1 Sisaria khua ah Italy Ralkapbuur tiih kawhmi, Rom ralkapbuur pakhat uktu ralkapzabawi Korelias timi pa a om. 2 Amah cu a innsang rum Pathian Žihzahtu, punpiatiami; Judah mifarah bonnak siangngai in a pia ih Pathian hemah thla a camringring tu a ii. 3 Sunhnuk voikhat cu nazi pathum tluk ah lansaknak a hmuhmi sungah Pathian ih vanmi pakhat ni a hemah pha in, “Kornelias,” tiah a ti. 4 Kornelias ni Žihngai in darkauin a zoh ih, “Itu a ii, Bawipa?” tiah a ti. Vanmi ni, “Na thlacammi leh mibonnakpawl cu Pathian ni a palhtia hngai lo. 5-6 Atu hi Joppa khuami rili kap ih inn ngei, saphawŽuantu pa Simon inn ih a caam tu, Piter tiih kawhmi Simon hemah mi thlah hngai,” tiah a ti. 7 A hemih a ang tu vanmi a tah hnukah a sal pahnih leh amah kiltu ralkaple lakih pakhat, biaknakla punpiatiami a ko hngai. 8 Culeh izongza a sim hngai hnukah Joppa khua ah a thlah hngai. 9 A zingla sun hrawng, lam ih an tah lio leh khuapi an hnaih lio ah Piter cu thlacam dingah inn parah a hang kai. 10 A Ža a Žhi ih itumaw awk a daw; an zalh piak lio ah tiahtialoin a om. 11 Van hongtia in, thiltleep kaupi mang a imi thil cu a kil pali in vulei ah an zon Žhum a hmu. 12 A sungah cun ke li ngei hramsa phun zate leh bokvakpawl leh vatepawl an om. 13 Cuhnukah aw pakhat ni a hemah, “Piter, hang tho; that hngai la aw hngai,” tiah ti in a za. 14 Ihmansela Piter ni, “Aw hrimhrim hlah e, Bawipa; icatile athurhnawmmi leh athiang lomi ituhman ka aw thah lo pi,” tiah a ti. 15 Aw ni a voihnihnak, “Pathian ni thiangtai in a vuakmi cu nang ni athurhnawm na ti kho thok lo,” tiah a tiŽhan. 16 Acucu voi thum tiang a cangih a thil cu vancung ah han latŽhan a i lohli. 17 Piter cu a hmuhmi lansaknak ih tican a donhar rori lio ah, Kornelias ih thlahmi mi pahnih an suaklang lohli. Simon ih inn mi dilin kotka hramah an ding. 18 Piter tiih kawhmi Simon acunangih a caam leh caam lo mi von koin an dil. 19 Piter cu lansaknak thu a ruah rero lio ah Thlarau ni a hemah, “Ngaihnik, mi pathum ni an tan hrawl rero. 20 Atu hang tho la zong Žum, cun aicanglo in anmah rum tat, icatile kei ni ka thlah hngai,” tiah a ti. 21 Curuangah Piter cu acule hemah a zong Žumih, “Kei hi nan hrawl reromi pa cu ka ii; nan phatnak san itu ii maw?” tiah a ti hngai. 22 Anmimi ni, “Ralkapzabawi Kornelias, midingfel leh Pathian Žihzahtu, Judah miphun zate ni an upatmi cu vanmi thiang pakhat ni na sim thokmi thu ngai dingah namah hi a inn ih tan sawm dingin a tirh ih kanmah hi a man thlah,” tiah an ti. 23 Curuangah Piter ni sawm hngai in caamnak a pia hngai. A zingla cu a hang tho ih anmah rum an tat, culeh Joppa khua ih zumtu hrekkhat ni khaw an tahpi hngai. 24 A zingla cu Sisaria khua an pha. Kornelias ni ringla hngai in a sungkhatpawl leh a rualpi sungtapawl a ko khat hngai. 25 Piter a phat tikah Kornelias ni a ke hramah bokin a upat. 26 Ihmansela Piter ni zon thoin, “Hang ding law; kei hi minung ceu ka ii hekhawh,” tiah a ti. 27 Kornelias rum biatia thah in a lutih mitlungpi an khawmtia la ti a hmu; 28 culeh Piter ni an hemah, “Judahmi pakhat ni Zentail-mi lumlengih pawlkom cu daan a i lo ti nanmah rori ni nan tiah kau; a inain ahuhman mithurhnawm leh mithianghlimlo tiah ko hngai ding ka i lo ti cu Pathian ni ama hmuh rom. 29 Curuangah ama kawh tikah allote in ka pha. Atu hi icaah ma ko ci maw? tiah tan dil lang,” tiah a ti. 30 Kornelias ni “Hi hlan ni li, atu caan rori, nazi pathum ah, ka inn sungih thla ka cam rero lio ah rinlopi in mi pakhat cu partlai micer rum ka hmala ah a dingih, 31 ‘Kornelias, Pathian ni na thlacam a za ih na mibonpawl a cingkeng hngai. 32 Curuangah Joppa khuami, rili kapih saphawŽuantu Simon timi pa ih inn ah a caam tu Piter tiih kawhmi Simon sawm dingah mi thlah hngai,’ tiah a ma ti. 33 Curuangah ka tan sawm lohli, culeh nang le Žha hrat ci khawh na pha. Atu Bawipa ih a tan sim sakmi hmawhhmawh ngai dingah kan zate in Pathian hmaika ah kan om hi,” tiah a ti.

34 Cutikah Piter ni, “Pathian cu mithleidan a ngei lo ti ka tiahthiam taktak, 35 a inain miphun cang ah amah a Žihzahtu leh a hmaanmi a vua tupoh cu a cosang. 36 Israel mipawl hemih simmi Pathian thu – mi zate ih Bawipa a imi Jesuh Khrih thawngin remdaihnak – cu nan tiah kau. 37 Acui thu, Johan ni tihnimnak thu a simthan hnukah Galilee in thawhin Judea peng hlawhin a karhmi cu: 38 Pathian ni Nazareth mi Jesuh cu Thiang Thlarau leh huham rum thathau a hnulh zia; Pathian ni a ompi ruangah thilŽha vua leh khawsia ih luhhnawhmi hmawhhmawh damsak hngai ah a vah berbo zia, nan tiah. 39 Keimi cu Judea peng leh Jerusalem khua ih a vuakmi zate ah thutiahpitule kan ii. Thingkung parih an thlaitarnak thawngin an that; 40 a inain Pathian ni a ni thumnak ah a thawhsak ih, 41 mi zate hemah iloin Pathian ni thutiahpitule ah a rilmi kanmah hem leh, mithi lakin thawhsak a ik hnuk amah rum a aw ih a ding tupawl hemah lan a siang. 42 Amah cu Pathian ni mithi leh minung parih thuŽhentu ah a siahmi a ii tiin mipawl hemah sim ding leh phuang dingah thu a man pia. 43 Amah a zum tupoh ni amah thawngin sual ngaidamnak an co thok tiin amah thuhla profet zate ni an simthan,” tiah a ti hngai.

44 Piter a aan rero lio ah, a thusim a za tu an zate parah Thiang Thlarau a Žum. 45 Piter rum a pha khat tu phawzimŽhawhmi zumtupawl cu Zentail-mipawl parah hman Thiang Thlarau laksawng burh a ik an hmuh tikah an don a har. 46 Icatile aan phun ce ang in leh Pathian thangŽhatin an za. Cutikah Piter ni, 47 “Kanmah mangin Thiang Thlarau a co tu hile hi tihnim i lo dingah ahu ni hi lei a don hngai?” tiah a ti. 48 Curuangah Jesuh ih min in tihnim i dingah thu a pia hngai. Cuhnukah ni tlungpi sung an hemih caam dingah an sawm.