5 “Apek in nan hemih hi thilpawl ka sim lo cu nan hemih ka omtak ruangah a ii. A inain atu cu a ma thlahtu hemah ka tat thok; a inain ahuhman ni, ‘Khawnang ah na tat thok hmen?’ tiah ama dil hngai lo. 6 A inain hi thilpawl nan hemih ka sim ruangah nan thinlung cu ngaihsiatnak in nan khat. 7 Amahbelte, thungai ka tan sim hngai: ka tah mianmi hi nan Žhathnemnak caah a ii, icatile ka tah mianmi lo ahcun nan hemah Khunsatu a pha thok lo. A inain ka tah ahcun nan hemah amah ka thlah thok. 8 Culeh a phat tikah vulei mipawl hi sualnak, dingfelnak leh thuŽhennak thu ah an palh ti a lansak thok. 9 Sualnak thu ahcun, ama zum hngai lo ruangah; 10 dingfelnak thu ahcun, Pa hem ka tat thokih nangmi ni ama hmuh hngai ti thok lo ruangah; 11 thuŽhennak thu ahcun, hi vuleipi uktu cu sual thuŽhenpiak a ik rom ruangah. 12 “Nan hemih sim awk tlungpi ka ngei hngai rih, a inain atu cu nan phur zo lo. 13 Thutak Thlarau pha taw zong ah, thutak zate ah tan hruai hngai leh lei; icatile amah ih thu in a ang thok lo, a zak mipoh a ang thok, cun a pha lai thok mi thilpawl nan hemah a simthan thok. 14 Kamah ih ta lahratin nan hemih a simthan thok ruangah a ma sunparsak thok. 15 Pa ih ngeihmi hmawh cu kamah ih a ii. Ahi ruangah kovawh kamah ih ta lahratin nan hemah a simthan thok ka ti nak cu.

16 “Ihlet hlanah nangmi ni a ma hmu hngai ti thok lo, cun ihlet hlanah a ma hmu hngai sei thok,” tiah a sawn. 17 Cutikah a kaizulle hrekkhat cu pakhat leh pakhat, “‘Ihlet hlanah nangmi ni ama hmu hngai ti thok lo, cun ihlet hlan sei ah ama hmu hngai thok’; culeh ‘Pa hem ka tah thok ruangah’ a man ti hi itu a tican i na la?” tiah an ti tia. 18 “‘Ihlet hlanah’ a ti dawtnak itu i na? Itu thu a sim ti tiah hlah hu ee,” an ti. 19 Jesuh ni amah an dil dawt cu a tiah, curuangah, “Ihlet hlanah nangmi ni ama hmu hngai ti thok lo, cun ihlet hlan sei ah ama hmu hngai thok’ ka ti tikih ka tidawtmi itu a ik nan thluktia rero hetu hmen? 20 Thungaite in ka tan sim hngai, nangmi cu nan ngaihsiain nan Žap thok, a inain vuleimi cu an tha a nuam thok; titiak nan tuar thok, a inain nan titiak cu lungawinak ah a cang thok. 21 Numi pakhat cu a nausanpiak tiah caan ni a tlun ahcun a mah ih caan a phat ruangah titiak a tuar. A inain a nau a suah tikah cun, vulei cungah minung pakhat a suah ngah ruangah lungawiin a titiak a palhtia. 22 Curuangah atu cu nan ngaih a sia; a inain ka tan tuak hngai Žhan thokih nan thin a nuam thok, cun ahuhman ni nan lungawinak cu an tan sut zo thok lo. 23 Cui ni ahcun nangmi ni itu thu hman ama dil hngai ti thok lo. Thungaite in ka tan sim hngai, Pa hemah ka min in itumaw nan dilmi cu a tan pia hngai kau thok. 24 Atu tiang cu ka min in ituhman nan dil rih lo. Dil uh la nan ngah thok, acucu nan lungawinak a kim nak dingah a ii.

25 “Hi thilpawl hi nan hemah sawhcengeimi hmang in ka sim. Nan hemah sawhcengei in ang loin, Pa ih thu fiangte ih ka tan sim hngai caan a pha thok. 26 Cui ni ahcun ka min in dil leh lei cu, Nan can-ai ah Pa hemah ka dil thok ka tan ti hngai lo; 27 icatile nangmi ni ama daw hngai ih, a hemin ka pha ti nan zum ruangah Pa amah rori ni a tan daw hngai. 28 Pa hem in vuleipi ah ka pha; vuleipi mata in Pa hemah ka tat sei thok,” tiah a ti hngai. 29 A kaizulle ni, “A ii, atuhi sawhcengeimi hmang loin fiangte in na ang pan. 30 Atuhi thil zate na tiah hngai ti kan tiah, cun pakhatkhat ni thu tan dil na Žul lo; ahi thawngin Pathian hemin na pha ti kan zum,” tiah an ti. 31 Jesuh ni, “Atu hi nan zum maw? 32 Mah le inn vek panin nan parcakih, kamah ceu ama mattak hngai caan pha leh lei, a ngaingai ahcun a pha rom la. A inain Pa ni ama ompi ruangah kamah ceu cu ka i lo. 33 Kamah sungah nangamnak nan ngeih nak dingah ahihi ka tan sim hngai. Vuleipi ah hin hartuarnak nan tuak. A inain tha la uh; vuleipi ka neh rom!” tiah a sawn hngai.