1 Ihmansela Ananias timi pa cu a nupi Safira ih lungkimnak in an thilngeihmi a seu a zuar. 2 A nupi ih tiahpinak in an thil man hrekkhat cu an sup ih a hrekkhat ceu tirhthlahle hemah an pia. 3 Piter ni, “Ananias, icaah Thiang Thlarau deu dingah leh lo man hrekkhat sup dingah Satan ni na thinlung a tan khah? 4 Zuar lo ih a taan ahcun namah ih ta a i lo maw? Cun zuar hnukah teh a man cu namah ih thuthu a i lo hmen maw? Icaah ahimang thil ti ding hi na thinlung in na ruatkhang a he? Minung na deu lo pi, Pathian na deu hekhawh!” tiah a ti. 5 Ananias ni acui anka a zak tikah a ngalih a thi. Culeh acui thu a za tu hmawhhmawh an luki a paw ngaite. 6 Tlangvalle pha in a ruak an zawl hnukah an hei zawntia ih an vui. 7 Alukkarih nazi pathum hrawng hnukah a nupi cu itu a cang ti tiah lopi in a lut. 8 Piter ni a hemah, “Nang leh na pumah ni nan lo cu ahi zet man ah maw nan zuar ti ma sim hnik,” tiah a ti. Ani ni, “Ii ee, ahihi a man cu a i kau,” tiah a ti. 9 Cutikah Piter ni a hemah, “Icaah Bawipa ih Thlarau hniksak dingah nan thu a caangtia? Zohhman, na pumah vui tule ih ke cu sangka hramah an om, namah an tan hei zawntia ve thok,” tiah a ti. 10 A ngal ih Piter ih ke hramah a thi vohvi. Tlangvalle an luh tikah a thi in an hmu. Curuangah hei zawntia in a pumah hrialah an vui. 11 Pawlpi punpuluk leh hi thilpawl a za tu an zate an luki a paw ngaite.

12 Tirhthlahle thawngin mizapi lakah hmuhsaknak leh donharŽha tlungpi vuak a ii. An zate in Solomon ih Zaumu ah an om. 13 Mizapi ni cu an upat ngai nain mipace ahuhman ni an telpi hngai ngam lo. 14 Cuhmanah numi iseh, pami iseh, zumtu mipun tlungpi cu Bawipa zumtu ah a hlan vanin beeng an i hlehhlo. 15 Curuangah an mitiakpawl khaw lampika laah zawntia in, Piter an hrial a vah pah ah a thlaam tal ni a hliap hngai taw tiin metnak leh tangthah parah an thlim hngai. 16 Jerusalem hrialkam khuapawl in khaw mi tlungpi an khawmtia ih, mitiak, cun khawsiale ih harnak piakmipawl an hruaita, culeh an zate damsak an ii.

17 Cutikah Tlangbawi Saang leh amah rum a om mipawl (Sadusile ih pawl tican) cu nahsuahnak in an khatih, 18 tirhthlahle cu ponin zapi thawnginn ah an thla. 19 Ihmansela zan ah Bawipa ih vanmi pakhat ni thawnginn sangka hongin a suah hngai ih, 20 “Tat uh la, biakinn ah dingin mipipawl hemah hi nunnak thu a punpuluk in sim hngai uh,” tiah a ti. 21 Acucu an zak tikah biakinn ahcun khuavang fangah lutin an thuzirh cu an thawh. Tlangbawi leh amah rum a om mipawl an phat tikah, Sanhedrin leh Israel upa zate ko khatin, an thawngtlale an hmaiah suahpi dingin mi an thlah. 22 Ihmansela biakinn kiltu palikle acunangih an tah tikah tirhthlahle cu thawnginn sungah an hmu lo; curuangah kirin, 23 “Thawnginn cu himte in tlangtia leh a kiltule sangka ih an din cu kan hmu kau, a inain kan hon tikah a sungah ahuhman kan hmu lo,” tiah an zaksak. 24 Acui thu cu biakinn kiltu bawi leh tlangbawi upale ni an zak tikah, itu cang thok nala tiin an thuhla ah an thin a hnok. 25 Cutikah mi pakhat pha in, “Ngai hnik uh, thawng ah nan thlak mi le cu biakinn sungah dingin mipawl thu an zirh rero hekhawh!” tiah thu a than. 26 Cutikah biakinn kiltu bawi leh biakinn palikle tatin tirhthlahle cu kutthlaktia loin an hruai, icatile mipi ih lungphon thok an phang. 27 An hruai ngah tikah Sanhedrin hmaiah an din sak. Tlangbawi Saang ni, 28 “Hi pa ih min hmangin thuzirh lo dingah ngekngeihin thu kan tan kaa, a inain Jerusalem cu nan thuzirhmi in nan khahsakih a thisan khaw kanmah parah mawh man phurhsak dingin nan ruatcat tia,” tiah a ti hngai. 29 Ihmansela Piter leh tirhthlahle ni, “Keimi cu minung thu vanin Pathian thu kan ngai sawn thok. 30 Kan pipule ih Pathian ni thing parah thlaiin nan thah mi Jesuh cu a thawhsak. 31 Israelmi sualrimnak leh an sual ngaidam ngahnak dingah Pathian ni cawisangin a vorhla ah Hruaitu leh Rungtu ah a sia. 32 Culeh keimi cu ahi thilpawl tiahpitu kan ii, cun Pathian ni amah thu a cangngai tupawl hemih a piakmi Thiang Thlarau khaw thutiahpitu a i ve,” tiah a sawn hngai. 33 Acucu an zak tikah an thin kaangaw hngai in tirhthlahle cu thah an daw. 34 Ihmansela Sanhedrin lakih Gamaliel timi pa, mizapi ih upatmi Daanzirhtu cu hang dingin, tirhthlahle cu pawnla ah suahsak duau dingin thu a pia hngai. 35 Cuhnukin an hemah, “Ka phunpile hngai, hile parih nan ti khaihmi hi Žhate in ruat hnik uh. 36 Kan dung ihlet maw lio ah Theudas timi pa hang suakin mizokzaklo in a simtia ih, minung zali tluk ni an zul; ihmansela thah a tuakih amah zultu an zate parcakin an hmalak. 37 Amah hnukah Galilee pengmi Judas cu milu cazin vuak caan ah a tho ih mipawl a dung a zulh sak hngai. Ani khaw a rawkcat, cun amah zultule khaw an parcak. 38 Curuangah atu ih thu ah hin, ka tan sim hngai, hilepawl hi tong hlah uh, anmahte om men uh seh; icatile hi khuakhang leh thiltinak hi minung ih hramthawhmi i taw ah a tlolh thok; 39 a inain Pathian i hramthawhmi i taw ah zong cu nan hre kho thok lo – Pathian ralsanih do rero hman nan i kho men hena maw!” tiah a ti hngai. An lung fiang kau a vua hngai, 40 culeh tirhthlahle cu an kawhsak Žhanih an vel sak. Cuhnukah Jesuh ih min in thusim lo dingah thu an kaa ih an thlah. 41 Sanhedrin thurelnak hmun an suahtak tikah Jesuh ruangih mualpho tuar tlak ah ruah an ik cu an lung a awi. 42 Culeh nicangin biakinn sung leh inn ah Jesuh cu Messiah a ii timi zirh leh simphuan an awl lo.