2
1 Ngai sha e, na a matu chyawm gaw anhte a Hkristu Yesu hta langai sha tai nna asak hkrung ai a
marang e lu la ai chyeju hta n-gun
lapyin rawng nga u.
2 Sakse law law ni a man e, ngai kaw na nang sharin la, na la sai sharin shaga
ai ga ni hpe hta la nhtawm masha kaga
ni hpe mung bai sharin achyin ya lu
na re ngu nna nang kam mai ai masha
ni hpe bai htawt ap ya u.
3 Hkristu Yesu hta sadi dung ai hpyen ma kaja zawn ru tsang hpe hkam sharang u.
4 Hpyen magam bungli gun hpai taw nga ai hpyen ma langai mi gaw, shi a ntsa na
duwa hpe myit ra sharawng awng hkra
galaw mayu ai majaw hpyen hte n seng
ai mung masha lam hta n hkan ginchya
nga ai.
5 Gat shingjawng poi langai mi hta shingjawng ai ginsup ninghkrin
langai mi gaw hkan sa tara ni hpe
n madat n mara a yang gaw, shagrau
kumhpa n lu la lu nga ai.
6 Sun hkauna galaw shaja ai wa gaw nmut ta hta shawng shu la lu ai hkam bum hpe
lu la ra nga ai.
7 Ngai tsun nga ai lam hpe myit aru yu u; hpa majaw nga yang Madu gaw dai lam
yawng hte hpe chye chyang ai myit nang
hpe jaw ya na ra ai.
8 Ngai hkaw tsun ai Kabu Gara Shiga hta rawng ai hte maren, si mat ai ni kaw
na bai hkrung rawt wa sai Dawi a aru
arat rai nga ai Yesu Hkristu hpe dum
nga u.
9 Hpa majaw nga yang ngai gaw Kabu Gara Shiga hkaw tsun ai majaw ru tsang hkrum
nngai; ru hka hkrum ai bawng langai mi
zawn gyit hkang sharen da ai pyi gaw
hkrum ni ai. Rai ti mung dai Karai
Kasang a mungga chyawm gaw sharen da
hkrum ai n rai.
10 Dai re ai majaw ngai gaw Karai Kasang lata la hkrum ai masha ni a matu ruyak
jam jau hkam nngai; shing rai hkam ai
lam gaw shanhte mung Hkristu Yesu a
marang e hkye hkrang la ai chyeju hte
de a htani htana hpung shingkang hkam
la lu na matu rai nga ai.
11 Ndai ga gaw teng man ai ga rai nga ai;
?Anhte shi hte rau si wa ga yang gaw,
anhte shi hte rau mung hkrung nga lu na raga ai.
12 Anhte matut nna hkam sharang nga ga yang gaw,
anhte shi hte rau mung up nga lu na raga ai.
Anhte shi hpe ningdang kau ga yang gaw,
shi mung anhte hpe ningdang kau na ra ai.Ref 2:12: Mat 10:33; Luk 12:9;
Rom 8:17; 1Pe 4:13.
13 Anhte sadi n dung ga ti mung,
shi gaw sadi dung nga ai,
hpa majaw nga yang shi hkum shi masu ningdang kau lu ai wa n rai.?
14 Masha ni hpe ndai lam shadum shahprang nga u; ga hte ndang kalang nga nna gasat
ningjet n nga na matu Karai Kasang a
man e shanhte hpe ja ja sadi jaw da u.
Shing rai ndang kalang hkat ai lam gaw,
hpa akyu n shabyin ai hta n ga, madat
la ai masha ni hpe jahten shabya ai lam
sha byin shangun nga ai.
15 Nang chyawm gaw shi a amu hta kaya shara hpa n rawng ai magam gun hpai
wa zawn mung, Karai Kasang a teng
man ai mungga hpe jaw ang ai hku
hkaw tsun sharin achyin ya ai wa
hku nna mung, Karai Kasang a man
e myi man pa lu hkra na a atsam
htum hkra shakut shaja nga u.
16 Karai Kasang hte tsan gang mat wa shangun ai awu asin hte, angawk
angak nga nna tsun baw law ai ga
ni hpe koi gam u.
17 Shing nga nna sharin achyin ai lam gaw hkum shan hpe sha jahtum kau ya
ai mawng ana hte sha bung nga ai.
Shing nga nna sharin achyin ai ni
hta lawm ai masha lahkawng gaw,
Humeni hte Hpiletu yan rai ma ai.
18 Shanhte gaw dai teng man ai lam hta na yit mat wa nna anhte a hkrung rawt
wa ai lam gaw byin ngut sai nga nna
tsun ai hte nkau mi a kam sham ai lam
hpe shanut jahtum ya nga ma ai.
19 Rai ti mung Karai Kasang e jahkrat da sai ngang kang ai npawt nhpang hkridun
chyawm gaw shamu shamawt shangun lu ai
n rai; dai npawt nhpang a ntsa e dai
Madu gaw, ?Shi a masha rai nga ai ni
hpe chye chyap nga ai,? nga nna mung,
?Madu hte seng ai wa rai nngai nga
nna tsun matsun yawng hte gaw shut
hpyit ai amu hpe tawn kau da mu ga,?
nga nna masat dazik ka shakap da nga
ai.Ref 2:19: Yhn 10:14,27; Rom 8:23; 1Yh 2:19.
20 Galu kaba ai nta langai mi hta ban hka wan amyu myu nga nga ai; nkau mi gaw
gumhpraw hte ja gawm, nkau mi gaw hpun
hte kagam ga hte galaw da ai, nkau mi
gaw arawng a matu ahkyak ai aten hta
lang nna, nkau mi gaw arawng n nga ai
shara hta lang ai arai ni rai ma ai.
21 Marai langai ngai gaw tsun lai wa sai n hkru n kaja ai lam ni yawng hta na
tinang hkum hpe jasan kau ai rai yang,
shi gaw Madu a lak san shatawng shada
ai lam ni hta jai lang ai hkam la na
ra ai; hpa majaw nga yang shi gaw, mai
kaja ai amu shagu hpe galaw na jin jin
rai nga u ga shi Madu a matu akyu rawng
lam la ai hta ap nawng da sai wa rai
nga ai.
22 Brang ram a myit kayut ai lam ni hpe koi gam nna Madu hpe san seng ai myit
hte karum hpyi ai ni hte rau ding
hpring ai lam, kam sham ai lam, tsaw
ra ai lam hte ngwi pyaw sim sa ai lam
hpe tam shakut nga u.
23 Rai ti mung angawk angak hte tuk shamak re ai ndang kalang ga ni hpe koi kau u.
Shing re ai ni a jahtum ai gaw ga li ga
law lam ni rai nga ai hpe nang chye nga
ndai.
24 Dai Madu a shangun ma chyawm gaw ga law ga la n mai nga ai; shi gaw masha yawng
hpe matsan dum chye ai kaja ai hte myit
galu nna sharin achyin chye ai sara rai
ra ai.
25 Tinang hpe n htan shai ninghkap ai ni hpe shading sharai ai hta sumnung
shingdi si mani ai hku galaw ai wa rai
ra ai; hpa majaw nga yang, shanhte gaw
myit malai lu nna dai teng man ai lam
hpe chye na wa na ahkang Karai Kasang
shanhte hpe jaw yang jaw na ra ai.
26 Dai shaloi e shanhte gaw jaw ai hku bai mu mada dum hprang wa nna Satan
a mahkam kaw na lawt lu na mara ai.
Dai Satan gaw shanhte hpe rim la nna
shi a myit ra ai lam hpe hkan sa
shangun yu sai wa rai nga ai.