9
1 Lani mi na aten hta, Dawi gaw, ?Shawlu a dinghku hta kadai wa naw ngam nga a ta? Ngam nga ai rai yang, Yonahtan a jaw e ngai shi hpe matsan dum ai lam madun dan mayu nga nngai,? ngu nna san wu ai.Ref 9:1: 1Sa 20:15-17.
2 Shawlu a dinghku kata na Ziba mying ai shangun ma langai nga nga ai; dai wa gaw Dawi kaw shang sa na matu tsun da hkrum nga ai. Hkawhkam wa gaw, ?Nang Ziba rai nga n ni?,? ngu nna san wu ai.
Shaloi shi mung, ?Madu e, na a shangun ma wa rai nga nngai,? ngu nna htan wu ai.
3 Hkawhkam wa gaw shi hpe, ?Ngai galaw na we ai ngu nna Karai Kasang hpe ga sadi jaw da ni ai hte maren, sadi sahka hte matsan dum ai lam ngai madun lu we ga, Shawlu a dinghku hta marai langai ngai naw ngam nga a ni?,? ngu nna san wu ai.
Ziba gaw, ?Yonahtan a kasha ni hta na langai mi naw nga ai. Shi gaw lagaw hten nga ai,? ngu nna htan wu ai.Ref 9:3: 2Sa 4:4.
4 Hkawhkam wa gaw, ?Ya shi kanang nga nga a ta?,? ngu nna san wu ai.
Ziba gaw, ?Yu u, Lodeba kahtawng na Amiela a kasha Mahkira a nta e nga nga ai,? ngu nna htan wu ai.
5 Shaloi Hkawhkam Dawi gaw masha dat dat nna shaga la wu ai.
6 Shawlu a kashu, Yonahtan a kasha Mehpiboshet du jang, Dawi a man e shi gum dagup let hkungga jaw wu ai. Dawi gaw, ?Mehpiboshet,? ngu nna tsun wu yang, shi mung, ?Madu e, ngai na a shangun ma rai nga nngai,? ngu nna htan wu ai.
7 Dawi chyawm gaw, ?Hkum hkrit et. Na nwa Yonahtan a jaw e, ngai nang hpe matsan dum la na de ai. Na a nji Shawlu e madu da ai lamu ga mahkra ngai nang hpe bai jaw na de ai; nang gaw nye a sha ku hta tut nawng sha nga lu na rai ndai,? ngu nna tsun wu ai.
8 Mehpiboshet lang mi bai gum dagup nhtawm, ?Madu e, ngai gaw gwi chyasi langai hta pyi grau nna asung n shang mat nga nngai; dai rai yang, nang ngai hpe hpa majaw grai yu matsan dum la nga n ni?,? ngu nna tsun wu ai.
9 Dai hpang Shawlu a shangun ma Ziba hpe hkawhkam wa shaga la nna, ?Shawlu hte shi a dinghku masha ni madu da ai arung arai shagu, dai na a Madu a kashu rai nga ai Mehpiboshet a lata de ngai ap ya nga nngai.
10 Nang gaw na a kasha ni hte na a shangun ma ni hte rau na Madu Shawlu a dinghku masha ni a matu yi sun galaw nhtawm nsi naisi shu la nna shanhte a matu lusha wa sak jaw na rai ndai. Rai ti mung Mehpiboshet shi hkum nan chyawm gaw nye a sha ku hta tut nawng e manam hpe zawn ngai daw jau na we ai,? ngu nna tsun wu ai. (Ziba chyawm gaw shadang sha shi manga hte shangun ma hkun lu nga ai.)
11 Ziba gaw, ?Nang Madu hkawhkam hkang dat ai lam magup hte hpe ngai galaw na we ai,? ngu nna htan wu ai.
Dai rai nna Mehpiboshet gaw hkawhkam wa a shadang sha langai zawn hkawhkam wa a sha ku hta sha lu nga ai.
12 Mehpiboshet hta Mihka ngu ai shadang sha langai lu nga ai. Ziba a dinghku masha ni yawng chyawm gaw Mehpiboshet a shangun ma ni hkrai tai wa masai.
13 Dai rai nna lagaw lahkawng maga hten ai Mehpiboshet gaw Yerusalem mare hta nga nna hkawhkam wa a sha ku hta shi a lusha sha nga ai.