TITU KAW SHAGUN DAT AI LAIKA
(TITUS)
Ga Nhpaw
Titu gaw maigan masha rai nga ai kaw nna myit malai lu ai hte Hkristan tai wa nhtawm Kasa
Pawlu a sasana bungli hta shingdep shingtau
tai ya ai wa langai mi rai nga ai. Titu kaw shagun dat ai Kasa Pawlu a Laika hpe Kreti
zunlawng e Hpung hpe yu na matu hti ngam kau
da ai, shi hpe karum ai ramma langai mi hpang
de hkringdat nna ka dat ai hpe mu lu ai.
Ndai laika hta ahkyak ai lam madung masum hpe tsun shaleng nga ai. Langai ngu na hta, Hpung
ningbaw ningla tai na ni hta grau nna Kreti
zunlawng masha ni a man e kaning re ai arawn
alai hte woi awn ra ai lam Titu hpe shadum
dat ai daw rai nna, lahkawng ngu na hta,
hpung kata na asak naw kaji ai numsha ni,
lasha ni hte mayam ni hpe bai nhtang sharin na
rai nga ai masha pang shagu asak kaba sai ni
hte num ni hpe gara hku sharin achyin na lam
hpaji jaw dat nga ai. Hpang jahtum daw hta
laika ka ai wa gaw, Hkristan arawn alai hte
seng nna hpung kata hta n ju n dawng ai lam,
ndang kalang hkat ai lam, daw hka bra wa ai
lam re ai ni hpe koi yen kau lu na matu grau
nna ngwi pyaw sim sa ai hte hku hkau tsaw ra
ai lai ladat ni hpe jai lang ra ai lam hpaji
jaw da nga ai.
1
1 Karai Kasang a shangun ma hte Yesu Hkristu a kasa wa rai nga ai ngai Pawlu gaw laika
ka dat nngai.
Karai Kasang gaw shi lata la ai masha ni a makam masham hpe bau maka
sharawt ya na matu mung, anhte a nawku
htung a sharin ya ai tengman ai lam hpe
mu lu chye lu hkra lam madun na matu mung,
ngai hpe lata la nna shangun dat ni ai.
2 Dai Nawku htung gaw htani htana asak hpe myit mada ai lam hta npawt de da
nga ai. Masu magaw n chye ai Karai
Kasang gaw, moi chyaloi nhkoi kaw nna
htani htana asak anhte hpe jaw na matu
ga ndat jaw da mani ai.
3 Shing rai aten ladaw hkrak jaw ai shaloi dai htani htana asak hpe shi a mungga
hta shapraw shadan wu ai. Dai mungga
ngai hpe ap ya ni ai rai nna, anhte a
hkye hkrang la ai Madu a hkang da ai
ga hte maren, dai hpe ngai hkaw tsun
nngai.
4 Madu Yesu hpe anhte hte maren kam sham ai hta rau rum nga ai ngai sha majing
re ai Titu hpang de ngai ndai laika hpe
ka shana dat nngai.
Kawa Karai Kasang hte anhte a hkye hkrang la ai Madu Yesu Hkristu gaw
nang hpe chyeju hte ngwi pyaw ai lam
jaw ya u ga law.Ref 1:4: 2Ko 2:13;
Gal 2:3; Ehp 1:2; Kol 1:2; 2Pe 1:1.
5 Kreti zunlawng hta naw galaw ra nga ai lam shagu hpe hkrak jaw hkra hkan yu
galaw hpajang na matu hte, mare shagu
hta hpung hpe up hkang na lit hkam
salang ni hpe san da na matu ngai nang
hpe jahti da de ai. Ya ngai jaw da na
rai nga ai ga matsun ni hpe hkum malap
kau et.
6 Dai hpung salang wa gaw mara n rawng ai wa, num langai sha lu ai wa, rai ra
ai. Shi a kasha ni gaw Madu Yesu hpe
kam sham ai ni rai ra ai. Zai ai arawn
alai hte ga n madat ai lam hta mying
pru ai kashu kasha lu ai wa n rai na.
Ref 1:6: 1Tm 3:2,4,12.
7 Hpa majaw nga yang Hpung up wa gaw Karai Kasang a magam amu hpe lit la
nna gun hpai ai wa rai nna, mara n
rawng ai wa mai rai nga ai. Shi gaw
myit tsaw myit dap ai wa, sindawng
katawt ai wa, chyaru len ai wa, ga
li ga law anu ajin rai chye ai wa,
shing n rai gumhpraw marin ai wa n
mai rai nga ai.
8 Shi gaw manam daw ra ai, mai kaja ai lam hpe tsaw ra chye ai wa, tinang
hkum hpe hkang chye ai, si si re ai,
ding hpring ai, chyoi pra ai, tara
hkan ai wa rai ra ai.
9 Shi gaw Hpung a sharin shaga ai lam hte myit hkrum nna kam hpa mai ai dai
mungga hpe ngang ngang kang kang manoi
manat ai wa, rai lu na rai nga ai.
Shing rai yang she shi gaw dai teng
man ai sharin shaga ai lam hte masha
ni hpe n-gun jaw myit gang la lu na
hte, dai mungga hte n htan shai
ninghkap ai ni a shut ai lam hpe
madi madun lu na rai nga ai.
10 Hpa majaw nga yang, shanhte a lachyum n pru ai ga hte gumlau gumle re ai hte,
masha kaga ni hpe hkalem hkalau re ai
masha ni law law wa grau nna Yuda nawku
htung kaw na Hkristan Hpung de gale
shang wa ai ni hta nga nga ma ai.
11 Shanhte a tsun shaga ai n-gup pat kau ya ra sai; hpa majaw nga yang, shanhte
gaw n mai sharin ai lam ni hpe sharin
ya nna htinggaw ting ting hpe shabra
kau mu ai. Dai lam ni yawng gaw shanhte
a gumhpraw lu lam hte seng ai kaya kahpa
re ai yaw shada ai lam a matu rai nga
ai.
12 Shanhte hta na tinang a amyu myihtoi rai nga ai Kreti masha langai mi gaw,
?Kreti masha ni tut tut masu, matse
labye n hkru, nakru lagawn bu,? nga
nna tsun ai.
13 Dai sakse ga teng nga ai majaw, shanhte gaw Karai Kasang hpe kaja wa kam sham
hkap la chye wa na matu mung,
14 Yuda ni a matsun maroi maumwi ni hpe manoi manat ai lam n galaw nga na hte
dai teng man ai lam hpe n hkap la ai
masha ni kaw na pru ai hkang da ai ga
ni hpe kam hpa manoi ai ni naw n rai
nga na matu mung, shanhte hpe nang
aja awa daru sharin lu na rai ndai.
15 Tinang dai san seng nga sai ni a matu arai yawng mayawng gaw san seng nga ai;
rai ti mung tinang dai n san n seng nna,
Madu Yesu hpe n kam n sham ai ni a matu
chyawm gaw, hpa mung n san n seng nga ai.
Hpa majaw nga yang, shanhte a myit mang
ai lam hte kraw lawang mahtang n san n
seng nga malu ai.
16 Shanhte gaw Karai Kasang hpe chye chyang ga ai nga nna tsun ma ti mung, shanhte
a galaw ai lam gaw shanhte hpe n madi
shadaw nga ai. Shanhte gaw matsat shabat
rai nna yu ra na zawn n re ai ni, mai
kaja ai amu lama ma galaw na atsam marai
n rawng ai ni rai nga ma ai.