a fiang hleiah, Rom khualipi ih thawng a tlak lio ah a ngan timi khaw a fiang. Curuangah a ngan kum cu AD 60-6 karlakah a i ve thok, Filipi laikuat a ngan hnukah zong a i thok.
A Ngansaktu Thupawl. Paul ni laikuat izetmaw a nganmi ah punpak hemih a nganmi a om thah lo. Ituruangah Filemon hem fanghmawh lai a kuat he nala? ti hi tiahdawtŽha a ii. Filemon cu sal tlungpi ngei milian ngai a ii. Voikhat ah a salle sungih pakhat Onesimas timi pa cu a bawipa ih thilpawl latain a zuangih Paul hem a pha (tt. 18-19). Mi zuangtatu sal cu Rom san ahcun thikau hrem khawh a ik ruangah Paul ni a hemih a omsak duau sungah Pathian zumtu ah a can sak la. A hemih omsak berbo a ngah lo ruangah a bawipa hemah kir a torh ih a bawipa ni mi zuangtatu sal pakhat kirŽhan dinhmun in iloin Khrih sungih dawtngaimi unaupa (t 16) dinhmun leh, amah Paul rori cosangla dinhmun in (t. 17) a cosanlak nak ding Filemon hemah a ngeen, ti hi ruahdan keel a ii.
Ruahnak thar cu: Onesimas hi salzuang iloin innsang buainak ruangih inn in a suakmi, tlunŽhan khaitia hrimin Paul ih ruahnak a dil tu a i sawn thok ti a ii.
A Thupithlurpawl. (1) Paul ni Onesimas a dawt zia a lansak (t. 18, 12, 13), icatile miŽhahnem a cang (t. 11), miŽhahnemlo khi miŽhahnem ah a cansaktu dawtnak a ngeih cih. (2) A hraam nengno laah naktiah midil ih laingan a thiam nengno ti a lansak(tt. 4-10). Khatla ih lungkimnak telloin a dangthamin thilti a hmang lo. (3) Amah ceu ni iloin a rianŽuanpile iseh, a min ih khawmtia tule ni iseh Onesimas a phat tikah a bawipa ni Paul ih ngen mangin thlah leng lei maw ti an ruahsan (t. 21). (4) Sal ngeih cu Rom cozah ca-ih minung pehtlaihtiaknak hrampi pakhat a ik tikah acu lehthal thok cu Khristian mitlawmte caah a bai lo. Cuhleiah “innsang salpawl” cu an inntekle ni omnak inn timang an piak tikah an zate thlah ahcun omnak inn ngeiloin an harsa rilrial thok. Curuangah sal ngeih thu ah pawlpi dinhmun ding khaw a sim lo. (5) Innsang pawlpi ih thupitnak kan hmu. An hrialkam biaknak pace thilti daan an cawng men iloin, zumtupawl mibur in omkhat daan taktak an nunpinak, Khristian mibur cu khawtiih omkhat thok a ii timi an nunpi taktak ding daan an zirnak leh an lansaknak a ii.
1
1 Khrih Jesuh ruangih thawngtlami Paul leh kan naupa Timote ni, kan dawtmi rualpi leh rianŽuanpi Filemon,
2 kan tarnu Apfia, kan ralkap Žuanpi Arkhipas leh na min ih a puuntiami pawlpi hemah lai kan tan kuat:
3 Kan Pa Pathian leh Bawi Jesuh Khrih hemin naktiahnak leh daihnak cu nan hemah om hram seh.
4 Ka thlacamnak ah ka tan mangŽhanih acui caan ahcun ka Pathian hemah lungawithu ka sim ringring.
5 Icatile mithiangpawl zate ca-ih na dawtnak leh Bawi Jesuh na zumnak thu ka za.
6 Khrih ca-ih kan Žuanmi thilŽha zate na tiahthiamngah tikah mi na hei hlawmmi na zumnak cu hmuarngeimi a cannak ding thla ka cam.
7 Ka unaupa, mithiangpawl ih thinlung cu namah thawngin tharthawhsak a ik ruangah na midawtnak parin lungawinak leh thazaang tampi ka congah rom taktak.
8 Ahi thu ruangah hin, na Žuanvo cu Žuan dingah Khrih sungih unau iknak in thu tan piak ding ngam tuk kau hman ningla,
9 kei Paul, pahraam leh atu ah Khrih Jesuh ruangih thawngtlapa ni dawtnak sirhsanin a ngentu ka tan ngeen sawn thok.
10 Ka tiapa Onesimas caah naktiah ka tan dil, ka thawngtlak lio ah thlaraulain a pa ah ka cang.
11 Hihhlan ahcun ani cu na caah hmanŽhalo a ita, ihmansela atu cu namah leh kamah kan pahnih caah hmanŽhami a i taktak.
12 Na hemah amah, ka thinlung rori timi cu ka tan kuat Žhan.
13 ThuthangŽha ca-ih ka thawngtlak lio ah hin na can-ai ih ma zokhentu i dingin ka hemih omsak ka daw.
14 Ihmansela, na thilŽha timi cu hnekcop iloin lungpokih vuakmi i dingah, na natlaknak telloin cu ituhman ti lo ding ka daw sawn.
15 Ahihi a kumkhua amah na ngeih Žhan nak dingah cangkhatte sung namah rum nan Žhentiak duau nak i nahrat.
16 Sal dinhmun in i ti loin sal vanin a cuangsawnmi, dawtmi unaupa a ii. Ahleicein kamah caah ihmansela, namah caah cun tiksa leh Bawipa sungah a pahnih in itluk unau a i hlehhlo.
17 Curuangah kei hi na rianŽuanpi ih ma ruat i taw ci ah kamah a ma cosaan thok mangin amah hi cosang law.
18 Na parah khawtimaw in thil a ti sual taak ah iseh, na hemih batmi itumaw a ngeih ah iseh, kei ih kuan dingin sia kau.
19 “Ka kuan thok,” timi hi kei Paul ni ka kut rori in ka ngan. Namah rori hman a ma ba timi thu cu ituhman ka sim lo.
20 A ii, unaupa, Bawipa sungah hi Žhathnemnak hi na hemin ngah lang law! Khrih sungah ka thinlung tharsuah kau.
21 Na thucangngaihnak hi lunglumin, ka simmi van hman a hlei in na ti thok ti ka tiah ih, na hemah lai ka ngan.
22 Pakhat rih maw – ka caah khualcaamnak khaan pakhat tuahtim law, icatile na thlacamnak thawngin nan hemih kirsak Žhan ik lei ka ruahsan.
23 Khrih Jesuh sungih ka thawngtlakpi Epafras ni biaksonnak a tan kuat.
24 Cun ka rianŽuanpile a i mi Marka, Aristarkhas, Demas leh Luka ni khaw an tan kuat ve.
25 Bawi Jesuh Khrih ih veel cu nan zate hemah om kau seh.