20
“Icatile vancung uknak cu loram ngeitu, a sabit duum ih rianŽuantu ding hrawlah mawpan a vak suak tu pa mang a ii. RianŽuantule rum ni khat hlawhman denarii pakhat piak ding thu an ciintiak hnukah a sabit duum ah a thlah hngai. Nazi pakua hrawngih a vah suah tikah mipacepawl dawrhmun ah itu tilo ih dingluala in a hmu hngai; culeh, ‘Nangmi khaw sabit duum ah tat uh la, a tuakcaang ka tan pia hngai kau thok’ tiah a ti hngai. A ti mang cun an tat. Sun hrawng leh nazi pathum hrawngih a vah suah tikah acuti cun a ti hngai. Culeh nazi panga hrawngah a vak suakih, mipacepawl diingin a hmu hngai, culeh, ‘Icaah ahinang ah sun nihlawh nan diing men luala?’ tiah a ti hngai. Anmimi ni, ‘Ahuhman ni hlawhsetin man tirh hlah uh khawh’ tiah an ti. Ani ni, ‘Nangmi khaw sabit duum ah tat ve uh’ tiah a ti hngai. Simla a phat tikah sabit duum ngeitu ni duum uktu cu, ‘RianŽuantule ko hngai lei ci khawh an hlawhman pia hngai, netatleng in thawh la peitatleng ah dengsak’ tiah a ti. Nazi panga hrawngih Žuan hlawh torhmi pawl an phat tikah ni khat hlawhman – denarii pakhat – vek an co. 10 Peitatleng ih Žuanhlawhtule an phat tikah tlungdeuh ngah an zumtia; a inain ni khat hlawhman – denarii pakhat – vek an ngah ve. 11 An hlawhman an ngah tikah duum ngeitu parah phunruin, 12 ‘Hi netatleng ih Žuantule hi nazi pakhat ceu an Žuan hekhawh, acucu nang ni sun nihlawh retheih leh nisa in tu keimi rum ruangin na vuak hngai hi!’ tiah an ti. 13 A inain anmah lakih pakhat hemah, ‘Ka rual, na parah thil sual ka vua tal lo; ni khat hlawhman denarii pakhat ngah dingin kan ciingtia ta hin? 14 Namah ih ta cu la in tat; hi a netatleng hi namah ka tan piak zet pia dingin ka khaihtiakmi a ii. 15 Kamah ih tangka cu ka dawt mangih ti dingah sen ka i lo hmen maw? Iklole mibaai ka ik hi ama iksik hetuhmen?’ tiah a ti. 16 Curuangah dungtatleng cu hmapitleng, cun hmapitleng cu dungtatleng an i leh thok,” tiah a ti.
(Mar 10:32-34; Luk 18:31-34)
17 Jesuh cu Jerusalem ih a soh lio ah a kaizulle cu anmah bulin thliar hngai in lampi ah, 18 “Zo hman uh, Jerusalem ah kan so thokih, Mi Tiapa cu tlangbawi upapawl leh daanzirhtupawl kut ah piak i lei khawh, anmimi ni thah dingin thu an relpiak thok; 19 cuhnukah nihsairawn awk leh thawi awk leh khentar awkah Zentail-mipawl kut ah an pia thokih, a ni thumnak ah thawhsak a i thok,” tiah a ti hngai.
(Mar 10:35-45)
20 Cuhnukah Zebedi ih tiapale ih nu cu a tiapale rum Jesuh hemah an pha, culeh a hmaiah khukbilin naktiah a dil. 21 Culeh Jesuh ni, “Itu daw ci maw?” tiah a ti. Ani ni, “Hi ka tiapale pahnih hi na uknak sung na phat tikah pakhat na vorhla ah, pakhat na kehla ah to dingin thuthan lei ci maw,” tiah a ti. 22 Ihmansela Jesuh ni, “Nan dilmi nan tiah lo a ik hi! Ka din vel thok mi tuarnak hai nan ding zo thok hmen maw?” tiah a sawn. Anmimi ni, “Kan ti zo kau,” tiah an ti. 23 Ani ni, “Ka hai cu nan ding zo tak pan thok, a inain ka vorh leh keh ih to ding cu kei ih piak thok iloin, ka Pa ni a ruahkhang piak hngai mi le caah a ii kovawh,” tiah a ti hngai. 24 Pahrale ni acucu an zak tikah unaule pahnih parah an heh a har. 25 Ihmansela Jesuh ni a hemah ko hngai in, “Zentail-mi uktupawl ni cu an ukmipawl an bawihnawhp Khawngkheng, hnenang a i kho, cun an mithupile ni khaw thu mi an ngeihhnawh ngaite ti nan tiah kau. 26 Nangmi lakah cu acumang a i thok lo; nan lakih mi nasa ik a daw tupoh an tan riantu a i thok, 27 cun nan lakih mi thupitleng ik a daw tupoh nan sal a i thok; 28 Mi Tiapa ni khaw renmi iloin mi riantu ding leh mi tlungpi tlannak caah a nunnak liam dingih a phat mangin,” tiah a ti hngai.
(Mar 10:46-52; Luk 18:35-43)
29 Jeriko in an pawh ah mibuur pi ni an zul. 30 acunang ahcun lam kapah mitcaw pahnih an to. Jesuh ni a lon hngai ti an zak tikah, “Maw Bawipa, David Tiapa, veel man ngeih hram!” tiah an ti. 31 Mibuur ni daite ih om dingah ngekngeihin an kaa; ihmansela “Vel man ngeih hram kau, Bawipa, David Tiapa,” tiah dak hlehloin an hek hoi. 32 Jesuh cu a diing rimriam ih a ko hngai, cun, “Itu tan vuak piak hngai ningla daw cu maw?” tiah a ti hngai. 33 Anmimi ni, “Bawipa, kan mitpawl hi khuahmu Žhan uh seh,” tiah an ti. 34 A phusa an hik ih Jesuh ni an mit a tham hngai. Avoikhatah khua an hmu lohli ih amah dung an zul.