14
1 Yoab chyawm gaw Hkawhkam Dawi Absalom hpe nachying dum marit nga ai hpe chye yu wu ai rai nna,
2 Tekoa mare hta nga ai dai myit let ai numsha langai mi hpe shaga shangun dat wu ai. Numsha dai du jang, Yoab gaw shi hpe, ?Na a kara n masit ai sha, ayawn hpun palawng bu hpun nhtawm sharung shayawt masu u. Shing rai aten na na sharung shayawt hkrum ai numsha langai zawn galaw u.
3 Dai hpang hkawhkam wa hpang de shang nhtawm ngai nang hpe kaning ngu tsun na lam tsun dan sai hte maren, shi hpe tsun na rai ndai,? ngu nna tsun dan wu ai.
4 Dai numsha mung hkawhkam wa kaw shang nna ga de dingnyawm dagup let hkungga jaw nna, ?Nye a hkawhkam wa e, ngai hpe karum la e law!,? ngu nna tsun wu ai.
5 Shi gaw dai numsha hpe, ?Nang hpa ra n ta?,? ngu nna san wu ai. Dai numsha mung, ?Madu e, ngai gaw matsan mayan re ai gaida jan langai mi rai nga nngai. Nye a madu wa mung si mat sai.
6 Madu e, ngai shadang sha lahkawng lu nngai; lani mi na aten hta shan hpe je la na masha kadai n nga ai pa hkan e ga law ningdang hkat nna gasat hkat ma ai; shaloi langai wa mi gaw kaga langai wa hpe sat kau wu ai.
7 Ya rai yang mung, Madu e, nye a amyu makyin jinghku ni ngai hpe nhtang gumlau nhtawm shi a kahpu hpe sat kau ai a majaw shi hpe mung sat lu na matu shanhte a lata de nye a kasha hpe ap ya na hpyi nga ma ai. Dai zawn shanhte galaw ma ai rai yang gaw shadang sha langai mi mung n lu mat ai sha kau da ai hkrum na nngai. Nye a hpang jahtum na myit mada lam hpe jahten sharun kau ya nna nye a madu wa a mying ahkrung nga shangun na matu shi a amyu matu shadang sha hpe jahtum kau ya na mara ai,? ngu nna htan wu ai.
8 Hkawhkam wa gaw, ?Nta de nhtang wa sanu; dai amu ngai myit yu na nngai,? ngu nna htan wu ai.
9 Numsha gaw, ?Nye a madu hkawhkam wa e, nang galaw ai hpa lam a majaw mung, nye a dinghku masha ni hte ngai hta sha mara kap nga u ga; nang hte na a hkawhkam wang na dinghku masha ni hta chyawm gaw mara n kap nga u ga law,? ngu nna tsun wu ai.
10 Hkawhkam wa gaw, ?Nang hpe jahkrit shama ai masha kadai hpe mung ngai hpang de woi sa wa rit; shi nang hpe galoi mung bai sharu shatsang lu na wu ai n rai,? ngu nna tsun htang wu ai.
11 Dai numsha gaw, ?Nye a Madu hkawhkam e, si mat sai nye a kasha a matu matai htang ya na lit nga ai nye a amyu jinghku ni mahtang gaw naw ngam nga ai nye a kasha hpe sat kau nna grau kaba ai ru hka amu n shut kau mu ga, dai Madu na a Karai Kasang kaw chyeju hte hpyi nem ya e law,? ngu nna tsun wu ai.
Dawi mung, ?Na a shadang sha hta lamyin chyang mi pyi machyi hkra lu na n rai nga ai gaw ahkrung nga ai dai Madu hta ngai ga sadi tawn da nngai,? ngu nna tsun htang wu ai.
12 Dai numsha gaw, ?Nye a madu hkawhkam wa e, chyeju hte lam langai sha gaw ngai hpe naw tsun shangun e law,? ngu nna tsun wu ai.
Dai re ai majaw shi gaw, ?Mai sa, tsun u,? ngu nna htan wu ai.
13 Numsha gaw shi hpe, ?Dai rai yang, Karai Kasang a amyu masha ni hpe hpa majaw dai zawn shut ai amu hpe nang galaw shut kau n ta? Kaga mung de hprawng mat wa ai na a kasha hpe nhtang wa na ahkang nang n jaw nga ndai; nang tsun nit dai hte maren nang nan daw dan kau nit dai.
14 Anhte yawng si na sha rai nga saga ai; anhte gaw ga ntsa e hkaw gamang mat nna mahkawng la n lu ai hka hte she bung mat nga saga ai. Karai Kasang gaw si mat sai wa hpe bai n jahkrung ya wu ti mung, nang hkawhkam wa gaw kaga mung de hprawng mat wa ai masha langai mi hpe sha gaw yawm dik tam la nna bai woi la lu na ndai.
15 Nye a madu hkawhkam wa e, ya nang kaw sa nna tsun dan ra ai lam mung, amyu masha ni ngai hpe jahkrit shama ai a majaw rai nga ai. Dai rai nna ngai hpyi ai lam hpe nang galaw ya na rai nga a dawng ngu myit mada let, nang hpe tsun we ai zawn ngai myit la nga nngai.
16 Karai Kasang gaw shi a amyu masha ni hpe jaw ya ai lamu ga kaw na anhte hpe htawt kau na kaw na mung, nye a kasha hte ngai hpe sat kau na matu shakut nga ai wa a lata kaw na mung, ngai hpe hkye la na lam mung, ngai tsun ai ga hpe nang madat ya na rai nga ndai hpe mung ngai myit nawn da we ai.
17 Madu e, hkawhkam wa gaw Karai Kasang a lamu kasa hte bung nna kaja ai hte n kaja ai hpe chye ginhka lu ai majaw na a ga sadi gaw ngai hpe myit lum shangun na rai nga ai hpe ngai myit dum lu nga nngai. Dai Madu na a Karai Kasang gaw nang hte rau anga nga u ga law!,? ngu nna tsun wu ai. Ref 14:17: 2Sa 19:27.
18 Hkawhkam wa gaw, ?Ngai nang hpe ga san langai mi naw san yu de ga, dai teng man ai lam mahkra ngai hpe tsun dan lu na rai ndai,? ngu nna htan wu ai.
Numsha mung, ?Madu hkawhkam wa e, san mayu ai lam hpa mung ngai hpe san e,? ngu nna htan wu ai.
19 Dawi gaw dai numsha hpe, ?Ndai amu Yoab mahtang nang hpe galaw shangun ai n rai ni?,? ngu nna san dat wu ai.
Dai numsha mung, ?Nye a madu hkawhkam wa e, chyoi pra nga ai hte maren, ndai lam yawng hpe nga dagam nngai; nang san ai ga san hpe koi yen nna htai na lam hpa mi n nga nga ai. Dai gaw na a du Yoab mahtang ngai hpe kaning rai galaw na, kaning rai tsun na lam ngai hpe hkang dat ai hte maren kaja wa rai nga ai.
20 Shi gaw ndai lam mahkra hpe shading sharai na matu galaw nu ai. Madu hkawhkam wa gaw Karai Kasang a lamu kasa zawn hpaji rawng ai hte byin mabyin lam magup hpe chye ya nga ndai,? ngu nna htan wu ai.
21 Dai hpang hkawhkam wa gaw Yoab hpe, ?Nang ra ai hku galaw na matu ngai daw dan da se ai. Dai shabrang wa Absalom hpe sa shaga la nna ndai de woi wa mi,? ngu nna tsun wu ai.
22 Yoab gaw ga de gum dagup nhtawm Dawi a man e hkungga jaw let, ?Nye a madu hkawhkam wa e, Karai Kasang nang hpe shaman ya nga u ga law! Nye a hpyi lajin ai lam hpe jaw ya nit dai majaw nang ngai hpe ra sharawng nga ndai gaw, ya ngai chye ni ai,? ngu nna tsun wu ai.
23 Dai hpang shi gaw Geshura de sa nna Absalom hpe Yerusalem mare de bai woi wa wu ai.
24 Hkawhkam wa chyawm gaw kaning hku rai tim, Absalom gaw hkawhkam wang e n nga lu na lam hkang da wu ai. Hkawhkam wa gaw, ?Ngai shi hpe n mu mayu nngai,? ngu nna tsun wu ai. Dai re ai majaw Absalom mung shi a nta hta sha nga nga ai hte hkawhkam wa a man de n pru hkawm wu ai.
25 Israela amyu hta Absalom zawn ahpraw tsawm nna mying gumhkawng ai masha langai mi mung n nga nga ai. Shi gaw abaw kaw nna lagaw hkren ra rawng ai lam hpa mung n nga ai wa rai nga ai.
26 Shi a kara grai htat nga ai rai nna dai hpe laning mi hta kalang rep kau wu ai; shi a kara njaw nau wa galu nna li nga ai shaloi shen yu yang hkawhkam hkaw e lang ai joi jang hte maren pawng manga daram li nga ai.
27 Absalom gaw shadang sha masum hte Tama mying ai grai tsawm htap ai shayi sha langai lu nga ai.
28 Absalom chyawm gaw hkawhkam wa hpe n mu lu ai sha lahkawng ning tup Yerusalem mare e nga nga wu ai.
29 Dai hpang Absalom gaw shi a matu hkawhkam wa hpang de sa shangun na nga, Yoab hpe shaga ti mung shi n sa ya nga ai. Kalang bai shaga wu ti mung shi n sa hkraw nga ai.
30 Dai re ai majaw Absalom gaw shi a shangun ma ni hpe, ?Yu mu, Yoab a yi gaw ngai hte ani sha rai nga ai; dai yi hta muk-yaw mam tu nga ai; dai ni hpe sa nat kau masu,? ngu nna tsun wu ai. Shanhte mung dai yi sa nat kau ya ma ai.
31 Yoab gaw Absalom a nta de sa nhtawm, ?Na a shangun ma ni nye a yi hpe hpa majaw sa nat kau ya ma ni?,? ngu nna san wu ai.
32 Absalom chyawm gaw, ?Ngai nang hpe shaga shangun dat yang, nang n sa ndai majaw ya mung hkawhkam wa kaw shang lu na matu ngai nang hpe ra nga nngai rai nna nang kaw nna shi hpe ning ngu san ya rit: ?Ngai gaw Geshura mare kaw na ndai shara de hpa majaw wa nngai kun? Dai mare e sha nga nga na gaw nye a matu grau mai kaja nga ai,?? ngu nna htan wu ai. Absalom gaw matut nna, ?Hkawhkam wa hpe mu lu n-ga, nye a matu ngai nang hpe lajang shangun mayu nngai; ngai hta mara kap nga ai rai yang mung, shi ngai hpe sat kau sanu ga,? ngu nna tsun wu ai.
33 Dai rai nna Yoab mung Hkawhkam Dawi hpang de sa nhtawm Absalom tsun ai lam shi hpe tsun dan wu ai. Shaloi hkawhkam wa Absalom hpe shaga shangun dat wu ai rai nna hkawhkam wa kaw sa nhtawm shi a man e ga de gum dagup wu ai. Hkawhkam wa mung shi hpe hkap hkalum la ai hte pup wu ai.