9
1 Benyamin amyu bawsang hta na Kisha mying nhtawm sut su nna daru magam rawng ai wa langai mi nga nga ai. Shi gaw Ahpia amyu lakung lama a amyu daw chyen rai nga ai Behkorat dinghku kaw na ran yu wa ai Zerora a kashu, Abiela a kasha rai nga ai.
2 Shi hta Shawlu mying ai shadang sha langai lu ai; dai wa gaw ahpraw tsawm nna wa-ngan marai rawng ai wa rai nga ai. Shawlu gaw Israela mung na masha kadai hta mung abaw langai jan kra ai hte tsaw ai wa rai nna grau nna tsawm ningja mung rawng nga ai.
3 Ya, Kisha madu da ai lawze nkau mi dam mat wa ai rai nna shi gaw Shawlu hpe, ?Nang hte rau shangun ma langai ngai hpe woi nhtawm dai lawze ni hpe hkan tam masu,? ngu nna tsun wu ai.
4 Shan gaw Ehprim bum ga ting hte Shalisha ginwang hkan hproi hkra du hkawm mu ti mung, dai ni hpe n mu tam ma ai; shan gaw Shalim ginwang de matut tam mat wa ma ti mung dai yang hkan e lawze ni n nga nga ai. Dai hpang Benyamin a lamu ga hkan tam yu mu ti mung n mu nga ma ai.
5 Shan gaw Zuhpa ginwang de du ai shaloi, Shawlu gaw shi a shangun ma wa hpe, ?An nta de nhtang wa saga; nye wa gaw lawze ni a lam myit na n rai, an a majaw chyawm gaw myit ru hpang wa na ra ai,? ngu nna tsun wu ai.
6 Shaloi shangun ma wa gaw, ?Naw la yu ga! Ndai mare e shi tsun matsun teng wa wa re ai majaw, grai hkungga ging nna chyoi pra ai masha langai mi nga ai. An shi kaw sa yu ga, an lawze mu tam la lu na shara, an hpe mahkoi tsun dan lu na a dawng!,? ngu nna htan wu ai.
7 Shawlu gaw, ?Ataw, an shi kaw sa ai rai yang, shi hpe hpa baw kumhpa jaw lu na rai ga ta? An a lit hta lusha hpa mung n nga sai; shi hpe jaw na arai hpa mung an n lu saga ai, hpa naw lu nga ga ta?,? ngu nna san wu ai.
8 Dai shangun ma wa gaw, ?Ngai gumhpraw dengga kaji mi lu nngai; ngai shi hpe jaw na nngai; shaloi an mu tam la na shara, shi an hpe tsun dan na ra ai,? ngu nna htan wu ai.
9-11 Shawlu gaw, ?Dai gaw kaja ai lam langai rai nga ai! Gai sa yu saga,? ngu nna htang tsun wu ai. Dai rai nna, chyoi pra ai wa nga ai mare de sa mat wa ma ai. Shan gaw dai mare nga ai bum de lung wa ma ai shaloi, hka ja na matu pru sa wa ai numsha nkau mi hte hkrum ma ai. Shing rai shan gaw dai numsha ni hpe, ?Myi san wa mare kata e n nga a ni?,? ngu nna san ma ai.
(Dai aten hta myihtoi wa hpe myi san wa ngu nna shamying ma ai rai nna, marai langai ngai Karai Kasang kaw ga san san mayu ai shaloi, ?Myi san wa kaw sa yu ga,? ngu nna shi tsun na wu ai.)
12-13 Dai numsha ni chyawm gaw, ?Rai sa, shi nga nga ai,? ngu nna htan ma ai. Kaja wa shi gaw nan a shawng e sha rai nga ai; nan tin tin rai lu myit yang gaw shi hpe hkan dep lu na myit dai. Nan dai mare de du shang wa ai hte shi hpe mu na marin dai. Amyu masha ni kawng ntsa na tawn hkungri hta shagu hkungga nawng ya ma ai majaw shi gaw dai shara de dai ni du lung wa na ra ai. Shi gaw dai shagu hkungga hpe shi shawng shaman ya na wu ai majaw dai yang e shi du sa ai aten du hkra shaga da hkrum ai amyu masha ni sha hpang wa lu na ma ai n rai. Nan ya jang sa mat wa myit, dai rai yang chyawm gaw sha na matu kawng de shi garai n lung wa yang shi hpe sa hkrum na myit dai,? ngu nna htan dat ma ai.
14 Dai rai nna, Shawlu hte shi a shangun ma wa gaw mare de lung wa ma ai; ya mare de shan shang wa ma ai shaloi, Samuela gaw nawku ai shara de lung wa nga yang, shan hpang maga de sa wa nga ai hpe shan mu ma ai.
15 Ya, Shawlu garai n du ai shawng shani sha, dai Madu gaw Samuela hpe,
16 ?Hpawt de ndai aten daram hta e, Benyamin amyu bawsang hta na masha langai mi, nang hpang de ngai shangun dat na nngai; shaloi nye a amyu masha Israela hpe up hkang ai wa shatai nna, shi hpe namman jaw ya na rai ndai; shing rai shi gaw shanhte hpe Hpilisti masha ni a lata kaw nna hkye mawai la na ra ai. Nye a amyu masha ni hkam sha ai nni nkri hpe ngai mu se ai; shanhte hpe karum la na matu shanhte a hpyi jahtau ai nsen ni hpe mung na se ai,? ngu nna tsun wu ai.
17 Samuela gaw Shawlu hpe mu ai shaloi, dai Madu gaw shi hpe, ?Ngai nang hpe tsun ai gaw, dai wa rai nga ai. Shi gaw nye a amyu masha ni hpe up hkang na ra ai,? ngu nna tsun wu ai.
18 Dai hpang, Shawlu gaw chyinghka lam makau e tsap nga ai Samuela hpang de sit sa nna, ?Myi san wa kanang e nga a ta? Ngai hpe tsun dan e law,? ngu nna san wu ai.
19 Samuela mahtang, ?Ngai gaw myi san wa rai nga nngai. Htawra nawku ai shara de nye a shawng e lung wa su. Nan lahkawng dai ni na nhtoi hta ngai hte rau shat sha na re; hpawt de manap aten e na a ga san ni yawng hpe htai ya na nngai; dai hpang nan hpe hkawm sa wa shangun na nngai.
20 Lai sai masum ya laman mat mat sai lawze ni a matu hkum myit tsang nga masa; dai ni hpe mu la masai. Rai ti mung, Israela amyu masha ni grai ra marit nga ai gaw kadai hpe rai nga a ta? Dai gaw nang hpe rai nga ai, nang hte na a nwa a dinghku ni rai nga ai,? ngu nna htan wu ai.
21 Shawlu gaw, ?Ngai gaw Israela hta kaji htum ai amyu bawsang rai nga ai Benyamin amyu bawsang na she rai nga nngai; nye a dinghku mung amyu bawsang hta ahkyak htum ai shara hta nga ai n rai nga ai. Dai rai yang, nang ngai hpe hpa majaw dai zawn nga tsun n ta?,? ngu nna htan wu ai.
22 Dai hpang, Samuela gaw Shawlu hte shi a shangun ma hpe gawk kaba de woi shang mat wa nhtawm manam masha sumshi hte shang dung lu ai shara hta nga ai saboi nhtung maga de na shara langai mi shan hpe jaw wu ai.
23 Samuela gaw shat shadu ai wa hpe, ?Kaga san rai tawn da na matu nang hpe ngai tsun nna jaw da ai shan tawng la wa rit,? ngu nna tsun wu ai.
24 Dai rai nna shat shadu ai wa mung, kaja htum ai magyi shan la wa nhtawm Shawlu a man e dai hpe tawn da ya wu ai. Shaloi, Samuela gaw, ?Ndai gaw na a matu ngu nna kyem da ai shan tawng rai nga ai. Ndai aten hta ngai saw shaga da ai masha ni hte rau sha na ngu nna na a matu san da ai re, dai hpe sha u,? ngu nna tsun wu ai.
Dai rai nna Shawlu mung Samuela hte rau dai shani e sha wu ai.
25 Shing rai shanhte gaw nawku ai shara kaw nna mare de yu wa nhtawm nta numgaw e Shawlu a matu yup ra lajang da ya ai shara hta
26 shi yup nga ai.
Jahpawt nhtoi htoi wa ai aten hta, Samuela gaw nta ntsa htap e nga ai Shawlu hpe, ?Rawt u, nang hpe ngai shabawn dat na we ai,? ngu nna shaga dat wu ai. Shaloi Shawlu rawt nna Samuela hte rau nmaw lam de pru wa ma ai.
27 Shan mare shingnawm de du ai shaloi, Samuela gaw Shawlu hpe, ?Na a shangun ma wa hpe shawng magang na tsun u,? ngu nna tsun wu ai. Shangun ma wa mung shawng magang mat wa ai hpang, Samuela gaw, ?Ndai yang e hkring mi naw tsap u; ngai nang hpe Karai Kasang tsun ai ga htawn tsun dan na de ai,? ngu nna matut tsun wu ai.