30
Lahkawng ya na ai hpang, Dawi hte shi a masha ni Ziklag mare de nhtang du wa ma ai. Amalek masha ni chyawm gaw Yuda mung a dingda daw hte Ziklag mare ni hpe shang gasat nna hpya kau da ma ai. Shanhte gaw dai mare hpe mung nat kau da nhtawm, numsha ni yawng hpe rim la kau ma ai; shanhte gaw kadai hpe mung n sat kau da mu tim, shanhte pru mat wa ai shaloi masha shagu hte hpe shanhte hte rau woi mat wa ma ai. Dawi hte shi a masha ni du shang wa ma ai shaloi, mare dai nat kau hkrum nna shanhte a madu jan ni hte shayi shadang sha ni mung lawm mat wa masai hpe shanhte wa mu ma ai. Shaloi Dawi hte shi a masha ni gaw jahtau hkrap hpang wa ai hte shanhte grai ba kalawp mat hkra, ahkrap nga ma ai. Dawi a madu jan lahkawng yan rai nga ai Ahinoam hte Abigala yan pyi woi mat wa hkrum nga masai. Ref 30:5: 1Sa 25:42-43.
Dawi a masha ni gaw shanhte a kashu kasha ni mat mat nna shanhte yawng ahkup ahka nga ai hte shi hpe nlung hte kabai sat na nga jahkrit sharim ma ai majaw, dai aten hta Dawi gaw ru tsang kaba hkrum sha nga wu ai; rai ti mung dai Madu shi a Karai Kasang mung shi hpe nden marai jaw ya wu ai. Dawi gaw Ahimelek a kasha hkinjawng Abiahta hpe, ?Hpa hkai lawng ngai kaw la wa rit,? ngu nna tsun wu ai shaloi, Abiahta mung dai hpe shi hpang de la wa ya wu ai. Ref 30:7: 1Sa 22:20-23. Dawi gaw dai Madu hpe, ?Ndai zawn shang hpya ai masha ni a hpang ngai hkan mai na a ni? Shanhte hpe hkan shachyut dep lu na kun?,? ngu nna san wu ai.
Shaloi dai Madu gaw, ?Shanhte kaw hkan su; shanhte hpe hkan dep nna, bawng masha ni hpe bai lu mawai la lu na rai ndai,? ngu nna htan wu ai.
Dai rai nna Dawi gaw shi a masha kru tsa hte pru sa wa nna, Besora hka shi e shanhte du jang, shanhte hta na nkau mi dai yang e nga mat ma ai. 10 Dawi gaw shi a masha mali tsa hte matut nna hkan ma ai; masha lahkawng tsa hte gaw hka shi rap kawt lu na matu nau ba mat ma ai majaw shingdu e hti ngam mat ma ai. 11 Dawi a masha ni Egutu lasha langai mi hpe bum ga e hkrum ai rai nna Dawi hpang de woi wa ya ma ai. Shanhte gaw lusha loi mi hte ntsin shi hpe jaw ma ai; 12 maihpang si jahkraw loi mi, sabyi si sumbaw lahkawng mung jaw ma ai. Shi sha ngut jang, n-gun bai rawng wa nga lu ai; shi gaw masum ya tup hpa mung n lu n sha ai sha, nga shalai kau nga ai. 13 Dawi gaw shi hpe, ?Na a madu kadai rai ta? Nang gara shara kaw nna sa wa n ta?,? ngu nna hkap san wu ai.
Shi gaw, ?Ngai gaw Amalek wa a mayam ngu na Egutu masha rai nga nngai. Ngai hta machyi makaw hkrum hkra ai majaw, nye a madu mung ngai hpe lai sai masum ya kaw nna tawn kau da nga sai. 14 Anhte gaw Yuda mung a dingda daw e nga ai Hkerehti lamu ga hte Hkaleb lakung lama ni a lamu ga ni hpe hpya jahten kau da nhtawm Ziklag mare hpe mung nat kau da ga ai,? ngu nna htan wu ai.
15 Dawi gaw, ?Ataw, dai shang hpya ai masha ni nga ai shara de nang ngai hpe lam woi madun lu na n ni?,? ngu nna shi hpe san wu ai.
Shi chyawm gaw, ?Nang ngai hpe n sat kau, nye a madu a lata de ngai hpe n ap kau na lam, Karai Kasang a mying ningsang hta ngai hpe ga sadi jaw n yang gaw ngai lam madun na de ai,? ngu nna htan wu ai. 16 Shi mung Dawi hpe shanhte hpang de sa nna woi madun kau wu ai.
Majan shang gasat ai ni gaw Hpilisti hte Yuda mung na shanhte rim la lu ai lanep arai sumpum kaba ni a majaw lu let, sha let, poi galaw nna dai shara ni hta pri rai jawng nga ma ai. 17 Dawi mung shawng jahpawt kaw nna hpang shana de du hkra shanhte hpe gasat ma ai rai nna, gawla-uk jawn ai shabrang mali tsa hprawng lawt wa lu ai hta kaga, langai mi mung n lawt lu nga masai. 18 Dawi chyawm gaw shanhte woi mat wa ai masha shagu hte hpe mung, Amalek masha ni magawn mat wa ai lanep arai shagu hte hpawn shi a madu jan yan hpe mung hkye mawai la lu nga wu ai; 19 dai arai ni hpa mung n mat nga ai. Dai rai nna Dawi a masha ni a shayi shadang sha ni yawng hte Amalek masha ni magawn mat wa ai lanep arai ni yawng hpe shi bai lu la da wu ai. 20 Shi gaw gawt wa ai sagu dumsu hpung ni hpe la wu ai. Shi a masha ni gaw shi a shawng e gawt wa nna, ?Ndai gaw Dawi madu da nga sai,? ngu nna tsun ma ai.
21 Dai hpang, hki ba nna n hkan nang lu sai majaw Besora hka shi e hti ngam nga ai marai lahkawng tsa nga ai de Dawi nhtang wa wu ai. Shanhte mung Dawi hpe sa tau la na nga, shawng de pru sa ma yang, Dawi mahtang shanhte kaw lung wa nna shanhte hpe tsaw ra ai hte shakram la wu ai. 22 Rai ti mung, Dawi hte rau hkawm sa ai ni hta na angawk ai hte n hkru ai masha nkau mi mahtang, ?Shanhte gaw anhte hte rau n sa ma ai majaw lanep arai hpa mung shanhte hpe jaw lu na ga ai n rai. Shanhte a madu jan ni hte kashu kasha ni hpe sha woi nna wa mat mu ga,? ngu nna tsun ma ai.
23 Rai ti mung, Dawi chyawm gaw, ?Nye a hpu nau ni e, dai Madu anhte hpe jaw ya sai dai lanep arai hpe nanhte dai hku lu galaw na myit dai n rai! Shi she anhte hpe shim lum ai hte bau sin nna, shang hpya la ai masha ni hpe dang kau lu na awng padang jaw ya mi ai re. 24 Kadai mung nanhte tsun ai ga hpe myit hkrum lawm lu na n rai! Shingdu e hti ngam nga ai ni mung, majan pa de sa ai ni mung, maren mara re ai gambum garan la lu na rai nga ai,? ngu nna htan wu ai. 25 Dai shani kaw nna ya du hkra, Israela mung hta hkan sa nga lu na matu, Dawi gaw dai hkan sa na tara hpe galaw da nu ai.
26 Dawi gaw Ziklag mare de nhtang wa ai shaloi, ?Dai Madu a gumlau hpyen ni kaw na anhte la wa ai lanep ni hta na ndai gaw nanhte a matu san san jaw ya ai kumhpa rai nga ai,? ngu nna shi a manaw manang ni hpe mung, Yuda ningbaw ni hpe mung dai lanep daw chyen mi hte hpawn shi a mungga hte htet shabra dat wu ai. 27 Shi gaw dai kumhpa ni hpe Behtela masha ni hpang de mung, Yuda mung a dingda daw de nga ai Rama mare na masha ni hpe mung, Yatira, 28 Aroera, Sipmot, Eshtemoa; 29 hte Rahkala mare na masha ni hpang de mung, Yeramela lakung lama ni hpe mung, Keni masha ni hpe mung, 30 Horma, Borashan, Ahtak hte 31 Hebron mare masha ni hpe mung shagun jaw wu ai. Shi hte shi a masha ni du hkawm ai shara ni yawng de mung jaw dat wu ai.