1 Buainak a daih hnukah Paul ni zumtupawl a cah hngai; culeh thapiak hngai leh damte in ti Žianbiak hngai a uh hnukah Masidonia ah a tat ta hngai. 2 Cui hmunrampawl a tlon pah miarmo ngah leh thapiaknak tampi a sim hngai hnukah Grik ram ah a tat. 3 Acunangah thla thum a caam. Siria ram laah lawng in a tah samte ah Judahpawl ni amah phiarhrualnak an vua, curuangah Masidonia la in kirŽhan dingah a ruatcattia. 4 Berea in Pirhas ih tiapa Sopater, Thesalonika in Aristarkhas leh Sekundas, Derbe in Kaias, cun Asia ram in Timote, Taikhikas leh Trofimas le ni khaw an zul. 5 Anmimi cu an tat li ih Troas khua in a man hngak la; 6 ihmansela Colnu phulhlo Sang puai hnukah Filipi in lawng in kan pokih, ni nga sungah Troas ah kan man hngai, acunangah ni sarih sung kan caam.

7 Zarh khat ih ni peitatleng, zanriah aw khat dingih kan tuahtiak tikah, Paul cu a khawmtia tule hemah thu a sim; a zingla ih pok dingin a Žhencahtiak ruangah zanruang tiang thusim a peh berbo. 8 Kan khawmtiaknak inn cungta khaan ahcun meiinn tlungpi an vang. 9 Zutikhas timi mino pakhat, sangkate parih a totu cu, Paul ni saudeuh thu a sim rih lio ah a met ni a thlim. A met Žhat ruangah inn dot thumnak in khur parah a tla ih a thi in an sar. 10 Ihmansela Paul cu zong Žumin a cungla ah kumin a cawi ih, “Nan thlakawk hlah uh law, a nung kau,” tiah a ti hngai. 11 Cuhnukah Paul cu cungta dot ah a hang kai, culeh sang seuin a awk hnukah khuaŽhian tiang thu a thluk hngai; cuhnukah a tat. 12 Acu lio ah tlangvalpa cu anungin an tahpi ih zokzakloin an na a ngam.

13 Lawng ah tat li in Assos ah kan tat, acunangah Paul sawmpah kan khaitia; icatile amah ceu vulei lam in vah a khaihtiak ruangah amah ih tawlrelmi a ii. 14 Assos ah a man tuahlaak tikah lawng parah kaisakin Mitilene ah kan tat. 15 Acunang in lawng in kan tatih a zingla ahcun Khios tikulh ralcuan kan pha. A tip ah Samos kan pal ih a khiam sun ah Miletas kan pha. 16 Paul cu Asia ram ih caan hman Žul lo dingah Efesa khua lonin lawng in tat dingah a ruatcattia; a cankhawh ahcun Pentikos ni kheel in Jerusalem ih om ding a lakhlah.

17 Miletas khua in Efesa khua ah thu a thlah ih, pawlpi upale ni amah tuak dingin a tirh hngai. 18 A hem an phat tikah, “Asia ram ka phat ni in thawh in ka caan hmawhhmawh cu nan lakah khawti in ka hmang ti nanmah rori ni nan tiah. 19 Bawipa cu niamcuhnak zate leh mitthli rum ka rian ih, Judahpawl ih phiarhrualnak thawngin a phami harsatnakpawl cu ka tuar thah. 20 Mibawntu thil vuak cu ka sup lo, nan hemah thu simphuangin zapi hmuh in leh inn khat hnuk inn khat ah ka tan zirh hngai, 21 Judahpawl leh Grik-mipawl hemah Pathian laah nun Žhintiak leh kan Bawi Jesuh an zumnak ding thu ka sim hngai thah ah. 22 Culeh atu cu Thlarau thu zulin, Jerusalem ah tat thok ka ii, acunangah ka parah itu a can thok ka tiah lo, 23 khuapi sung cang ah thawngthlak leh hremnakpawl ni ama hngak hngai timi Thiang Thlarau ih ama simthan simlo cu. 24 Ihmansela Pathian ih naktiahnak thuthangŽha sim dingah kan Bawi Jesuh hemin ka comi rian leh uk ih Žuan dingmi ka uh poh ahcun ka nunnak hi kamah caah itu manngei ah khaw ka rel lo. 25 “Cun atu hi Pathian uknak thu phungsim in ka vahhnawh rero mi nan lakah huhman ni ka hmel nan hmuŽhan ti lei lo ti ka tiah. 26 Curuangah nihinni nan hemih ka thanmi cu ahu maw nan thih ahcun kei Žuanvo ka ngei lo ti hi a ii, 27 icatile Pathian ih tumtahmi zate nan hemih than ding ka sup lo. 28 Nanmah leh nanmah kilkhawitia uh la, cun an cungah zokhentu dingah Thiang Thlarau ni a tan siah hngaimi nan ik mangin, Pathian ni a Tiapa ih thisan in a leimi pawlpi – turual – khaal dingah kilkhawi uh. 29 Ka omlo hnukah sahrangpawl nan lakah pha in turual an zuah thok lo ti ka tiah. 30 Nanmah lakin hman mi hrekkhat cu anmah zul dingah zumtupawl leem dingih thuhmaan merh-rawktu an suak leh thok. 31 Curuangah tiimvaar uh la, kum thum sung sun leh zan micangte mitthli rum ralrinnak tan piak hngai ka awl lo khi cingkeng uh. 32 Cun atu cu Pathian leh a velngeihnak thu – nanmah a tan saŽho hngai kho leh thiansakmi zate lakih rocoding a tan pia hngai thok tu thu sung ah ka tan ap hngai. 33 Ahu pakhat ih ngun iseh sui iseh partlai iseh ka nah lo. 34 Kamahte leh ka bangle cawm dingah ka kut rori in rian ka Žuan ti nanmahte nan tiah kau. 35 Ahi hmawh ahhin acumang rianŽuannak in mi ŽawnŽai kan bon awk a ii ti zohŽhimawk ka tan pia hngai. Kan Bawi Jesuh ih anka khi cingkeng uh, icatile amah hrimhrim ni, ‘Ngah la vanin piak la ah thlua a suakdeuh’ a ti,” tiah a ti hngai. 36 Aan a uh hnukah an zate rum khukbilin thla an cam. 37 An zate an Žap nasa; Paul cu bua in an hnam. 38 Amah an hmu ti thok lo ti a sim hngai ruangah an ngaih a sia hleice. Cuhnukah lawng ah an tahpi.