1 Dai re ai majaw yawng a shawng e, masha yawng mayawng a matu mara Karai Kasang kaw hpyi nem ai akyu hpyi ai, hpyi htinglu ai lam ni hte chyeju shakawn ai lam ni galaw nga myit ga, ngu nna shadut jahkat dat made ai. 2 Anhte gaw Karai Kasang hpe hkrit hkungga ai lam ni yawng hta atsawm sha hkan sa nna htap htuk mai kaja ai arawn asam rawng let ngwi pyaw sim sa ai hku asak hkrung nga lu u ga, Hkawhkam ni hte ahkang lu ai ni yawng a matu mara akyu hpyi nga mu. 3 Ndai amu gaw mai kaja ai amu rai nna anhte a hkye hkrang la ai Madu Karai Kasang hpe sharawng awng shangun nga ai. 4 Shi gaw masha yawng mayawng hkye la hkrum nna, dai teng man ai lam hpe chye chyang wa lu na matu ra sharawng nga ai. 5 Hpa majaw nga yang, Karai Kasang gaw langai sha nga ai rai nna, Karai Kasang hte shinggyim masha hpe htinglu ya ai wa shinggyim masha sa tai ai Hkristu Yesu ngu ai masha mung langai sha rai nga ai. 6 Shi gaw masha amyu yawng hpe hkye hkrang la na matu shi hkum nan lala hpe ap kau nu ai; Dai gaw anhte aten ladaw du jang Karai Kasang gaw masha hpe hkye hkrang la mayu ai sakse madun ai lam rai nga ai. 7 Dai re ai majaw Madu gaw ngai hpe kasa langai mi hku nna mung, maigan ni a sharin sara langai mi hku nna mung, dai makam masham hte teng man ai lam a mungga hpe hkaw tsun na matu shangun dat ai hkrum ni ai, ngai masu nga ai n rai; ngai teng man ai ga tsun nga nngai.Ref 2:7: Rom 9:1; 11:13; Ehp 3:7-8; Gal 1:16; 2Tm 1:11.

8 Hpung a nawku daw jau ai hpawng shagu hta lasha ni hpe akyu hpyi shangun mayu nngai. Karai Kasang kaw ap nawng machyai da hkrum sai lasha ni gaw masin pawt ai lam, ndang kalang re ai lam n lawm ai sha chyoi pra ai lata sharawt nna akyu hpyi mu ga. 9 Numsha ni hpe mung sumnung shingdi ai hte shanhte a bu hpun palawng bu hpun ai lam hta sari sadang rawng ai hku atsawm sha bu hpun shangun mayu nngai. Kara hpe majaw jaw hkri shatsawm ai lam, aja, pale shing n rai manu hpu ging ai hpun palawng re ai ni hte mawn sumli ai lam; n galaw ai sha, 10 nawku htung tara atsawm sha hkan shadik ai numsha ni a matu galaw ang ai lam hte maren mai kaja ai arawn alai hte tinang a hkum hpe mawn nga mu ga, 11 numsha ni gaw myit shagrit shanem let asim sha sharin achyin hkam la nga mu ga. 12 Sharin achyin na hte lasha ni a ntsa e ahkaw ahkang lang nna up na lam, numsha ni hpe ngai ahkang n jaw nngai. Shanhte gaw asim sha nga nga u ga. 13 Hpa majaw nga yang, Karai Kasang gaw Adam hpe shawng hpan da nna dai hpang e she Ewa hpe bai hpan da nu ai.Ref 2:13: Nin 1:27; 2:18,22; 1Ko 11:8-9. 14 Satan a hkalem hkalau hkrum ai wa gaw Adam n rai, numsha mahtang hkalem hkalau ai hkrum nna Karai Kasang a tara hpe tawt lai nu ai. Ref 2:14: Nin 3:6; 2Ko 11:3. 15 Rai ti mung numsha langai mi gaw sari sadang rawng nna, makam masham lam, tsaw ra ai lam hte chyoi pra ai lam hta matut nna shakut sharang nga yang gaw shangai shaprat ai a majaw shi hkye hkrang la ai hkrum na ra ai.