29
Israela amyu masha ni Yezrela Kadit na hka hpawk makau e dap jung nga ma yang, Hpilisti masha ni mung shanhte a hpyen hpung ni yawng hpe Ahpek shara e woi hpawng tawn da ma ai. Hpilisti hkawhkam manga hte gaw shanhte a latsa dap, hkying dap hku garan da ai hte maren rau rawt sa wa ma ai; Dawi hte shi a masha ni chyawm gaw hpang e Hkawhkam Ahkisha hte rau hkan nang ma ai. Shaloi Hpilisti up hkang du ni gaw shanhte hpe mu nna, ?Ndai Hebre masha ni nang e hpa sa galaw nga ma ta?,? ngu nna san ma ai.
Ahkisha mahtang, ?Dai wa gaw Israela Hkawhkam Shawlu a du Dawi rai nga ai. Shi ngai kaw sa nga nga ai gaw ram ram na sanu ai. Shi ngai kaw sa nga nga ai shani kaw nna shi galaw shut kau ai amu hpa hpe mung mara shagun shara ngai n mu lu nngai,? ngu nna tsun wu ai.
Rai ti mung Hpilisti up hkang du ni mahtang Ahkisha hpe pawt mu ai hte shi hpe, ?Nang shi hpe jaw tawn da ai mare de shi hpe bai wa sa kau sanu; anhte hte rau majan pa de hkum hkan nang shangun et; majan gasat nga ai laman, shi mahtang anhte hpe nhtang tai na rai wu ai. Anhte a masha ni si mat jang sha, shi madu a myi man shapa ya lu nga ai hta kaga grau kaja ai lam shi a matu hpa naw nga nga a ni? ?Shawlu sat ai gaw hkying hkying rai nga ti mung, Dawi sat ai mahtang mun mun rai nga ai, nga nna numsha ni ka let mahkawn mangoi ai gaw ndai Dawi wa rai nga ai,?? ngu nna tsun ma ai. Ref 29:5: 1Sa 18:7; 21:11.*
Ahkisha gaw Dawi hpe shaga la nhtawm shi hpe, ?Nang ngai hta sadi dung nga ndai mung, ndai majan hta ngai hte rau nang pru sa nna sa gasat lawm ai amu hta ngai nang hpe myit du sade ai mung, nang ngai kaw du ai shani kaw nna ya du hkra nang hta hpa mara n mu mada ai mung, ahkrung nga ai Israela a Karai Kasang hta ngai dagam nga nngai. Rai ti mung, kaga hkawhkam ni mahtang nang hpe n ra sharawng nga ma ai. Dai re ai majaw, nta de angwi apyaw hte nhtang wa sanu; shanhte hpe myit n pyaw n ngawn shangun ai amu hpa mung hkum galaw shapraw dat et,? ngu nna tsun wu ai.
Dawi gaw, ?Madu e, ngai hpa baw galaw shut kau sata? Ataw, nang tsun ai hte maren nga yang, nang hpe ngai nnan daw jau hpang ai shani kaw nna dai ni du hkra ngai hta hpa mara mung nang n mu ai nga ai n rai ni? Dai rai yang me, nye a madu hte hkawhkam rai nga ai nang hte rau na a gumlau hpyen ni hpe ngai hpa majaw n mai pru gasat ang nga a ni?,? ngu nna htan wu ai.
Ahkisha gaw, ?Ngai chyawm gaw hkap la nngai, nang gaw Karai Kasang a lamu kasa langai zawn sadi dung nga ndai gaw ngai myit nawn nga nngai. Rai ti mung kaga hkawhkam ni mahtang anhte hte rau majan pa de n hkan sa lu na lam, tsun nga ma ai. 10 Dai re ai majaw, Dawi e, hpawt de gaw Shawlu hta naw ngam nga ai nanhte a masha yawng hte ngai kaw sa du nga sai ni jahpawt jau jau rawt nhtawm nhtoi htoi ai hte rau nhtang mat wa masu,? ngu nna nhtang tsun wu ai.
11 Dai rai nna Dawi hte shi a masha ni mung hpang jahpawt jau jau rawt nna Hpilisti mung de nhtang mat wa ma ai; Hpilisti masha ni chyawm gaw Yezrela shara de matut hkawm mat wa ma ai.