17
Shing rai byin ai hpang gade n na yang, Ahihtohpela gaw Absalom hpe, ?Masha mun mi hkying lahkawng hpe ngai lata la n-ga, Dawi a hpang de dai ni jang ngai hkan shachyut na we ai. Shi ba kalawp let gawng kya nga yang, shi hpe ngai htim gasat dat na we ai. Shaloi shi rawt kajawng mat wa nna shi a masha ni mung hprawng htaw mat wa na mara ai. Shaloi hkawhkam wa hpe chyu sha ngai sat kau nna, num nnan gaw shi a madu wa hpang de nhtang wa ai zawn shi a masha ni yawng hpe nang hpang de ngai woi wa ya na de ai. Nang sat kau mayu ai wa langai sha rai nga ai; ngam ai amyu masha ni yawng chyawm gaw shanhte asim sha nga lu na mara ai. Ndai gaw Absalom hte Israela ningbaw ni yawng a matu htuk manu ai hpaji jaw ga zawn rai nga malu ai.
Absalom chyawm gaw, ?Ya jang Hushai hpe shaga wa marit, shi tsun na ga hpe anhte madat ga,? ngu nna tsun wu ai. Hushai du jang, Absalom gaw shi hpe, ?Ndai gaw anhte hpe jaw ya ai Ahihtohpela a hpaji jaw ga rai nga ai: de a hpang anhte hkan ang na ga ai kun? N hkan ai rai yang kaning rai galaw na lam, ya anhte hpe tsun dan mi,? ngu nna tsun wu ai.
Hushai gaw, ?Ndai lang Ahihtohpela nang hpe hpaji jaw ai lam n kaja nga ai. Na nwa Dawi hte shi a masha ni gaw ja ja share shagan ai hte htim gasat ai ni rai nna, tsap kanu gaw shi a kasha ni hpe magra amya ai zawn shanhte rai ma ai. Na a nwa gaw mahkrum madup law sai hpyenla rai nga ai majaw shana e shi a masha ni hte rau hkring nga na wu ai n rai. Shi gaw ya e pyi lungpu hku langai mi hta shing n rai kaga shara langai ngai hta makoi gyem yang gyem nga na sai. Dawi gaw na a masha ni hpe htim gasat dat ai shaloi jang dai shiga na ai ni kadai mung na a masha ni sum kadawng mat masai,? nga nna tsun pru wa na mara ai. 10 Na nwa gaw hpyen majan hta share shagan ai hpyenla kaba rai nga ai, shi a hpyenla ni mung ja ja htim gasat ai ni rai nga ma ai hpe Israela amyu masha shagu chye da nga ma ai majaw hkanghkyi ni zawn hkrit myit n rawng ai share shagan htum ai masha ni pyi hkrit nga ma ai. 11 Ngai hpaji jaw mayu ai lam gaw panglai hkin-gau ntsa e taw ai zaibru daram law htam nga nna mungdan jahtum shara mi kaw nna shara mi de du hkra nga nga ai Israela masha ni yawng hpe woi nhtawm majan pa de nang nan shanhte hpe woi awn sa wa su. 12 Dawi shi kanang e rai nga ai hpe anhte mu tam jang, hpa byin nga ai lam shi garai n chye lu yang, shi hpe gasat na rai nga ga ai; shaloi shi mung shi a masha ni kadai mung hkrung nga lu na ma ai n rai. 13 Shi rai nna mare kata langai mi de htingnut shang mat wa ai rai yang, anhte a amyu masha ni yawng sumri ni la sa nhtawm dai mare hpe hkaraw de gang jahkrat kau na ga ai. Dai yang na kawng pungding e nlung langai sha pyi ngam tawn da na n rai,? ngu nna htan wu ai.
14 Absalom hte Israela masha ni yawng gaw, ?Hushai a hpaji jaw ai ga mahtang Ahihtohpela jaw ai ga hta grau kaja nga ai,? ngu nna tsun ma ai. Dai gaw Ahihtohpela a kaja ai hpaji jaw ga hta n hkan mat wa lu hkra, Absalom a ntsa ru yak tsin-yam tsindam shapraw dat ai dai Madu a daw dan hpajang ai lam rai nga ai.
15 Dai Hushai gaw hkinjawng Zadok hte Abiahta yan hpe shi kaning rai Absalom hte Israela ningbaw ni hpe hpaji daw kau sai lam, Ahihtohpela hpe mung kaning rai hpaji jaw nu ai lam tsun dan wu ai. 16 Dai sha n-ga, Hushai gaw, ?Ya jang alawan rawt mat wa manu! Nam Mali kata na uhkan ni hkan dai na jang pyi n hkring nga na matu Dawi hpang de kasa shangun dat mu; shi hte shi a masha ni yawng n rim hkrum na hte sat kau ai n hkrum lu mu ga, ya jang Yawdan hka rap mat wa manu,? ngu nna tsun dan wu ai.
17 Abiahta a kasha Yonahtan hte Zadok a kasha Ahimaza yan gaw mare de shang yang mu kau na tsang nga ma ai majaw Yerusalem mare makau na Enrogela hka hpawk e ala nga ma ai. Shaloi shangun ma numsha langai mi gaw ayan sa nna hpa byin nga ai lam shan hpe tsun dan nhtawm shan mung Hkawhkam Dawi hpe sa tsun dan ma ai. 18 Rai ti mung lani mi na aten hta, ma langai mi mahtang shan hta hkrum hkra ai lam hpe mu kau dat wu ai rai nna, Absalom hpe tsun dan kau wu ai. Dai re ai majaw Bahurim mare na masha langai mi a nta hta makoi nga na nga, shan tin tin sa mat wa nhtawm shi a nta makau na hka htung kata de shang makoi mat ma ai. 19 Dai wa a madu jan mung magap langai la nna hka htung ntsa e magap da nhtawm de a ntsa hta nsi naisi lam da nga ai rai nna kadai mung n chye kau ma ai. 20 Absalom a du salang ni dai nta de sa nhtawm numsha dai hpe, ?Dai rai taw, Ahimaza hte Yonahtan yan kanang rai nga ma ta?,? ngu nna san ma ai.
Numsha mung, ?Hka wora hkran de rap mat wa masai,? ngu nna htan wu ai.
Dai masha ni shan hpe hkan tam yu ma ti mung n mu jang, Yerusalem mare de shanhte bai nhtang mat wa ma ai. 21 Shanhte pru mat wa jang, Ahimaza hte Yonahtan yan mung hka htung kata na pru wa nhtawm Hkawhkam Dawi hpang de sa wa nna byin ai lam tang madun ma ai. Shan gaw Ahihtohpela kaning rai maw mawn lajang ai lam shi hpe tsun dan nhtawm, ?Alawan rawt nna hka wora hkran de rap mat wa na lam,? tsun dan ma ai. 22 Dai rai nna Dawi hte shi a masha ni Yawdan hka wora hkran de rap ma ai rai nna nhtoi htoi jang shanhte yawng rap kawt mat lu ma ai.
23 Ahihtohpela chyawm gaw shi jaw ai hpaji hku n hkan ai hpe mu jang, shi a lawze byau la nna daidaw buga de nhtang mat wa wu ai. Shi a amu ni hpe hpajang da ngut jang shi hkum nan dau si mat wu ai. Shing rai shi a dinghku masha ni hpe makoi mayang ai lup hta shi hpe makoi mayang da nga ma ai.
24 Dawi gaw Mahanim mare de du mat wa ai aten hta Absalom hte Israela masha ni mung Yawdan hka rap kawt mat wa ma ai. 25 (Absalom gaw Yoab a shara hta Amasa hpe up hkang du shatai da wu ai. Amasa chyawm gaw Yoab a kanu Zeruia a kanau Nahasha a shayi sha Abigala hte Ishmaela masha Ihtra yan a kasha rai nga ai.) 26 Absalom hte shi a masha ni mahtang Gilead mung e dap jung nga ma ai.
27 Dawi gaw Mahanim mare de du jang, Amon mung Raba mare kaw na Nahasha a kasha Shobi hte mung, Lodeba mare na Amiela a kasha Mahkira hte mung, Gilead mung Rogelim mare na Barazilai ni hte mung wa hkrum wu ai. 28-29 Dawi hte shi a masha ni nam mali kata e hki ba nna kawsi hpang gara hkrum sha nga ma ai hpe shanhte chye ma ai majaw shanhte gaw jarung, ga di bu hte panep ni hpe mung, Dawi hte shi a masha ni sha na lusha a matu hkaulan mam, muk-yaw mam, malu masha, kabaw da ai nsi naisi, shapre, naw kyu, lagat ntsin, htawbat, chyu shage hte sagu ni sa sak jaw ma ai.