2
Rundamnak parih Ralrinpiaknak
1 Curuangah kan zak rommi thu hi thupi deuh in kan siah awk a ii, cuticun a pialta mianmi hlah taw ung.
2 Icatile vanmile thawngin thanmi thu cu a Žhorihmi a ikih, a buar leh a cangngailo poh ni a dinghmanmi dantatnak a co ahcun,
3 cutluk ih a pipami rundamnak thluhmaulo kan ik ah khawti in hilei kan luat thiam? Bawipa thawngin than peitatleng a ii ih, a za tule ni kan hemah ahmaan zia an lansak.
4 Pathian ni a tiahpinak cu hmuhsaknakpawl, donharŽhapawl leh khuaruahhar a phunphun in, culeh a dawtzawng mangin a phunphun in a zem hngaimi Thiang Thlarau laksawngpawl thawngin a Žhosak.
Ningzahsaknak in Cawisannak ah
5 A thuhla kan sim reromi, a pha laithok mi vulei hi Pathian ni vanmipawl hemah an uk dingin a siah hngai lo.
6 Ihmansela pakhatkhat ni hmun khatkhat ah,
“Minungle cu itu zetzo
an ii ah na siaherh hngai duh,
iklole thikhomipawl
takkau maw na
donphiar hngai?
7 vanmipawl vanin
niamdeuh duau
na vua hngai;
sunparnak leh upatnak
lukhum na khum hngai,
8 an ke tangah izongza
na sia hngai,”
tiah a simŽhan.
An thu tangah izongza a siah ahhin Pathian ni ituhman an uknak leengla ah a mata lo. Atu ih a ik mang hi cu, izongza hi an thu tangih a om kan hmu rih lo.
9 Ihmansela caan tawite sung vanmipawl vanin niamdeuh duau ih cansakmi, Pathian velngeihnak thawngin micangte caah thihnak tep dingih timi Jesuh tu cu, thihnak a tuar ruangah sunlawinak leh upatnak siangpahrang lukhum khum a ii ti kan hmu.
10 Pathian, amah caah leh amah thawngin thil zate a omsaktu ni, tianau tlungpi sunlawinak ih a phatpinak hngai ahhin an rundamnak hmaihruaitu cu tuarnak thawngin a tlamtlinsak awk cu a mawimi a i kau.
11 Icatile a thianfaitu leh a thianfaimi an zate ni Pa pakhat an ngei. Ahi ruangah Jesuh ni anmahpawl cu ka unaupawl tiih kawh hngai a zahpi lo,
12 “Ka unaule hemah
Na min ka simphuang thok,
mizapi lakah
ka tan thangŽhat thok,”
tiah a ti.
13 Culeh,
“Amah cu ka rinsan thok,”
tiah a ti sei.
Cun,
“Kei leh Pathian ih
ma piakmi tianaupawl
hinangah kan om,”
tiah a ti sei.
14 Curuangah tianaupawl cu thi le sa a Žomtiami an ii, amah hrimhrim khaw thihnak parih huham ngeitu, khawsia timi, siatsuah dingah leh,
15 an nunnak cu thih hrul ruangih sal ah ponhreen a i mipawl luatsak hngai dingah, thi le sa cu a Žom ve.
16 Icatile vanmipawl bawn hngai dingah iloin, Abraham ih hrinsarle tu bawn hngai dingah a pha ti cu a fiang kau.
17 Curuangah ani cu a kap cangin a unaupawl mang a can a Žul, acucu Pathian rian ah velngei leh rinsantlakmi Tlangbawi Saang ii in, mipawl an sualnakpawl ca-ih sualthlahnak rai hritia dingah a ii.
18 Amah hrimhrim cu a tuarmi thawngin hniksak a iktak ruangah, hniksak a ilio mipawl a bawn hngai zo.