5
1 Asak kaba sai salang wa hpe hkum daru kau et; na a kawa hpe zawn lajin ai hku tsun shaga u. Asak kaji ai shabrang ma ni hpe na a kahpu kanau ni hpe zawn,
2 hpawmi ni hpe kanu ni hpe zawn, mahkawn ni hpe kajan kana ni hpe zawn tsep kawp san seng ai myit hte shadum shahprang nga u.
3 Masha shingtai rai taw nga ai gaida jan ni hpe hkungga lara nga u.
4 Rai ti mung gaida jan langai ngai hta kashu kasha lu ai rai yang, shanhte gaw tinang a dinghku a matu nawku htung makam masham hte seng nna galaw ra ai lit ni hpe shawng sharin la mu ga, shing rai galaw ai hku nna tinang a kanu kawa ni hte kaji kawoi ni hpe chyeju htang jaw mu ga, hpa majaw nga yang dai gaw Karai Kasang hpe sharawng awng shangun ai lam rai nga ai.
5 Masha shingtai rai nna shi hpe yu lanu lahku na kadai n nga ai gaida jan langai mi gaw, Karai Kasang hta myit mada kam hpa let shani shana akyu hpyi ai hte Karai Kasang kaw na karum ai lam hpyi lajin nga ai.Ref 5:5: Luk 18:1; Kas 26:7; 1Ko 7:32.
6 Rai ti mung arawn alai hten nna pyaw hpa lam sha tam ai gaida jan chyawm gaw, shi naw hkrung nga ninglen chyasi rai nga ai.
7 Shanhte hpe kadai mung mara shagun shara n nga u ga, ndai hkang da ai ga ni hte shanhte hpe shadum shahprang nga u.
8 Marai langai ngai gaw, tinang a amyu ru sai, grau nna dinghku masha ni hpe yu lanu lahku ai lam n nga ai wa gaw, dai makam masham hpe ningdang kau ai wa rai nna n kam ai masha langai hta pyi grau nna n hkru n kaja ai wa rai nga ai.
9 Asak kru shi ning sha n jan yang gaw kadai gaida jan hpe mung gaida jan ni a jahpan hta n bang u ga, shi gaw kalang sha hkungran dinghku de ai jan rai ra ai.
10 Dai hta n ga, shi gaw arawn alai kaja ai lam hta mung gumhkawng ai jan, kashu kasha ni hpe atsawm sha woi lanu lahku shakung jahpan ai jan, tsasam manam ni hpe shi a nta kaw hkap la nna galaw daw ai jan, Hkristan hpu nau ni hte seng nna galaw ra ai lit ni hpe myit nem ai hte galaw gun hpai ai jan, ru yak jam jau hkrum nga ai ni hpe karum ai jan, mai kaja ai magam bungli hpe ap nawng gun hpai ai jan rai ra ai.
11 Rai ti mung asak naw kaji ai gaida jan ni hpe gaida jan jahpan hta n bang u ga, hpa majaw nga yang, shanhte a myit ra ai lam e shadut ai a jaw e hkungran mayu wa ai shaloi Hkristu kaw na htak mat wa chye ma ai.
12 Dai rai nna shanhte gaw Madu hpe shawng nnan e jaw da sai ga shaka hpe kau da ai mara lu ai ni tai wa ma ai.
13 Dai hta kaga shanhte gaw nta langai mi kaw nna langai mi hta shang chyai hkawm nna aten hpe kaman shama kau ai lam galaw chye wa ma ai. Dai hta grau n kaja ai lam gaw, shanhte n tsun ang ai lam ni hpe hkan tsun nna shatan n lem hkawm ai hte tinang hte n seng ai lam ni hta ginchya lawm chye ma ai.
14 Dai rai nna hpyen ni gaw anhte a lam n kaja ai hku tsun na lam ginjang n nga hkra aprat kaji ai gaida jan ni gaw hkungran nna kashu kasha shangai ai hte shanhte a kun dinghku ni hpe yu lajang nga na hpe ngai grau ra sharawng nga nngai.
15 Hpa majaw nga yang, ya jang pyi gaida jan nkau mi gaw Satan a hpang hkan nang na matu gayin mat wa rau masai.
16 Kam sham ai Hkristan num langai mi gaw, tinang a dinghku hta gaida mat ai ni lawm ai rai yang gaw, shanhte hpe gawn lajang galaw daw ai lam galaw lu na rai nga ai. Shanhte a matu hpung hpe kaga mi lit n mai shali ai. Shing rai yang she hpung gaw kaja wa kam hpa shara n lu mat sai gaida jan ni hpe galaw daw lu na rai nga ai.
17 Ningbaw ningla amu hpe atsawm galaw ai hpung woi ni gaw shabrai htam lahkawng hkam la ging ai wa re ngu nna sawn la mai nga ai. Grau nna mungga htawn tsun ai lam sharin achyin ai lam hpe shakut shaja gun hpai ai ni gaw shing rai hkam la ging ai ni rai nga ma ai.
18 Hpa majaw nga yang Chyum Laika hta, “Mam kabye nga ai dumsu a n gup hpe ka dagraw da ya lu na n rai; bai amu galaw ai wa gaw shi a shabrai hkam la lu na rai nga ai,” nga nna tsun nga ai.Ref 5:18: Trj 25:4; Mat 10:10; 1Ko 9:9.
19 Sakse hkam ai masha n law htum marai lahkawng masum n nga yang gaw hpung woi wa hpe mara shagun ai ga hpe n mai madat ya ai.Ref 5:19: Trj 19:15.
20 Kaga ni hkrit kang mat mu ga, mara galaw ai ni yawng hpe shawa a man e daru sharin kau mu.
21 Ndai matsun da ai lam ni hpe myi man n tau, nang galaw sa wa ai lam shagu hta maga ga de n lawm ai sha madat mara hkan sa na matu Karai Kasang hte Hkristu Yesu a man e mung, chyoi pra ai lamu kasa ni a man e mung, ngai nang hpe matsun dat de ai.
22 Madu a magam bungli gun hpai na matu kadai hpe mung lata mara nna aya dang ya na hkum tin et. Kaga masha ni yubak galaw ai lam hta hkum lawm et; nang nan mara n kap hkra san seng nga u.
23 Nang gaw chyahkring hkring machyi wa wa rai ndai majaw shat kan lu sha rin ai hpe karum na matu ntsin chyu n lu ai sha sabyi loi loi alu ya nga u.
24 Masha nkau mi a yubak mara nkau mi gaw, mu lu na matu dan leng nga ai rai nna shanhte ni a yubak mara ni gaw shanhte a shawng e jeyang ai de sa wa ai. Rai ti mung nkau mi a yubak mara ni chyawm gaw hpang e she dan leng ai hku mu lu nga ai.
25 Dai hte maren mai kaja ai amu bungli ni hpe asan sha mu lu nga ai; n dan n leng ai ni hpe pyi gaw makoi magap da lu ai n rai.