4
1 Dai aten hta Hpilisti masha ni gaw Israela amyu masha ni hpe gasat na nga, hpawng shinggyin nga ma ai; Israela amyu masha ni mung shanhte hpe htim gasat na nga, pru sa wa ma ai. Israela amyu masha ni gaw Ebeneza shara e shanhte a dap jung nhtawm, Hpilisti masha ni gaw Ahpek shara e dap jung ma ai.
2 Hpilisti masha ni gasat ma ai rai nna laja lana htim anut gasat ngut ai hpang, Israela amyu masha ni hpe mahtang dang kau ai hte dai majan pa e masha hkying mali daram hpe sat kau ma ai.
3 Naw hkrung nga ai ni dap de nhtang wa shajang yang, Israela ningbaw ni gaw, ?Dai ni na nhtoi hta dai Madu gaw hpa majaw Hpilisti masha ni hpe dang kau shangun ai kun? Shi anhte hte rau sa nna gumlau hpyen ni a lata kaw na anhte hpe hkye la mi ga, Shilo mare na dai Madu a Ga Shaka Sumpu hpe wa la saga,? ngu nna tsun ma ai.
4 Shanhte gaw Shilo de kasa ni hpe shangun dat nhtawm singkaw tu ai hkrung kanu ntsa e dung ai Chyahtum Chyalai N-gun rawng ai dai Madu a Ga Shaka Sumpu hpe la sa ma ai. Eli a kasha Hopni hte Hpineha yan mung dai Ga Shaka Sumpu hte rau hkan sa wa ma ai. Ref 4:4: Pru 25:22.
5 Dai Ga Shaka Sumpu du jang, Israela amyu masha ni gaw ginding aga ashun hkra kabu gara ai hte ja ja jahtau garu nga ma ai.
6 Hpilisti masha ni dai jahtau garu ai nsen na jang, ?Hebre dap e jahtau garu ai nsen yawng hpe madat yu mu! Dai gaw hpa baw lachyum rai nga a ta?,? ngu nna tsun ma ai. Hebre dap e dai Madu a Ga Shaka Sumpu du nga sai hpe shanhte mu chye ma ai shaloi,
7 shanhte gaw hkrit ai hte, ?Shanhte a dap de karai langai du nga manu hka! Anhte htum mat na saga ai! Shawng de anhte hta ndai zawn re ai hpa mung garai n byin yu ai mi!
8 Ndai daru magam n-gun rawng ai hpara ni a lata kaw na kadai wa anhte hpe hkye la lu na rai nga a ta? Dai hpara ni gaw nam mali hkan e Egutu masha ni hpe sat sharu kau ai hpara ni rai nga ma ai!
9 Hpilisti masha ni e, share shagan nga mu! Wa-ngan n-gun rawng ai masha ni zawn gasat mu! Shing n rai jang, shanhte gaw anhte a mayam ni rai yu manu ai zawn, anhte mung Hebre masha ni a mayam tai mat na raga ai. Dai majaw wa ngan n-gun rawng ai masha ni zawn htim gasat mu!,? ngu nna tsun mu ai.
10 Hpilisti masha ni aja awa gasat ma ai rai nna, Israela amyu masha ni hpe dang kau ma ai; shanhte mung tinang dum nta ni de hprawng mat wa ma ai. Dai yang e, ja ja kahtam sat hkat ma ai rai nna, Israela hpyenla mun masum sat kau ai hkrum ma ai.
11 Karai Kasang a Ga Shaka Sumpu mung la kau ya hkrum ai hte Eli a kasha Hopni yan Hpineha shan lahkawng sat kau hkrum ma ai.
12 Benyamin amyu bawsang hta na langai mi gaw hpyen ginra kaw nna Shilo mare de kagat wa ai rai nna, dai shani jang dai de du wa wu ai. Shaloi shi a yawn hkyen ai hpe madun dan na nga, shi a hpun palawng hpe gang je kau nhtawm shi a baw ntsa e ga hte bun dan wu ai.
13 Eli mung Ga Shaka Sumpu a majaw grai myit tsang ai hte lam makau na dung shara langai mi a ntsa hta dung nga let azi yu nga ai. Dai wa mare ting de ashi wa shamawng dat wu ai majaw, hkrit gari ai hte jahtau hkrap nga ma ai.
14 Dai garu kachyi nga ai nsen hpe Eli na jang, ?Ndai garu kachyi nga ai nsen yawng gaw hpa wa rai ta?,? ngu nna san wu ai. Dai masha wa gaw Eli hpang de tin tin sa mat wa nhtawm dai ashi wa tsun dan wu ai.
15 (Dai shaloi Eli gaw asak jahku shi matsat ning du sai rai nna, ganoi noi myi n mu hkyen nga nu ai.)
16 Dai masha wa gaw, ?Ngai gaw majan gasat ai kaw na lawt wa nngai; dai ni ndai de lam dingyang kagat wa nngai,? ngu nna tsun dan wu ai,
Eli gaw shi hpe, ?Ngai sha e, hpa baw byin sata?,? ngu nna san wu ai.
17 Kasa wa gaw, ?Israela gaw Hpilisti masha ni kaw na kagat hprawng mat masai; dai gaw anhte a matu hkrit hpa sum kaba rai nga mali ai! Dai sha n-ga, na a kasha Hopni hte Hpineha yan mung sat kau hkrum nga masai; Karai Kasang a Ga Shaka Sumpu mung rim la kau hkrum nga sai!,? ngu nna htan wu ai.
18 Dai wa Ga Shaka Sumpu a lam tsun dan jang, Eli gaw chyinghka lam makau shi dung nga ai shara kaw nna shingdu de nga kadawng mat wa wu ai. Shi gaw asak grai kaba sai hte hpum nga ai majaw shi a du daw mat nna si mat sai. Shi gaw mali shi ning tup Israela amyu hta ningbaw tai lai wa nu ai.
19 Ya, Eli a kanam, Hpineha a madu jan gaw na-um nasin hkum rai nna ma shangai na nhtoi gu wa magang ra ai. Karai Kasang a Ga Shaka Sumpu rim la kau hkrum sai lam mung, shi a kagu hte shi a madu wa si mat sai lam ni hpe mung shi na ai shaloi, akajawng sha shinggyim machyi ai hte shangai chyinghkai ya wu ai.
20 Shi si wa magang yang, numsha ni shi hpe karum la let, ?Masin shaja u! Nang shadang sha langai shaprat nit dai,? ngu nna tsun ma ai. Rai ti mung, shi gaw hpa zawn mung n nawn ai hte n htan ya nga nu ai.
21 Shi gaw ma dai hpe Ihkabu ngu nna shamying da wu ai: dai gaw, ?Karai Kasang a hpung shingkang Israela kaw na pru mat wa sai,? ngu ai hpe tsun shaleng ai rai nga ai. Ga Shaka Sumpu rim la kau hkrum ai mung, shi a kagu hte madu wa si mat wa ai hte mung lakap nga ai.
22 Shi gaw, ?Karai Kasang a Ga Shaka Sumpu rim la kau hkrum sai majaw Karai Kasang a hpung shingkang Israela kaw na pru mat sai,? ngu nna tsun wu ai.