1 Mungdan up hkang ai ni hte ahkaw ahkang lu ai ni a npu e taw nga nna madat mara nga na matu mung, mai kaja ai magam bungli nga manga hpe galaw na jin jin rai nga na matu mung, na a hpung masha ni hpe shadum nga u. 2 Kadai hpe mung n kaja ai hku shatan nhkan ga n tsun ai sha sim sa ngwi pyaw hku hkau ai hku nga na hte, tut nawng masha yawng hte hpe sumnung ai myit madun dan mu ga, shanhte hpe tsun shadum nga u. 3 Hpa majaw nga yang, shawng de gaw anhte nan mung myit ngawk ai, n madat n mara ai hte shut hpyit lam dam ai ni rai ga ai. Anhte gaw ngang kayut ai hte pyaw daw kadaw ai lam amyu myu hkan galaw yu ai, de a mayam ni mung rai nga ga ai. Anhte hta galoi mung n ju n dawng ai hte manawn masham ai myit rawng nga mali ai hte, masha kaga ni anhte hpe n ju n dawng ma ai hte maren, anhte mung masha ni hpe n ju n dawng ga ai. 4 Rai ti mung, anhte a hkye hkrang la ai Karai Kasang a chyeju hte n gaw n wai myit dan pru wa ai shaloi e, 5 anhte gaw hkye hkrang la ai hkrum saga ai. Ndai zawn hkye hkrang la hkrum ai gaw anhte nan shachyen ai mai kaja ding hpring ai magam bungli lama ma a majaw n rai, shi nan a matsan dum ai chyeju a majaw rai nga ai. Dai chyeju gaw Chyoi Pra ai Wenyi kaw na hka hte bai shangai ai hte asak ningnan lu la ai lam rai nga ai. 6 Karai Kasang gaw, anhte hpe hkye hkrang la ai Madu Yesu a marang e, Chyoi Pra ai Wenyi hpe anhte a ntsa e n taw n tsang ru bun ya mi ai. 7 Shing rai galaw ai lam gaw, anhte gaw shi a chyeju hte Karai Kasang e sharawng awng hkap la ai lam hkam la nna anhte myit mada nga ai htani htana asak hpe lu madu hkam la na matu rai nga ai. 8 Ndai ga gaw kangka re ai ga rai nga ai.

Karai Kasang hpe kam sham ai ni gaw masha shagu a matu kaja ai hte akyu rawng ai mai kaja ai amu hpe myit lawm let aten jaw nna galaw nga mu ga lahta de tsun lai wa sai lam ni hpe laksan madung dat ahkyak shatai nna nang tsun shadum shahprang nga na hpe ngai ra nga nngai. 9 Rai ti mung akyu n rawng ai angawk angak nga nna san ai ndang kalang ga san ni, galu galang ahtik labau gawn ai lam, ga li ga law re ai lam, tara hte seng nna ga law hkat ai lam ni hpe koi kau u: hpa majaw nga yang, dai lam ni gaw akyu n rawng ai hte kaman lila sha rai nga ai. 10 Shai wa bra wa ai lam shabyin ai wa hpe n law htum lahkawng lang shadum jahprang sadi jaw ai hpang shi hte matut mahkai ai lam kaga hpa mung hkum galaw nu. 11 Shing re ai wa gaw hten run byak mat ai wa rai nna, shi a yubak mara ni gaw shi mara lu ai wa re ai hpe sakse madun nna shi dai daw dan la nga ai hpe nang chye nga ndai.

12 Artima hpe, shing n rai Tuhkiku hpe, nang kaw ngai shangun dat yang, Nikapoli mare de ngai hpe sa tau na atsam htum hkra shakut nna sa wa rit; hpa majaw nga yang, dai mare e nshung ta shalai na ngu nna ngai myit daw dan da se ai.Ref 3:12: Kas 20:4; 2Tm 4:12. 13 Bawmung wa Zena yan Apolo hpe shan hkrun lam hkawm sa lu na matu lam jarik hpa mung n kadawn mu ga, shan hpe hkum hkum di nna karum dat u. Ref 3:13: Kas 18:24. 14 Sha na, bu hpun na, nga na lam a matu kaja wa ra kadawn nga ai hpe jaw lu hkra, anhte a masha ni kaja ai kan bau bungli galaw ai hta shanhte a aten hpe jai lang chye mu ga hte, shanhte gaw akyu n rawng ai baw asak n hkrung mu ga sharin ya u.

15 Ngai hte rau nga ai ni nlang hte gaw, nang hpe shakram dat ma ai. Kam sham ai hta tsaw ra ai jinghku rai nga ai ni hpe shakram ya mi.

Karai Kasang a chyeju gaw nanhte mahkra hte rau anga nga u ga law.