6
(1Hl 13:1-14; 15:25-16:6,43)
1 Ya kalang mi bai Dawi gaw Israela amyu hta na kaja htum ai hpyenla mun masum hte hpe shaga shinggyin la nhtawm,
2 singkaw tu ai hkrung kanu ni a ntsa e dung ai dai Chyahtum Chyalai N-gun Rawng ai dai Madu a mying ningsang mying ai Karai Kasang a Ga Shaka Sumpu hpe sa htawt la na matu Yuda mung Bala mare de shanhte hpe woi sa wa wu ai.Ref 6:2: Pru 25:22.
3 Shanhte gaw kawng ntsa na Abinadab a nta hta tawn da ai Ga Shaka Sumpu hpe la nna leng nnan ntsa e mara tawn da ma ai. Abinadab a kasha Uza hte Ahio yan gaw dai leng gau ma ai.Ref 6:3: 1Sa 7:1,2.
4 Ahio chyawm gaw dai sumpu a shawng e hkawm nga ai.
5 Dawi hte Israela masha ni yawng gaw dai Madu hpe shagrau sha-a na nga, n-gun lagaw mahkra hte ka manawt let mahkawn shakawn nga ma ai. Shanhte gaw dawraw sumpyi, tingse, chying, doria hte shupsheng ni hte dum shapyaw nga ma ai.
6 Shanhte gaw Nahkon a chyarang pa de du jang utang yan ahtu kadawng mat ai majaw Uza gaw shi a lata ladawn nna Ga Shaka Sumpu hpe jum shadang wu ai.
7 Dai Madu Karai Kasang gaw Uza hpe masin pawt wu ai rai nna shi galaw shut kau ai mara a majaw sat kau wu ai. Uza mung dai Ga Shaka Sumpu makau e si taw nga ai rai nna,
8 shara dai hpe dai ni du hkra Pere Uza ngu nna shamying da ma ai. Dai Madu gaw Uza hpe masin pawt nna ari jaw kau nu ai majaw Dawi mung masin kahtet mat wu ai.
9 Dawi mung dai Madu hpe hkrit wu ai rai nna, ?Ya ndai Ga Shaka Sumpu ngai hte rau kaning rai la wa na i?,? ngu nna tsun wu ai.
10 Shaloi dai hpe Yerusalem de shi hte rau n la wa na matu daw dan wu ai, shing rai la wa na malai hkrun lam jashai kau nhtawm Gat mare e nga ai Obed Edom a nta de la bang wa ma ai.
11 Dai sumpu gaw dai yang e shata masum nga nga ai rai nna dai Madu mung Obed Edom hte shi a dinghku masha ni hpe shaman ya nga ai. Ref 6:11: 1Hl 26:4-5.
12 Dai Madu a Ga Shaka Sumpu a majaw Obed Edom a dinghku masha ni hte shi lu malu mahkra hte hpe shaman ya nu ai lam Dawi na jang, Dawi gaw poi kaba galaw let dai Ga Shaka Sumpu hpe Obed Edom a nta kaw nna Yerusalem mare de shawn la wu ai.
13 Dai Ga Shaka Sumpu hpai ai masha ni lagaw lahkam kru htawt ngut ai hpang usu hte hpum sau ai dumsu kasha dai Madu a matu shagu hkungga nawng ya na Dawi shanhte hpe jahkring da wu ai.
14 Dawi mung shi a nshang grup hta sha, lachyit sumpan hpun da nna dai Madu hpe shagrau sha-a na nga shi a n-gun lagaw mahkra hte ka manawt nga ai.
15 Shing rai shi hte Israela masha ni yawng garu jahtau ai hte pahtau dum let Ga Shaka Sumpu hpe Yerusalem mare de la wa wu ai.
16 Dai Sumpu hpe mare kata de la shang wa nga ma yang, Shawlu a shayi sha Mihkala gaw hkuwawt hku mada yu wu ai, shaloi Hkawhkam Dawi gaw chyoi pra ka manawt hte gumlawt wa nga ai hpe mu wu ai rai nna hkyet yu sharung da wu ai.
17 De a matu ngu nna Dawi gap tawn ai Sum kata shi a shara ngu na kaw dai Sumpu hpe shanhte la shang wa nna tawn da ma ai. Dai hpang dai Madu a matu shagu hkungga hte mahku hkungga ni nawng jau ya ma ai.
18 Shi shagu hkungga ni nawng ya ngut jang, Chyahtum Chyalai N-gun rawng ai dai Madu a mying ningsang hta amyu masha ni hpe shi shaman ya mu ai hte,
19 shanhte yawng hpe lusha karan jaw wu ai. Israela mung na numsha, lasha shagu hte hpe muk pa pa, shan tau hkyep hkyep hte sabyi si jahkraw loi loi jaw wu ai. Dai hpang masha shagu tinang nang a nta de wa mat wa ma ai.Ref 6:19-20: 1Hl 16:43.
20 Dai hpang Dawi gaw shi a nta masha ni hpe shakram la na nga, nta de shang wa wu yang, Mihkala pru wa nhtawm shi hpe hkap tau la wu ai. Shi gaw, ?Dai ni na nhtoi hta Israela hkawhkam gaw shi hkum a matu amying kaba dan hkung hkra galaw kau nu hka! Shi gaw shi a hkum hpe shi a du salang ni a shangun ma numsha ni a man e mana langai zawn madun dan nga nu hka!,? ngu nna tsun wu ai.
21 Dawi chyawm gaw, ?Na nwa hte shi a dinghku masha ni a malai Israela amyu masha ni a ningbaw ngai hpe tai shangun na nga, ngai hpe lata la sai dai Madu hpe shagrau sha-a na matu she, ngai ka nngai. Dai Madu hpe shagrau sha-a na matu matut nna ngai ka na we ai;
22 ya na hta grau nna pyi, nye hkum hpe sari jahpoi kau na we ai. Ngai hpa n rai nga nngai ngu nna nang sawn la mai na ndai; rai ti mung dai numsha ni chyawm gaw ngai hpe shagrau shatsaw na she myit na mara ai.
23 Shawlu a shayi sha Mihkala chyawm gaw kashu kasha langai mi mung n lu nga ai.