2
1 Icatile nanmah caah leh Laodisia khua ih a om tupawl caah leh hmaitonin amah hmu rih lo tu zate caah ii tlukin ka Žuan ciamco ti hi nan tiah ding ka daw.
2 An thinlung dawtnak in thapiak leh punkhat an ik ding ka daw, acucu tiahthiamnak fiang ih lennak zate leh Pathian ih thuthuk tiahnak an ngeih nak dingah a ii, cucu Khrih amah rori cu a ii.
3 Amah sungah tinnak leh thutiahnak hlawnthilpawl cu thuh an ii.
4 Hihi ka simnak cu ik hoihmi thu-alnakpawl rum ahuhman ni a tan deuh ngah hngai lonak dingah a ii.
5 Icatile ka ruangpun in om hlah hman ningla thlarau in cu nan hemah ka om siksik, culeh nan thinlung omdan leh Khrih nan zumnak a Žho zia hmuh thok ka thin a nuam.
Khrih sung Nun ih Kimhlannak
6 Khrih Jesuh cu Bawipa ah nan co rom ruangah, amah sungah nun peh uh la,
7 amah sungih hramthlami leh sakmi, cun zirh nan iktak mangin zumnak ah dinngahmi ii uh, lungawi thusimnak in khat uh.
8 Khrih ih ta iloin, minung thurosiah leh van leh vulei lakkar uktu thlaraupawl ih ta in a imi deuhtiaknak kuahom hmangin ahuhman ni sal ah tan vua hngai lo dingah ralring uh.
9 Icatile Pathian iknak zate cu Khrih sungah ruangpun in a om,
10 cun uktu leh thungeihnak cangte ih lu a imi amah sungah kimngahnak cu nan pha rom.
11 Amah sungah thlaraula in phawzimŽhawh khaw nan ii, acucu Khrih ih ta mang a imi, tiksa ruangpun ih hiamnak phoihtiak khi a ii.
12 Amah rum tihnimnak ih vui nan ik ahkhin, amah mithi lakin a thawhsaktu Pathian ih huham nan zumnak thawngin amah rum thawhsak nan i ve.
13 Cun daanbuar sualnakpawl leh nan tiksa ih phawzimŽhawh lomi nan iknak thawngin mithi nan ik lio ah Pathian ni amah rum a tan nunsak khat hngai. Kan daanbuarnak hmawhhmawh a man ngaidam,
14 kanmah kalhkaap ih ngankhummi cazin cu a sungih a man torhmi hmawh rum a phiat hngai. Acucu thinglamtah ah khenin a phiat.
15 Uktupawl leh thungeitupawl cu an siihaar sut hngai in ralponmi mangin mizapi zoh-awk ah a vua hngai, cuticun anmah a neh hngai.
16 Curuangah awk leh din thupawl ah iseh, puaipawl vuak thu ah – ni thiang leh thla thar puai, iklole Sabbath ulh thu ah iseh, ahuhman sual thu Žhen sak hlah uh.
17 Ahipawl hi cu a pha laithokmi ih thlaam ceu an ii, a ngaingai cu Khrih a ii.
18 Mah leh mah tangnau ih vuaktiak leh vanmipawl biak mitorh teenti tu, lansaknakpawl ring ngai in, minung thuruahdan in a porhtiami ahuhman ni tlingtlaklo ah tan vua hngai hlah seh.
19 Hlikcaangpawl leh thahripawl ni muaitau leh tlaikhatin, Pathian hemin a imi Žhanlennak rum a Žhangmi ruangpun zate ih lu a i tu Khrih cu an tlaiŽho lo.
Zirhtusualle ih Zirhnak Ralring uh
20 Vanrangkulh ih hrihhram uktu thlaraupawl hemah Khrih rum a thi khatmi nan ik ahcun, ituruangah vulei ih ta i rih uh la mangin nan nung? Ituruangah zulhawk daanpawl,
21 “Tham hlah uh, Tep hlah uh, Tong hlah uh” timi zul dingin nan piatia?
22 Hi zulh ding daanpawl an zate hi ni hman tikih rawkcihmi thilpawl an sawh, minung ih thupiakpawl leh zirhnakpawl theihtheih an ii.
23 Hipawl hi mahte hnektiakmi zuamnak, niamcuhnak leh punsa hremnak tipawl Žhansosaknak ahcun tinthu mangin an lang taktak kau, ihmansela mah thlahthlamtiak donkhamnak ahcun santlaihnak an ngei lo.