22
1 “Ulenau leh pale hngai, atu nan hmala ih ka Žantiaknak hi ngai hnik uh,” tiah a ti hngai.
2 Hebru aan in an hemih thu a sim hngai an zak tikah an dai hoi hlehhlo. Culeh ani ni,
3 “Kei cu Judahmi, Silisia peng Tarsas khuapi ih suak, a inain hi Jerusalem khuapi ah Gamaliel ke hramah kan pupa Daan mangin fekte ih zirh leh a hanghnem mi ka ii. Nihinni nan zate mang hin Pathian laah punpiatia ngaimi ka ii.
4 Numi leh pami ŽemŽawn hngai ih thawngthlak hngai nak thawngin hi Lampi a zultule hi thi kau ka hrem hngai.
5 Tlangbawi Saang leh Sanhedrin upale an zate ni ka thuhla an sim kho kau. Anmah hemin a ii Damaskas khua ih unaupawl piak ding laiken ka ngah, culeh acunang ih a om mipawl ŽemŽawn hngai in Jerusalem ah hrem dingih hruaita hngai dingin acunangah ka tat.
(Tirh 9:1-19a; 26:12-18)
6 “Ka tatih Damaskas ka hnaih lio, sun hrawngah vancung in khuatle hnempi cu ka velkim ah a tle lohli.
7 Khur ah ka tla ih, ‘Saul, Saul, icaah ama hrem rero?’ tiah ama ti tu aw pakhat ka za.
8 ‘Ahu ii cimaw, Bawipa?’ tiah ka sawn. Cutiah ani ni, ‘Kei cu na hrem rero mi Nazareth khuami Jesuh ka ii,’ tiah a ma ti.
9 Ka vahpile ni khuatle cu an hmu nain a ma bia rero tu cu a aw an za lo.
10 ‘Itu ti lang maw, Bawipa?’ tiah ka dil. Bawipa ni, ‘Tho la Damaskas ah tat; acunangah na ti awk izongza sim na i thok,’ tiah ama ti.
11 Khuatle ih cernak ruangah khua hmu kho hlah ing khawh, ka vahpile ni ka kut in Damaskas ah ama hruaita hngai.
12 “Daan mangin punpiatiatu leh acunang ih Judahmi zate ni a thu an relŽhat mipa Ananias a om,
13 ma pha in ka hramah a dingih, ‘Unaupa Saul, khua hmuŽhan law!’ tiah a ma ti. Acui caan rori ah khua ka hmuŽhanih amah ka hmu.
14 Cutikah ani ni, ‘Kan pupale ih Pathian ni a dawtzawng tiah dingah, Mi Dingfel hmu ding leh a aw za dingah a tan ril rom;
15 icatile na hmuh leh na zakmi thu hi vuleicung zate ah amah thutiahpitu na i thok.
16 Atu hi icaah na nolnawk? Tho la, tihnim ii, cun a min ko la na sualnakpawl thianfai ii law,’ tiah ama ti.
17 “Jerusalem ih ka kir hnuk, biakinn sungih thla ka cam lio ah, tiahtialoin ka omih
18 Jesuh ni, ‘Hnawtia la Jerusalem in suak lohli, icatile ka thuhla na simmi an tan cosaan duh thok lo,’ tiah ma ti in ka hmu.
19 Culeh kei ni, ‘Bawipa, sinakok cang ah namah atan zumtu pawl thawng ka thlak hngai cu an tiah kau.
20 Cun na thutiahpitu Stefen ih thi a luan lio ah kamah rori a hramah ka ding, ka lungkimpi hngai ih amah that tule ih angki pawnthuahpawl ka put piak hngai,’ tiah ka ti.
21 Cutikah ani ni, ‘Tat kau, icatile Zentail-mipawl hem lamhlapi ah ka tan thlah thok’ tiah a ma ti.”
22 Acu tiang ahcun a thu sim cu an ngai kau, acu hnuk zong cu, “Acumang minung cu vulei hin hma mianmi tia seh! Icatile nun sak awk a tlak lo,” tiah an au.
23 Culeh an au rero, an angki pawnthuahpawl an hawr lio, vaan la-ih vutning an han vorh lio ah,
24 ralbawipa ni Paul cu ralkap omnak inn ah hruaitain, icaah amah ralsanin an au timi a ruang tiah dawt ah thawi hratin hlekhlai dingin thu a pia hngai.
25 Ihmansela saphaw hrual in an Žawnngah tikah Paul ni a hrial ih dingtu ralkapzabawi cu, “Sualthu relpiak lomi, Rom miphun iknak ngeitu pakhat thawi cu na caah a phung a i hmen maw?” tiah a ti.
26 Ralkapzabawi ni acu a zak tikah ralkap thawng khat uktu ralbawi hemah tatin, “Khawti in ti leng lei ci maw? Hi pa hi cu Rom miphun iknak a ngei hekhawh,” tiah a ti.
27 Ralkap thawng khat uktu ralbawi ni Paul cu, “Nang hi Rom miphun na ii maw?” tiah a dil. Culeh Paul ni, “Ii ee,” tiah a ti.
28 Ralbawipa ni, “Rom miphun iknak ngah dingah tangka tlungpi ka deng henaah,” tiah a ti. Paul ni, “Kei cu Rom mi icia in ka suak,” tiah a ti.
29 Amah a hlekhlai khai tupawl cu a hemin an con lohli; Paul cu Rom miphun iknak a ngeih leh Rom mi a ŽemŽawn ti a tiah ruangah ralkap thawng khat uktu ralbawi pa khaw a phang ve.
30 Judahpawl ni Paul an puhmawh cu ituruang tleng ah a ik tiahngah a dawt ruangah ralbawipa ni Paul cu a zingla ah a thlahih Tlangbawi upapawl leh Sanhedrin upa an zate cu tuaktia dingin thu a pia hngai. Paul cu a pita ih an hmala ah a din sak.