1 Ni tlawmte hnukah Jesuh cu Tiberias Rili kapah, kaizulle hemah a lang Žhan; a lan Žhan daan cu hiti hin a ii. 2 Acunangah a khawmtiami cu Simon Piter, Miphiir tiih kawhmi Thomas, Galilee peng in Kana khuami Nathaniel, Zebedi ih tiapale, Jesuh ih kaizulle pace pahnih tipawl an ii. 3 Simon Piter ni, “Kei cu nga ka vawr thok,” tiah a ti hngai. Anmimi ni, “Keimi khaw tan vawr pi le hu,” tiah an ti. An tat suak ih lawng sung ah an lut, ihmansela acu zan cu nga lu khat hman an pon lo. 4 Khuavang caang Jesuh cu tipangkap ah a ding; ihmansela kaizulle ni cu Jesuh a ik an tiah lo. 5 Jesuh ni, “Naule hngai uh, awk dingah nga lukhat tal ngei hlah cu maw?” tiah a ti hngai. Anmimi ni, “Ngei hlah,” tiah an sawn. 6 Ani ni, “Sur cu lawng ih vorhla kam ah vawr uh la, cun nga nan pon duau kau thok,” tiah a ti hngai. Curuangah an vawrih, nga an tlun tuk ruangah sur cu an dawk zo lo. 7 Jesuh ih dawtmi kaizul ni Piter cu, “Bawipa a ii hekhawh,” tiah a ti. Simon Piter ni Bawipa a ik a zak tikah a takpalawng a ik ruangah a partlai a hru hngai Žhanih ti sung ah a peet. 8 Kaizulle pace ni lawng cu panin, nga a khat mi sur cu an dawk, icatile vulei in an hlalo, pi 300 tluk ceu a hla. 9 Tipangkap an phat tikah, acunang ahcun meiril Žuang parah nga leh sang emmi an hmu. 10 Jesuh ni, “Nan nga pon pekmi a hrekkhat keng hnik uh,” tiah a ti hngai. 11 Curuangah Simon Piter cu lawng parah kaiin, nga hnempipi in a khat mi sur cu tikap ah a dawkih, lu za leh sawmnga pathum an ii. Cutluk nga tlungpi ihmansela sur cu a tlek lo. 12 Jesuh ni, “Suak uh la thaithawh aw uh law,” a ti hngai. Bawipa a ik an tiah ruangah kaizul pakhat hman ni, “Ahu ii ci?” tiah an dil ngam lo. 13 Jesuh pha in sang a seu ih a pia hngai, nga khaw acumang cun a vua. 14 Ahihi Jesuh ni mithi lakin a thawhŽhan hnukah kaizulle hemih a voi thumnak a lan caan a ii.

15 Thaithawh an khim hnukah Jesuh ni Simon Piter cu, “Johan tiapa Simon, hile vanin ma daw sawn cim?” tiah a ti. Ani ni, “Daw sawn ee, Bawipa; ka tan dawt cu na tiah kau,” tiah a ti. Jesuh ni, “Ka tusuanle cawm hngai law,” tiah a ti. 16 A voi hnihnak, “Johan tiapa Simon, ma daw cim?” tiah a ti. Ani ni, “Daw ee, Bawipa, ka tan dawt cu na tiah kau,” tiah a ti. Jesuh ni, “Ka tuu khaal hngai law,” tiah a ti. 17 A voi thumnak, “Johan tiapa Simon, ma daw cim?” tiah a ti. A voi thumnak, “Ma daw cim?” a ti ruangah Piter cu a thin a tiak. Culeh Jesuh cu, “Bawipa, izongza na tiah hin; ka tan dawt cu na tiah kau hin,” tiah a ti. Jesuh ni, “Ka tuule cawm hngai law. 18 Thungaite in ka tan sim, na nawhdeuh lio ahcun na tavai vaiin na dawtmi khawnangpoh ah na vak ta bil. A inain na ucan tikah na baan phar lei ci khawh, mi pace ni tavai tan vaisakin na vah dawt lonak hmun ah an tan pita thok,” tiah a ti. 19 (Hiti a ti hi Piter ni itumang ih a thihnak thawngin Pathian a sunparsak thok ti a sawhkhit dawtmi a ii.) Acu hnukah Piter cu, “Ma zul,” tiah a ti.

20 Piter cu a mertia ih an dungin Jesuh ih dawtmi kaizul ni anmah a zulh hngai a hmu; acu pa cu zanriah an awk lio ih Jesuh sontu ah toin, “Bawipa, ahu ii maw a tan leirawi thok tu cu?” tiah a ti ta tu khi a ii. 21 Piter ni amah a hmuh tikah, Jesuh cu, “Bawipa, hi pa thuhla teh khawti in i lei maw?” tiah a ti. 22 Jesuh ni, “Ka phat tiang a taantak ka dawtzawng a ik ahcun, acucu nang rum itu a pehpontia hmen? Ma zul kau!” tiah a ti. 23 Curuangah hih kaizul hi cu a thi thok dok lo timi dokthu cu Jesuh zultule lakah a karh. Ihmansela Jesuh ni a hemah thi lo dingin cu a sim lo ih, “Ka phat tiang a taantak ka dawtzawng a ik ahcun acucu nang rum itu a pehpontia hmen?” tiah zong a ti.

24 Ahihi hih thilpawl an thu a tiah hngai tu leh a ngan hngai tu kaizul a ii, culeh a thusim a hmaan ti kan tiah. 25 Ihmansela Jesuh ih vuaktakmi thil pace tlungpi khaw an om kau; mi pakhat ni ngan hngai thok sela, a ngan thok mi laibu cu vuleipi ah a tlum cawk thok lo tiin ka ruat.