27
1 Dawi gaw, ?Lani mi na nhtoi langai ngai hta Shawlu ngai hpe sat kau na ra ai. Dai re ai majaw Hpilisti mung de hprawng shang mat wa ai gaw nye a matu kaja htum ai lam rai na sai. Shaloi Shawlu gaw Israela mung e ngai hpe tam shakut hkawm ai hpe jahkring kau ai hte ngai mung shim nga lu na rai nngai,? ngu nna shi kraw e sumru wu ai.
2 Shaloi Dawi hte shi kaw hkan nang ai masha kru tsa hte gaw kalang lata rawt nna Mohka a kasha Gat Hkawhkam Ahkisha hpang de rap sa mat wa ma ai.
3 Dawi hte shi a masha ni mung dai yang na Gat hkawhkam kaw shanhte a dinghku masha ni hte rau sa nga nga ma ai. Dawi mung shi a madu jan lahkawng rai nga ai Yezrela mare na Ahinoam hte Hkarmela mare na Nabala a gaida jan Abigala yan hte rau sa nga nga wu ai.
4 Dawi gaw Gat mare de hprawng mat wa sai shiga hpe Shawlu na jang, shi hpe tam shakut ai lam jahkring kau wu ai.
5 Dawi gaw Ahkisha hpe, ?Nang nye a manang nan rai nga n yang gaw, mare kaji langai mi hta ngai hpe nga shangun e. Bai madu e, ndai mare daju hta nang hte rau nga na gaw, nye a matu n ra nga li ai,? ngu nna tsun wu ai.
6 Dai rai nna Ahkisha mung shi hpe Ziklag mare jaw wu ai. Dai lam a majaw Ziklag mare hpe dai ni du hkra Yuda hkawhkam ni madu da nga ma ai.
7 Dawi gaw Hpilisti mung e shata shi kru nga kau wu ai.
8 Dai laman hte hta, Dawi hte shi a masha ni gaw dai ginwang ni hta moi kaw nna nga nga ai Geshuri, Girazi, hte Amalek masha ni hpe sa gasat mu ai. Shi gaw shanhte a lamu ga hpe Egutu mung de yu wa ai Shura mare de du hkra shang gasat la nhtawm,
9 numsha, lasha ni yawng hpe sat kau nna, sagu, dumsu, lawze, gawla-uk ni hte bu hpun palawng ni hpe pyi la kau ya ma ai. Dai hpang, shi gaw Ahkisha de bai nhtang wa yang,
10 ?Ndai aten hta nang gara hkan e hkan hpya hkawm nga n ni?,? ngu nna shi hpe san ai shaloi, Dawi gaw shi hpe Yuda mung a dingda daw shing n rai Yeramela lakung lama ni nga ai lamu ga, shing n rai Keni masha ni nga ai lamu ga de du hkra sa gasat ga ai, ngu nna tsun na mu ai.
11 Dawi gaw kadai mung Gat mare de n wa lu hkra mung, shi hte shi a masha ni teng teng galaw sai amu a lam n wa tsun dan hkra, masha shagu hte hpe mung, numsha, lasha ni hpe mung sat kau na wu ai. Ndai lam ni hpe Dawi shi Hpilisti mung e naw nga ai aten ting hta dai hku sha agalaw nga na wu ai.
12 Rai ti mung, Ahkisha mung Dawi hpe kam ai rai nna shi gaw, ?Dawi gaw shi a Israela amyu masha majing ni a majaw grai n dawng ai hkrum sha nga sai rai nna, shi a prat tup ngai hpe sha daw jau na rai sanu ai,? ngu nna shi a kraw hta tsun nga ai.