7
1 Ka dawtngaimi hngai, ahi thutiampawl kan ngeih ruangah ruangpun leh thlarau hnomtam saktu cang hemin thianfai tia ung la, Pathian Žihzahnak in thianhlimnak cu tlamtlin sak le hu.
2 Man cosang kau uh; ahuhman kan tisual lo, ahuhman kan siatsuah lo, ahuhman kan hleep lo.
3 Ahihi nanmah mawh tan thlaih hngai dingah ka sim lo, icatile thi khat ding leh nung khat dingin kan thinlung ah nan om tiin a hlanah ka sim ta.
4 Nan thuhla ah ka porhtia ŽiuŽeu; ka hmai nan hngal ngai; thinhnemnak rum ka khat; kan hartuarnak hmawh ah ka lungawi hleihluan.
5 Icatile Masidonia peng kan luh tik hman ah kan ruangpun cu cawlhngattiak a ngei lo, pawnla ah thu-altiaknak, sungla ah Žihphannak tiin lam kip in hartuarsak zong kan ii.
6 Ihmansela, thinnau mipawl thin hneem hngai tu Pathian ni Titas ih phatnak thawngin a man hneem.
7 A phatnak thawngin ceu iloin, a thin nan hnem laaknak thawngin khaw a i ve. Kamah ca-ih nan lakhlahnak, nan lungzuurnak, nan thathawhnak a man sim tikah ka tha a nuam rih hlehhlo.
8 Icatile ka laikuat in nan ngaih ka tan siatsak hngai hman ah ka ngaisirtia lo (ka ngaisirtia kau nain, icatile cangkhatte ceu a inain a khi laikuat khin nan ngaih ka tan siat sak hngai ti ka tiah).
9 Atu ahcun ka tha a nuam, ngaihsiatsak nan ik taak ruangah iloin, nan ngaihsiatnak ni sualrimnak ah a tan hruai ruang tu ah a ii. Icatile Pathian thudawt ngaihsiatnak nan tuar, cuticun keimi thawngin khawtilam hmanih harnakpiak nan ita lo.
10 Icatile Pathian dawtzawng ngaihsiatnak ni cun runnak laah mihruaitu sualrimnak a suahsakih ngaisirtiak awk a om lo, vulei ngaihsiatnak ni tu cu thihnak a suahpi.
11 Pathian thudawt ngaihsiatnak hi ni nan sungah itu a suahsak ti zoh hnik uh. Zuamnak, nanmah leh nanmah kan suallo ti tia dingah thathawhnak, thintawhnak, thlakawknak, ma hmuh lakhlahnak, palhnak daantat dingih zuamnak, tiaritiaknak, tipawl a suahpi zia hi! Ahi pawl ahhin a itu mawhngeilo nan ik zia a lam kip in nan lansak rom.
12 Curuangah lai ka tan kuat hngai a ik taak hman ah, thilpalh a titu pakhat ruangah a i lo, iklole a parih thilpalh ti a tuarmi ruangah khaw a i cuang lo, kanmah ca-ih nan zuamnak cu Pathian hmaika ah nan hemih lansak a iknak ding tu ah a ii.
13 Ahi ahhin tha kan ngah ngaite. Kanmah ih thangah hleiah, nan zate thawngin Titas cu lungngamsak a ik rom ruangah, a lungawinak ah kan lung a awi rih hlehhlo.
14 Icatile nanmah thuhla ah Titas hemih a porhtia phun ka ik taak ahcun, mualphosak ka i ta lo; ihmansela, nan hemih kan simmi izongza a hmaan mangin, Titas hemah kan porhtiaknak cu a hmaan ve ti a lang rom.
15 Culeh, nan zate ih thuzulhnak leh thinphang leh dok-awthah in a man cosanlak zia a cinken ruangah a tan tlaihsannak hngai cu a ngek hlehhlo.
16 Nanmah parah lunglumnak kimhlang ka ngeih ruangah ka tha a nuam.