12
Ndai gaw sumsing lamu ni hpe kahpyan nna ginding aga hpe hpan da let, masha hpe sak jaw ya nga ai dai Madu kaw na Israela hte seng ai mungga rai nga ai. ?Ngai gaw Yerusalem hpe sabyi ntsin gawm mi zawn shatai na nngai; shing rai shi a grup yin na masha amyu baw ni lu nna chyaru nang ai ni zawn ndi nda rai na mara ai. Shanhte gaw Yerusalem hpe wang da mu yang, Yuda mung na naw ngam nga ai mare ni mung wang da ai hkrum na mara ai. Rai ti mung, dai aten du jang, ngai gaw Yerusalem hpe li ai nlung langai zawn shatai na nngai. dai hpe hpai ka-aw shakut mayu ai masha amyu baw kadai mung machyi hkrum na rai nga ai. Ndai mungkan na masha amyu baw ni yawng n-gun galung nna shi hpe gasat na mara ai. Dai aten hta ngai gaw shanhte a gumra ni yawng hpe hkrit kajawng shangun nna, gumra jawn ai ni hpe mana bu kau shangun na nngai. Yuda amyu masha ni hpe ngai mada yu nna shanhte a gumlau hpyen ni a gumra ni hpe myi kyaw shangun na nngai. Dai hpang, Yuda amyu lakung ni gaw shanhte a myit kraw kata hta, ?Chyahtum Chyalai N-gun rawng ai Madu Karai Kasang gaw Yerusalem hta nga ai shi a amyu masha ni hpe n-gun jaw ya nga ai,? ngu nna tsun na mara ai.
?Dai aten hta Yuda amyu lakung ni hpe maling kata na wan hte yi sun na hkauling kata na wan zawn shatai na nngai; shing rai shanhte gaw grup yin masha amyu baw ni hpe jahten shaza kau na mara ai. Yerusalem mare masha ni chyawm gaw mare kata hta shim lum ai hte shanu nga lu na mara ai.
?Dai Madu ngai nan Yuda hpyen hpung ni hpe shawng awng padang jaw na we ai, shaloi Dawi a amyu matu mara ni hte Yerusalem na amyu masha ni hkam la na shagrau sha-a lam gaw Yuda mung e naw ngam nga ai ni hta grau galu kaba lu nga ai n rai. Dai aten hta dai Madu gaw Yerusalem hta shanu nga ai ni hpe makawp maga ya na ra ai rai nna, shanhte hta na n-gun kya htum ai wa pyi Dawi zawn n-gun ja ai wa tai wa na ra ai. Dawi a amyu matu ni gaw dai Madu a lamu kasa zawn, rai sa Karai Kasang shi hkum nan zawn shanhte hpe lam woi na mara ai. Dai aten hta Yerusalem hpe gasat shakut mayu ai masha amyu baw shagu hpe ngai shamyit kau na nngai.
10 ?Dawi a amyu matu ni hte kaga Yerusalem mare masha ni hpe matsan dum ai wenyi hte hpyi nem tawng ban ai wenyi jahpring ya na mawe ai. Shaloi shanhte gaw si hkra galun hkrum ai wa hpe mada yu nna ma shingtai a matu sharung shayawt nga ma ai zawn, shi a matu hkrap ngu hkrap ngoi na mara ai. Shanhte gaw tinang a kasha alat hpe shamat kau ai ni zawn ahkup ahka nga mat hkra sharung shayawt na mara ai. Ref 12:10: Yhn 19:37; Shr 1:7. 11 Dai aten hta Megido pa layang e Hadad Rimon a matu sharung shayawt ai zawn Yerusalem hta sharung shayawt lam kaba byin wa na ra ai. 12-14 Dai mungdan hta nga ai dinghku shagu mung tinang nang a dinghku hku hkan nna hkrap ngu hkrap ngoi na mara ai. Dawi kaw na yu hkrat wa ai dinghku mung, Nahtan kaw na hkrat ai dinghku mung, Lewi kaw na hkrat ai dinghku mung, Shime kaw na hkrat ai dinghku hte kaga dinghku ni yawng lawm nga ai. Dinghku shagu gaw tinang dinghku hku hkan nna hkrap ngu hkrap ngoi na mara ai; dinghku shagu na lasha ni mung numsha ni hte kaga ga rai hkrap ngu hkrap ngoi na mara ai.