7
Lasha
Nang gaw mauhpa numsha she rai nga n hka!
Na a lagaw hta kyepdin din da ai gaw kade sha tsawm htap nga lit hka!
Wang wang re ai na a magyi ni gaw
sumla soi sara wa a amu zawn rai nga ai.
Dai yang e jarung langai nga nga ai,
dai hta manam pyaw ai sabyi ntsin hte galoi mung hpring nga ai.
Dai yang e, hkaulan mam hkauling langai taw nga nna,
hka law pan ni hte shinggrup da nga ai.
Na a madoi chyu hpang yan gaw chyahkyi marun yan hte mung,
shannga lahkawng hte mung bung nga ai.
Na a du gaw magwi kawng langchyi hte bung nga ai.
na a myi ni gaw Heshbon mare dai mare kaba a chyinghka makau na hka lawng ni hte bung nga ai.
Na a ladi gaw tsawm htap nga nna Damasku mare sin ai
Lebanon langchyi hte bung nga ai.
Na a baw gaw tsaw ai Hkarmela bum zawn rai nga ai.
Hkri da ai na a kara gaw mani tsawm dik ai lai sumpan zawn tu ala nga ai;
de a tsawm htap ai gaw hkawhkam wa hpe pyi ahkang la lu nga ai.
 
Nang gaw kade sha sumnung shingdi nna kade sha tsawm htap nga n hka;
na a tsaw ra kabu pyaw lam gaw kade sha hkum tsup nga a hka!
Nang gaw namhtan hpun langai zawn hkum shingyan tsawm htap nna,
na a madoi chyu hpang yan gaw namhtan si sumbaw ni hte bung nga ai.
Ndai namhtan hpun de ngai lung na nngai
de a asi hpe di la na nngai.
Na a madoi chyu hpang yan gaw nye a matu sabyi si sumbaw zawn rai nna;
nang sa ai nsa gaw ja magaw si sama hte bung nna,
na a n-gup gaw jet htum ai sabyi ntsin hte bung nga ai.
Numsha
Shing rai, dai sabyi ntsin gaw nye a nja jan hpang de ading sha lwi yu wa nhtawm,
shi a nten ni hte awa ni de lwi du nga ai.
10 Nye a tsaw ra ai wa hpe ngai madu ai rai nna
shi ngai hpe ra sharawng nga ai.
11 Ngai tsaw ra ai wa e, sa rit, pa ga de pru hkawm nna,
shana hpe kahtawng ni hkan nga shalai hkawm ga.
12 An gaw jahpawt jau rawt nna
sabyi ru tu wa, n tu wa ai hpe mung,
pu majawm, n majawm ai hpe mung,
hkainu si hpun ni pu ai, n pu ai hpe mung sa mada yu ga.
Dai yang e, nye a tsaw ra myit nang hpe ap ya na de ai.
13 Nang gaw dudim si hpun a sama hpe manam lu nga ndai;
anhte a chyinghka makau e dwi sau ai namsi ni nga nga ai.
Tsaw ra ai wa e, manam pyaw ai baw dingsa hte
nnan mahkra na a matu mahkawng da ya nngai.