26
(Mar 14:1-2; Luk 21:1-2; Joh 11:45-53)
1 Jesuh ni hi thupawl a sim uh tikah, a kaizulle cu,
2 “Ni hnih hnukah Lontak Puai a i thok, culeh Mi Tiapa cu khentar awkah ap a i thok ti nan tiah,” tiah a ti hngai.
3 Cutikah tlangbawi upapawl leh Tlangsuak upapawl cu Kaiafas timi Tlangbawi Saang ih inn ah an khawmtia,
4 culeh a thup le thli in Jesuh ponih that dingah thu an phiar.
5 Ihmansela, “Puai lio ah cu i hlah seh, culocu mipi lakah buainak suak pang lei-a,” tiah an ti.
(Mar 14:3-9; Joh 12:1-8)
6 Jesuh cu Bethani khua ah miphar pa Simon inn ih a om lio ah,
7 numi pakhat cu alabaster lung ih vuakmi uum pakhat in mankhungngaimi rimhmui tii kengtain a pha; culeh Jesuh caw a um lio ah a lu parah a toih.
8 Ihmansela kaizulle ni an hmuh tikah an hehharin, “Icaah hitiin a heusak tlawi?
9 Icatile hi rimhmui cu tangka tlungpi ah zuarin a tangka cu mifarah piak khawh a inain,” tiah an ti.
10 Ihmansela Jesuh ni acucu tiahthiamin, “Icaah minu cu nan hnaihnawh duh? Ka parah thil Žha a vua hekhawh.
11 Icatile mifarah cu nan hemah an om berbo kau hin, a inain kei cu nan hemah ka om berbo thok lo pi.
12 Hi rimhmui tii ka ruang parih a toihnak thawngin ama vuinak caah a tuahtim li.
13 Thungai in ka tan sim hngai, vulei cung punpuluk ih hi thuthangŽha simthan a ik nakpohah a thilvuakmi cu amah palhtiak lonak ah simcih a i ve thok,” tiah a ti hngai.
(Mar 14:10-11; Luk 22:3-6)
14 Cuhnukah hleihnihle lakih pakhat, Judas Iskariot timi pa cu tlangbawi upale hemah tatin,
15 “Amah hi tan leiroih hngai ning la itu ma pia tur cu maw?” tiah a dil hngai. Ngun tangka sawmthum an pia.
16 Culeh acui caan in thawhin Jesuh a leiroih ngahnak ding caanŽha hrawl a thawh.
(Mar 14:12-21; Luk 22:7-13)
17 Colphulhlo Sanghreu Puai ni peitatleng ah kaizulle ni Jesuh hemah pha in, “Lontak Puai caw na awk dingmi cu khawnang ah man zalhsak daw ci maw?” tiah an ti.
18 Ani ni, “Khua sungih pakhat pa hemah tat lei cu khawh, ‘Zirhtupa ni, Ka caan a nai vel, ka kaizulle rum na inn ah Lontak Puai ka hmang thok a ti’ tiah sim uh,” tiah a ti hngai.
19 Curuangah kaizulle ni Jesuh ih sim hngai mang cun an tat, cun Lontak Puai caw cu an zaal.
20 Simla a phat tikah Jesuh cu a kaizulle hemah caw a uum ve;
21 culeh caw an awk lio ah, “Thungai in ka tan sim hngai, nan lakih pakhat ni a ma leirawi thok,” tiah a ti.
22 Culeh an thin a tiak ngaite ih pakhat hnuk pakhat ni, “Kei cu i hlah ing maw, Bawipa?” tiah an ti vek.
23 Ani ni, “Kei rum kuak sungih sang a hnim khat tu ni ama leirawi thok.
24 Mi Tiapa cu amah thuhla nganciami mangin a tat kau thok, a inain Mi Tiapa a leirawi tu cu a hmaka a pit! Acu pa cu hrin i ta hlah sela Žhasawn hngen tur e,” tiah a sawn hngai.
25 A leirawitu pa, Judas ni, “Kei ka i kau lo maw, Rabbi?”note 26:25 Zirhtupa tican a ii. tiah a ti. Jesuh ni, “Acutiin na ti rom hin,” tiah a sawn. Ref 26:25 Mar 15:2 rum Žhim.
(Mar 14:22-26; Luk 22:14-23; 1Kor 11:23-26)
26 Caw an awk lio ah Jesuh ni sanghlom pakhat a la, thlua a suah hnukah seuin a kaizulle a pia hngai, cun, “La uh la, aw uh; hihi ka tiksa a ii,” tiah a ti.
27 Cuhnukah hai a la, cun thlua a suah hnukah anmah pia hngai in, “Hihi nan zate ni ding uh;
28 icatile hihi mi tlungpi sualnakpawl ngaidamnak ca-ih thletmi ka thii in thukamnak a ii.
29 Ka Pa uknak sungah nangmi rum a tharin kan din nii hlansung cu sabit ruang in a suakmi vuang ih tii hi ka ding dah ti thok lo tiah ka tan sim hngai,” tiah a ti.
30 Hla an sak hnukah, Oliv Tlang ah an tat.
(Mar 14:27-31; Luk 22:31-34; Joh 13:36-38)
31 Cuhnukah Jesuh ni, “Nihin zan kamah parih thilcangmi ruangah nan zate ni ama mata hngai thok; icatile,
‘Tukhal ka that thokih,
tuule cu an parcak thok’” Ref 26:31 Zak 13:7
tiah ngan a ii.
32 A inain thawhsak ka ik hnukah, nan hmala in Galilee ah ka tat li thok,” tiah a ti hngai.
33 Piter ni, “An zate ni namah an tan zuantak remro hmanah, kei cu ka tan zuangta dah thok lo,” tiah a ti.
34 Jesuh ni, “Thungai in ka tan sim, nihin zan rori ar a khuan hlanah, voi thum ama pheh thok,” tiah a ti.
35 Piter ni, “Nang rum thi khat thok hman ning la ka tan pheh thok lo,” tiah a ti. Kaizul pace an zate ni khaw acuti cun an ti.
(Mar 14:32-42; Luk 22:39-46)
36 Cuhnukah Jesuh cu a kaizulle rum Gethsemane timi hmun ah an tatih, “Khinang ah cu tatin thla ka cam sung cu hinangah hi to la uh,” tiah a ti hngai.
37 Piter, cun Zebedi ih tiapale pahnih a hruaita hngai, culeh ngaihsia leh thinharin om hram a thawh.
38 Cutikah, “Thi thok tiangin ka thinlung a purzan, hinangah om la uh la, cun ma tiimvaar pi uh,” tiah a ti hngai.
39 Culeh hladeuh duau ah tatin, khur parah a bokih, “Ka Pa, cangthiam taw ah hi hai hi ni ma hrel pah seh; a inain ka dawtzawng mang iloin na dawtzawng mang ii seh,” tiah thla a cam.
40 Cuhnukah kaizulle a pha hngai ih mein a hmu hngai; culeh Piter hemah, “Nazi pakhat khaw a ma hrialhrah pi hngai zo lo maw?
41 Hrialhrak uh la, hniksaknak caan sung ih nan luh lonak ding thlacam tuhmen uh; thlarau ni cu a daw kau nain thisa hmawh a ŽonŽaih ah,” tiah a ti.
42 A voi hnihnak tat Žhanin, “Ka Pa, hi hai hi ka din loin ma hrel kho hlah taw ah, na dawtzawng cu vuak i kau seh,” tiah thla a cam.
43 A kirŽhan ih mein a hmu hngai, an mit a ze rori.
44 Curuangah mata hngai seihratin, a tatih, a aantapawl siksik saalin a voi thumnak thla a cam.
45 Cuhnukah kaizulle pha hngai in, “Nan me rih in nan diintia rih maw? Zohhman uh, a caan a nai vel. Mi Tiapa cu misualpawl kut ah ap a ii hi!
46 Tho uh, tat vel le hu. Zoh uh, ama leirawitupa a pha vel hi,” tiah a ti hngai.
(Mar 14:43-52; Luk 22:47-53; Joh 18:1-11)
47 A an rero lio ah hleihnihle lakih pakhat Judas a pha; tlangbawi upapawl, daanzirhtupawl leh Tlangsuak ih thlahmi mibuur cu ralreen leh talvawng kentia in amah rum an pha.
48 A leirawitupa ni, “Ka hnam thok mipa cu amah a ii; pon lei cu,” tiah minhlinnak a pia hngai.
49 Jesuh cu hnaih vohviin, “Tan tuakbia ing ee, Rabbi!” tiah a ti, culeh a hnam.
50 Jesuh ni, “Ka rual, hinangih na ti dingmi cu ti kau,” tiah a ti. Cutikah mibuur an pha ih Jesuh cu ponin hrenghri an khuah.
51 Avoikhatah Jesuh rum a om tupawl lakih pakhat pa ni a ralreen phawitia in, Tlangbawi Saang ih salpa a vorhla na Žotkau a set.
52 Cutikah Jesuh ni, “Na ralreen cu a kawng sung ah thunŽhan; icatile ral reen a hmang tu hmawh cu ralreen in an thi ve thok.
53 Vancung mibuur legionnote 26:53 Legion: ti cu Latin aan a i ih, Rom ralkap 6000 - 8000 buur kawhnak a ii. hleihnih vanin tlungsawn ma zon thlah piak lohli dingin ka Pa hemah dil zo loin a ma ruat maw?
54 A inain acutiin i thok sela, ahiti in cang dingih a simtu Lai Thianghlim cu khawti in a kimngah thiam thok hmen?” tiah a ti.
55 Acui caan ah Jesuh ni mibuurpawl cu, “Rokhmang ii ningla mang ralreen leh talvawng rum ma pon dingah nan suak ciamco maw? Nicang kovawh Biakinn ah toin thu ka zirh bil, ama pon hngai Žung tal lo?
56 A inain hi thil hmawhhmawh cu profet ih simmi Lai Thianghlim a kimngahnak ding caah a cang mi an ii,” tiah a ti hngai. Cutikah kaizulle an zate ni amah cu matain an leeu.
(Mar 14:53-65; Luk 22:66-71; Joh 18:12-14, 19-22)
57 Jesuh cu a pon tupawl ni daanzirhtupawl leh Tlangsuak upapawl khawmtiaknak Tlangbawi Saang Kaiafas ih inn ah an tahpi.
58 Ihmansela Piter ni hladeuh in, Tlangbawi Saang inn tual tiang a zul; culeh a sungah lutin, thilomdan khawti in a net leh thok ti hmungah dingah ralvengtule hemah a to.
59 Tlangbawi upapawl leh thureltu zate ni Jesuh an thah khawhnak dingah amah ralsanin ahman lomi thudinpinak an hrawl rero,
60 ihmansela, a sual zawng ih thudinpitu tlungpi an suak nain, thihnak tlak sualnak ituhman an hmu cuang lo. Netatleng ah mi pahnih ni hmaiah suakin,
61 Hi pa hi ni, ‘Pathian Biakinn hi Žhetin ni thum ah ka sa kho thok a ti’ tiah an ti.
62 Tlangbawi Saang ni hang diingin, “A lehnak na ngei lo maw? Namah tan ralsan ih thu an diinpi hi itu a ii?” tiah a dil.
63 Ihmansela Jesuh cu daite in a om. Cutikah Tlangbawi Saang ni, “Anungmi Pathian min saalin thukhaam tia dingah ka tan torh. Nang hi Pathian Tiapa, Messiah na ii maw? man sim hnik,” tiah a ti.
64 Jesuh ni, “Acutiin na ti rom hin. A inain ka tan sim thok,
Atu in cu Mi Tiapa hi
huham vorhla ah toin, cun
vancung ih meici parin
a phat nan hmu thok
tiah ka tan sim hngai,”
tiah a ti.
65 Cutikah Tlangbawi Saang cu a angki tualpi thlekin, “Thangsiatthu a sim hi! Icaah tiahpitu cu kan Žul rih hmen? A thangsiat thusim nan za rom hin.
66 Nan thusahmi itu ii maw?” tiah a ti.
67 Anmimi ni, “Thih a tlak” tiah an sawn. Cuhnukah a hmai cilriit an saakih an thawi; a hrekkhat ni beengin,
68 “Atan thawi tu hi ahu a ii ti cang hnik? Nang profet hiteh!” tiah an ti.
(Mar 14:66-72; Luk 22:54-62; Joh 18:15-18; 25-27)
69 Piter cu pawnla, tual ah a to. Hemom-lengtia ni pha in, “Nang khaw Galilee-mi Jesuh rum nan bualleng khat,” tiah a ti.
70 Ihmansela an zate hmaiah a cucu a pheh ih, “Itu thu na ang rero ti tiah hlah ing ee,” tiah a ti.
71 Tual zim ih a vasuah tikah hemomnu pace ni hmuin, a hrialkam ih a dingtupawl cu, “Hi pa hi Nazareth mi Jesuh rum bualleng khat a ita,” tiah a ti hngai.
72 “Acu pa cu ka tiah lo hena,” tiah thu khaamtia in a pheh sei.
73 Caan tlawmlio hnukah a hrialkamih dingtupawl ni pha in Piter cu, “Nang hi anmah lakih pakhat na i ve hrimhrim, na awcawi ni atan lansak hekhawh,” tiah an ti.
74 Cutikah aansia angin, “Acu pa cu ka tiah lo,” tiah thu a khaamtia. Acu fang ah ar a khuang.
75 Cutikah Jesuh ih, “Ar khuan hlanah voi thum ama pheh thok,” a timi khi Piter ni a vonmangŽhan: culeh pawnla ah suakin a Žap kheeikho.