4
Lasha
1 Nye a nja jan e, nang gaw kade sha tsawm htap nga n hka!
Na a myi man magap shingdu e tu ai na a myi ni gaw kade sha yu tsaw ra na zawn htoi tu nga lit hka!
Na a kara gaw Gilead kawng kaw na yu hkrat wa ai bainam hpung mi zawn
ka manawt nga ai.
2 Na a awa ni gaw ya sha amun rep kau nna kashin kau ai sagu zawn hpraw nga ai.
Dai ni hta na langai mi mung yet mat ai n rai;
dai ni yawng gaw ra n rawng hkra bung nga ai.
3 Na a nten gaw u sai zawn hkyeng tsawm ai sumri hte bung nga ai;
dai gaw nang ga shaga yang kade sha yu tsawm nga a hka!
Na a shabyi ni myi man magap shingdu e htoi tu nga ai.
4 Na a du gaw din din rai nna pri tsawm ai Dawi a langchyi zawn rai nna,
ninggang hkying mi noi da ai zawn re ai kachyi hte shinggrup da nga ai.
5 Na a sinda gaw shannga ni hte hka law pan prang yang hkan e ushat sha nga ai
chyahkyi marun yan zawn rai nga ai.
6 Ngai gaw jahpawt e bungli katsi bung wa nna,
nsin garai n hkoi mat ai aten du hkra,
mura kawng hte lawban kawng ni hkan nga nga na nngai.
7 Nye a nja jan e, nang gaw kade sha tsawm htap nga n hka!
Nang gaw kade sha hkum tsup nga n hka!
8 Nye num nnan e, Lebanon Bum ni kaw nna ngai \q2 hte rau sa wa ga, Lebanon kaw nna ngai hte rau sa wa ga.
Hkanghkyi ni hte rawnggawk ni shanu nga ai Amana bum pungding,
Senira bum hte Hermon bum ni kaw nna yu hkrat wa u.
9 Nye a nja jan, nye a num nnan e, na a myi ni hte yu ai nsam hte
nang gali da ai kachyi gaw nye a myit masin hpe
lagu madu la kau ya nga sai.
10 Nye a nja jan, nye a num nnan e,
na a tsaw ra ai gaw ngai hpe ra sharawng shangun nga ai.
Na a tsaw ra ai gaw sabyi ntsin hta grau kaja nga ai;
na a manam pyaw ai bat gaw kaga namji namya mahkra hta grau manam pyaw nga ai.
11 Nye a tsaw jan e, na a nten gaw gitbaw na yu hkrat ai lagat jahku namta zawn rai nga ai;
na a shinglet gaw nye a matu ngachyu hte lagat ntsin zawn rai nga ai.
Na a hpun palawng gaw Lebanon na nngawt bat mahkra hta manam pyaw nga ai.
12 Nye a nja jan, nye a num nnan e, nang gaw makoi magap da ai sun,
shakum kum ai sun hte madu da sai hka hpawk rai nga ndai;
13 dai yang hkan e hkai bawng ni tu kaba wa nga ai.
Dai ni gaw hkainu si hpun tu ai namsi sun zawn kaba wa nna
kaja htum ai asi ni si nga ai.
Nardu hte kayau ai hena hpun,
14 namchying, larawn, maza hte manam pyaw ai baw lawban hpun amyu myu nga nga ai.
Mura, achyaw ni mung dai yang e grau manam pyaw ai
baw yawng hte rau tu nga ai.
15 Hka hpawk ni lwi nga ai hka shi ni hte
Lebanon bum ni kaw nna kahpawk pru wa ai
hka shi, hka wam ni dai sun hpe hka jaw ma ai.
Numsha
16 Dingdung nbung e rawt u.
Dingda nbung e nye a sun de manam pyaw bat hte
hpring ai nbung bung wa u ga.
Nye a tsaw ra ai wa shi a sun de sa wa nna,
dai sun na kaja htum ai asi sha lu u ga.