26
1 Ya Zihpa mare na masha nkau mi gaw Gibea shara e nga ai Shawlu hpang de sa nhtawm Yuda nam mali a shingnawm maga nga ai Hahkila Bum ntsa e Dawi makoi nga ai lam sa tsun dan ma ai. Ref 26:1: Shk 54 Ga Baw.
2 Shawlu gaw Israela amyu hta na kaja htum ai hpyenla hkying masum hte hpe woi nna Dawi hpe hkan tam na nga, Zihpa nam mali de kalang lata sa mat wa nhtawm,
3 Hahkila bum lam makau e dap jung nga ma ai. Dawi mahtang nam mali e naw nga nga ai rai nna shi hpe hkan tam na matu Shawlu du sa nga sai hpe shi chye ai shaloi,
4 shi gaw Shawlu dai yang e teng teng nga nga ai lam sa tam na matu kin-yu ni hpe dat dat wu ai.
5 Dawi gaw Shawlu hte shi a dap up du Nera a kasha Abna hte hpyenla ni yup nga ai shara de di rai kalang lata sa mat wa wu ai. Shawlu mahtang dap kata e yup nga nna shi a masha ni gaw shi a grup yin hkan e dap jung da ma ai.
6 Dai hpang, Dawi gaw Hiti masha Ahimelek hte Yoab a kanau Abishai, (shan a kanu gaw Zeruia rai nga ai) yan hpe, ?Nan hta na kadai mahtang Shawlu a dap de ngai hte rau sa na myit ni?,? ngu nna san wu yang,
Abishai mahtang, ?Ngai hkan na nngai,? ngu nna htan wu ai.
7 Dawi yan Abishai gaw Shawlu a dap de, dai shana e shang ma yang, shi a baw nhtung e nri hpe ga hta jung da nna, dap ka-ang e yup nga ai Shawlu hpe sa mu ma ai. Abna hte hpyen hpung ni chyawm gaw shi a grup grup hkan e yup nga ma ai.
8 Abishai gaw Dawi hpe, ?Karai Kasang gaw na a gumlau hpyen wa hpe na a lata hta dai na ap ya ra ai. Dai rai nna shi a nri hte nan aga de hkrang hkra kalang lata shi hpe galun htinggrang kau we ga, lahkawng lang pyi n kahtap ra na nngai!,? ngu nna tsun wu ai.
9 Rai ti mung, Dawi mahtang, ?Shi hpe machyi shangun lu na n rai! Shi lata san da sai hkawhkam wa hpe machyi shangun ai wa hpe dai Madu teng teng ari jaw na rai wu ai.
10 Dawi gaw, ?Dai Madu ahkrung nga ai hte maren, dai Madu nan Shawlu hpe sat kau na ra ai; shing n rai shi a aten du jang, shingra htung hte maren si na ra ai, shing n rai, majan hta si mat na ra ai.
11 Dai Madu nan hkawhkam shatai da sai wa hpe machyi shangun na matu ngai myit nga tim, dai Madu hkum kau ya nga ai. Sa, shi a nri hte ntsin namtau hpe chyawm gaw la mat wa ya ga,? ngu nna tsun wu ai. Ref 26:11: 1Sa 24:26.
12 Dai rai nna Dawi gaw Shawlu a baw nhtung makau e tawn da ai nri hte ntsin namtau hpe sha la nna shi hte Abishai bai pru mat wa ma ai. Langai mi mung shing re ai lam hpe n mu kau dat ma ai; hpa byin mat wa ai lam hpe mung n chye kau dat ma ai. Kadai sha pyi n hprang nga ma ai. Dai Madu mahtang shanhte hpe yup kaba hte shayup kau ma ai majaw, shanhte yawng angwi apyaw hte yup taw nga ma ai.
13 Dai hpang Dawi gaw kadit wora hkran de rap nhtawm tsawmra gang ai kawng pungding de lung wa nna, shim ai shara du jang,
14 Shawlu a hpyen hpung ni hte Abna hpe, ?E, Abna, ngai tsun ai ga hpe na lu n ni?,? ngu nna jahtau tsun wu ai.
Abna mahtang, ?Kadai wa dai zawn jahtau nna hkawhkam wa hpe jasu jahprang nga n ta?,? ngu nna bai san dat wu ai.
15 Dawi chyawm gaw, ?Abna e, nang gaw Israela amyu masha ni hta galu kaba htum ai wa n rai n ni? Dai re ai mi, na a madu hkawhkam wa hpe nang hpa majaw n makawp maga ya lu nga n ta? Na a madu hpe sa sat kau na nga, masha langai mi dabang kata de, ya sha shang wa nu ai law.
16 Abna e, na a lit hprai kau nga nit dai! Dai Madu hkawhkam shatai da sai na a madu hpe nang atsawm sha n makawp n maga nga ndai majaw, nanhte yawng si ging nga manit dai, ngu ahkrung nga ai dai Madu hta ngai dagam da se ai. Yu mu! Hkawhkam wa a nri kanang e rai nga sata? Shi a baw nhtung makau e tawn da ai ntsin namtau kanang e rai nga sata?,? ngu nna htan wu ai.
17 Shawlu chyawm gaw Dawi a nsen hpe chye matsing ai rai nna, ?Ngai sha Dawi e, dai gaw nang rai nga n ni?,? ngu nna san wu yang,
Dawi mung, ?Rai nga nngai, Madu hkawhkam e,? ngu nna htan wu ai.
18 Dawi gaw, ?Madu e, na a shangun ma wa hpe nang hpa majaw naw hkan shachyut nga n ta? Ngai hpa baw amu galaw shut kau nga a ni? Ngai hpa baw ru hka amu shut kau nga a ni?
19 Nye a madu hkawhkam wa e, ngai tsun na ga madat u. Dai Madu nan ngai hpe nhtang gumlau na hku nang hpe shadut ai rai yang, shi hpe nawng ya ai hkungga a majaw shi a myit hpe galai shai kau shangun nga u ga; rai ti mung masha e dai hpe galaw ai rai yang chyawm gaw dai Madu a dagam dala gaw shanhte a ntsa e hkrat bun nu ga. Dai Madu a lamu ga kaw nna maigan hpara ni hpe chyu sha nawku ai shara de ngai hpe gawt shapraw kau nga myit dai.
20 Dai re ai majaw, dai Madu hte tsan gang nga ai maigan masha ni a lamu ga hta ngai hpe hkum sat kau hkrum shangun nga myit. Israela hkawhkam gaw hpa majaw ngai hpe wa hkalai zawn sa sat kau ang na rai nga a ni? Shi gaw ngai hpe hpa majaw nam na ntsa malen u zawn tam shakut na ang nga a ni?,? ngu nna htan wu ai.
21 Shawlu gaw, ?Ngai shut kau ni ai. Nye kasha Dawi e, bai wa rit! Nang gaw nye a asak hpe dai na e jahkrung da ya nga ndai majaw, ngai nang hpe galoi mung n machyi hkra shangun na ni ai. Ngai mahtang mana ni ai! Ndai zawn re ai hkrit hpa amu hpe ngai galaw shut kau ni ai!,? ngu nna htan wu ai.
22 Shaloi Dawi gaw, ?Madu hkawhkam e, na a nri nang e rai nga ai. Na a masha langai ngai hpe sa la shangun u.
23 Dai Madu gaw kangka ai hte ding hpring ai ni hpe kumhpa jaw ya nga ai. Dai ni shi gaw nang hpe nye a lata hta ap ya ni ai; rai ti mung dai Madu hkawhkam shatai da sai nang hpe chyawm gaw ngai n machyi hkra kau shangun na nngai.
24 Dai ni ngai na a asak jahkrung da ya ni ai zawn dai Madu mung ru tsang yawng kaw na dai hte maren ngai hpe galaw nga u ga law!,? ngu nna tsun htang wu ai.
25 Shawlu gaw Dawi hpe, ?Nye a kasha e, nang hpe Karai Kasang shaman ya nga u ga law! Nang galaw ai lam shagu awng dang nga lit ga law!,? ngu nna tsun wu ai.
Dai rai nna Dawi mung shi a lam de hkawm mat wa nhtawm Shawlu mung shi a nta de nhtang mat wa wu ai.