12
(Mat 10:26-27)
1 Mibuur cu a thawng a thawng in an khawmtia ih, pakhat leh pakhat an teihtiak hluahhlo lio ah Jesuh ni a peitleng kaizulle cu, “Farisi-le ih colnu, cucu an tisaktiaknak tican, hi ralring uh.
2 Hon lo dingih khummi ituhman a om lo, cun tiah leh lo dingmi thuthup ituhman a om lo.
3 Curuangah khuamaw lakih nan simmi ituhman sun khuatle ah zak a i leh thok, cun sangka kharmi dungla ih nan hiohio mi poh inn luangkhum par in ho a i leh thok.
(Mat 10:26-33)
4 “Ka tan sim hngai, rualle hngai, ruangpun cu thatin acu hnuk ituhman a ti beeng zo lo tupawl cu Žih hlah uh.
5 A inain ahu Žih ding ti ralrin ka tan pia hngai thok: mi a thah hnukah hremhmun ah mi thlak khawhnak huham a ngei tu Žih uh. A ii, ka tan sim hngai, amah cu Žih uh!
6 Caate lunga sa cu tangka saa hnih ah zuar an i lo maw? A inain pakhat te hman Pathian ni hmun loin a palhtia lo.
7 Nan lu parih sampawl hman dengin siar an ii. Nan thlaphang hlah uh; nangmi cu caate tlungpi vanin nan man a khungsawn hekhawh.
8 “Cun ka tan sim hngai, mipawl hmaiih ama phuang ngam tupoh Mi Tiapa ni khaw Pathian vanmipawl hmaiah ka phuang leh ve thok;
9 a inain mipawl hmaiih ama pheh tupoh Pathian vanmipawl hmaiah pheh an i leh thok.
10 Culeh Mi Tiapa dokalhin a awn-ang tupoh ngaidam an i thok; a inain Thiang Thlarau thangsiatin a awn-ang tupoh ngaidam an i thok lo.
11 Sinakok uktule hmala leh thungeitule hmala ah tlangtung dingin an tan phatpi tikah, nanmah le mah khawti in nan Žantiak thok leh itu nan sim thok timi thu ah dontia hlah uh;
12 icatile Thiang Thlarau ni itu nan aan awk a mawi ti cu acui caan rori ah a tan zirh hngai leh thok,” tiah a ti hngai.
13 Mibuur lakin mi pakhat ni Jesuh cu, “Zirhtupa, ka upa hi kan innsang rocomi ma zem ve dingin ma sim piak tuhmen,” tiah a ti.
14 Jesuh ni, “Mi pa, ahu ni nan thureltu iklole thuŽhenpiaktu ah ama vua hmen?” tiah a ti.
15 Culeh, “Ralring uh! Duhhamnak a phunphun ih ral in khamtia uh; icatile mi pakhat ih nunnak cu a ngeihsiah tampi lakah a telcih lo,” tiah a ti hngai.
16 Cuhnukah thuŽhim pakhat: “Milian pakhat pa ih lo ram ni thlaikhawm ding tampi a suah.
17 Cutikah amah te, ‘Itu ka ti mawi nala? Ka thlaikhawm awk khawlnak hmun le ngei hlah ing’ tiah a ruattia.
18 Cuhnukah, ‘Hihi ka ti thok: ka cawsiarpawl Žhet hngai in a hnemdeuhmi ka sa hngai thok, cun acunangah ka thlaikhawmmi leh ka thilpawl ka khawl hngai thok.
19 Culeh kamah le mah cu: Kum tlungpi caah khawltiakmi thil tor rauh na ngei kovawh; om tia huahho – aw, ding, cun nuam tluaitloin om tia, tiah ka ti tia thok’ tiah a ti.
20 A inain Pathian ni, ‘Nang miaa! Nihin zan rori ah na nunkhua cu na hemin lat a ii. Na tuahtimtiakmi thilpawl teh ahu ih ta i lei uh maw?’ tiah a ti.
21 Curuangah Pathian laah hmawh lian Žung loin anmah caah ngeihsiah khawl tupawl cu acumang cu an ii,” timi a sim hngai.
(Mat 6:19-21, 25-34)
22 Jesuh ni a kaizulle cu, “Curuangah ka tan sim hngai, nan nunnak ca-ih nan awk thok, iklole nan ruangpun ca-ih nan sinthlai thok dontia hlah uh.
23 Icatile nunnak timi cu caw vanin a thupi sawn, cun ruangpun khaw partlai vanin a thupisawn.
24 Langakpawl hi ruat hman uh: thlai khaw an thla lo, khawm khaw an khawm lo, thilkhawlnak inn leh cawsiar khaw an ngei lo, a inain Pathian ni a cawm hngai kau. Vapawl vanin itluk man tam hlehh lomi nan ii!
25 Cun nanmah lakih ahu mang ni nan dontiak ruangah nan nunkhua nazi pakhat te tal sausak beeng zo cu?
26 Acumang thil tinte hman nan ti zo lo ahcun acu simlo pawl caah icaah nan dontiak duh?
27 Bingbi parpawl khawti in an hanghnem ti ruat hman uh: thabangin rian an Žuan lo, cun vo khaw an sual lo; a inain ka tan sim hngai, Solomon ni hman a sunlawinak zate rum a thomtiak ah ahipawl lakih pakhat mangin a mawi lo.
28 Nihinni cu a nungih zingla ahcun capeng mei sungih paihmi hramlak taa hman Pathian ni cutiih a thom ahcun, itlukin a tan thuam hngai hlehhlo thok – nangmi zumnak tlawm le!
29 Cun itu nan awk thok leh itu nan din thok caah khaw zuam rero duh hlah uh, cun dontia ringring hlah uh.
30 Icatile hi thilpawl hi cu zumlotupawl ih ngah zuam rero mi an ii, nangmi acupawl nan Žul cu nan Pa ni a tiah kau.
31 Acu vanin cu, a uknak caah zuam rero sawn uh, culeh hi thilpawl hi khaw nan hemih piak an i ve leh thok.
32 “Hrul hlah uh, turual tinte le hngai, icatile nan hemih uknak piak cu nan Pa ih nuam ti zawng a ii.
33 Nan ngeihsiahpawl zuar uh la, mi harsa bonnak ah pia uh. A Žet lo dingmi tangka siahnak dipte vuak tia uh la, titir ni an vonghnaih lonak leh riarulnu ni an siatsuah lonak vancung ah a hmalak dah lomi hlawnthil khawltia uh.
34 Icatile nan hlawnthil omnak ah nan thinlung khaw a om ve thok.
35 “Tekcak dingin thuamtia uh la nan meiinn khaw vaancia in om uh;
36 an bawipa mopuai in kirih a phat tikah sangka a kin vete in sangka hon piak dingih a hngak tupawl mangin ii uh.
37 An bawipa a phat tikih tiimvaarin a hmuh hngaimi hemomle cu mi thluasuak an ii; thungai in ka tan sim hngai, a tavai vaitia in anmimi khaw caw aw dingah a tosak hngai thok, cun anmah a rian hngai thok.
38 Zanruang liofang ih a phat ah maw, iklole khuavang sam ih a phat ah maw, acutiih a hmuh hngai ahcun, a cui hemomle cu mi thluasuak an ii.
39 “A inain hihi tiah uh: inn ngeitu ni khawcang fang ih titir phat thok a tiah ahcun tiimvaarin om lei khawh a inn cu a bauh sakin a luh sak thok lo.
40 Nangmi khaw nan ralring thok, icatile Mi Tiapa cu nan rinlo caan ah a pha thok,” tiah a ti hngai.
(Mat 24:45-51)
41 Piter ni, “Hi thuŽhim hi keimi caah na sim maw, iklole mi zate caah na sim?” tiah a ti.
42 Culeh Bawipa ni, “Ahu hemaw a bawipa ni a hemomle parih Žuanvongeitu ding leh a caan te ah an caw awk ding covo zet zem hngai dingah a siahmi rinsantlak leh a tingmi tawlreltu cu?
43 A bawipa a phat tikah rianŽuan in a hmuhmi cui hemom cu mi thluasuak a ii.
44 Thungai in ka tan sim, acu pa cu a bawipa ni a ngeihsiah zate parih Žuanvongeitu ah a vua thok.
45 A inain a cui hemom ni amah le mah, ‘Ka bawipa cu a phat tlai vaih lei in,’ tiah titia in a hemomle nutilo patilo thawi hngai in, a awk, a din leh a rit ahcun,
46 acui hemom ih bawipa cu a rinlo nii leh a tiah lo caan ah pha lei khawh a can zan thok, cun rinsantlaklo le hemah a sia thok.
47 A bawipa ih dawtzawng a tiah nain a ralring tia lo, iklole a bawipa ih dawtzawng a vua lo tu acui hemom cu tiakpi ih thawi a tuak thok.
48 A inain a tiah ta lo tu leh thawi phumi a vua tu cu doihte in thawi a tuak thok. Tampi piak a i mi poh hemin tampi dil a i thok; cun tampi kilsak a i mi hemin cu tamsin hman ngen a i thok.
(Mat 10:34-36)
49 “Vulei ah mei putta hngai dingah ka pha ih atu hi cawng rom sela ka dawt zia cu!
50 Tuarnak timi tihnimtiak thok ka ngei, acucu uh ngah a ik hlansung itluk in ka te a tem!
51 Vulei ah remdaihnak putta hngai dingah a pha tiin ama ruat hngai maw? Ihlah ee, ka tan sim hngai, Žiankuainak suahsak ding sawn ah ka pha hekhawh!
52 Atu hin cu innsang ih mi panga ommi cu: pathum ni pahnih ralsanin, cun pahnih ni pathum ralsanin an Žiankuai thok;
53 Pa ni tiapa ralsanin,
cun tiapa ni pa ralsanin,
nu ni tianu ralsanin,
cun tianu ni nu ralsanin,
nii ni vah-nu ralsanin,
cun vah-nu ni nii ralsanin, c ‘vah-nu’ ticu tiapa ih nupi leh a pumah ih nu pehtlaihtiaknak simdawtmi a ii.
(Mat 16:1-4)
54 Mibuurpawl cu,
“Nilawhnakla ih meici
hangkai taw ah a voikhatah,
‘Ruah a zu thok’
nan ti lohli;
cun a zu ngaingai.
55 Culeh simramla huih tlo taw ah, ‘Khua a sa rauh thok’ nan tiih a sa ngaingai.
56 Nangmi mitisaktiapawl! Vulei leh van hmuihmel landan sullam khawti in phuansuah thok ti cu nan tiah, a inain atulio caan sullam khawtiih phuansuah thok ti hmawh icaah nan tiah lo hmen?” tiah khaw a ti hngai.
(Mat 5:25-26)
57 “Icaah nanmah te itu a hmaan ti thu nan Žhen tia lo?
58 Cuticun, tlang a tan tungtu rum thuŽhenbawi hem nan tah tikah, zung phat hlan ah amah rum thudaihsak ding zuam la, culocu thuŽhentu hmala ah sualdawk i lei ci khawh, cun thuŽhentu ni bawi hemah a tan ap thokih, bawi ni thawng ah a tan thla thok.
59 Ka tan sim, na tangka kuan dingmi a dengnak rori na kuan hlan sung cu na suah ngah dah thok lo hena khawh,” tiah a ti.