25
1 Samuela si mat sai rai nna, Israela amyu masha ni yawng zup hpawng nna shi a matu sharung shayawt nga ma ai. Dai hpang shi hpe Rama shara na shi a nta e makoi mayang ma ai.
Dai amu ngut ai hpang, Dawi gaw Paran nam mali de rawt sa mat wa wu ai.
2-3 Hkaleb a lakung lama na Nabala mying ai wa gaw Maon kahtawng na masha langai mi rai nna Hkarmela kahtawng makau e nga ai lamu ga madu da nga ai. Shi gaw grai sut su ai wa rai nna sagu hkying masum, bainam hkying mi madu da ai wa rai nga ai. Shi a madu jan Abigala gaw ahpraw tsawm nna hpaji rawng ti mung, madu wa mahtang n hkru ai hte myit ja ai masha rai nga ai.
Nabala gaw Hkarmela mare e sagu mun rep nga yang,
4 nam mali hkan nga hkawm nga ai Dawi gaw dai shiga na wu ai;
5 dai rai nna, shi gaw Hkarmela mare e nga ai Nabala hpe sa tam na matu mung, shi hpe Dawi a shakram ga sa jaw na matu mung, shabrang marai shi hpe shangun dat wu ai.
6 Shi gaw Nabala hpe ning ngu sa tsun na matu matsun dat wu ai: ?Nye a manang wa e, nang mung, na a dinghku masha ni mung, nang hte seng maseng ni yawng hte mung, Dawi gaw shi a shakram ga ni hte mai kaja htum ai akyu hpyi ga ni hte nang hpang de shakram shana dat wu ai.
7 Nang sagu mun rep nga ndai hpe mung shi na wu ai, na a sagu rem ai ni anhte hte rau nga nga yang, shanhte hpe anhte n sharu shatsang ga ai; shanhte Hkarmela e nga nga ma yang, shanhte a arai hpa mung n madu la ai hte hpa mung n lagu la ma ai lam shi nang hpe chye na shangun mayu nga ai.
8 Shanhte hpe naw san yu u, shanhte nang hpe tsun dan na mara ai. Anhte gaw lusha poi shani e sa saga ai rai nna Dawi mung anhte hpe atsawm sha hkap hkalum la na matu nang hpe san yu nga ai. Dai re ai majaw, chyeju hte na a shangun ma anhte hpe mung, na a jinghku wa Dawi hpe mung, nang dang di lu ai daram mi chyeju hte jaw dat na lam hkang dat mi ai.?
9 Dawi a masha ni mung Dawi a mying gang nna Nabala hpe ndai mungga tsun dan ma ai. Dai hpang shanhte dai yang e ala nga yang,
10 jahtum e Nabala gaw, ?Dawi kun? Shi gaw kadai wa rai nga a ta? Ngai shi a lam galoi mung n na yu nngai! Ndai aten hta mungdan e hprawng hkawm ai mayam ni hpring nga ai!
11 Ngai gaw nye a sagu mun rep ai ni a matu hpajang tawn ai muk, ntsin hte yam nga ashan la nna, kanang na pru wa ai pyi n chye ai ni hpe jau kau na rai nga a ni?,? ngu nna htan wu ai.
12 Dawi a masha ni mung shi hpang de nhtang wa nhtawm Nabala kaning nga tsun ai ga shi hpe wa tsun dan ma ai.
13 Shi gaw, ?Nanhte a nhtu ni hpe hpye da manu!,? ngu nna hkang dat wu ai hte maren, shanhte yawng galaw da ma ai. Dawi mung shi a nhtu hpye la nhtawm shi a masha mali tsa daram hte rau pru mat wa wu ai; lahkawng tsa hte gaw shingdu e arai sin nga ma ai.
14 Nabala a shangun ma langai mi gaw shi a madu jan Abigala hpe, ?Dawi gaw anhte a Madu hpe hkap shachyen na nga, nam mali de na kasa nkau mi hpe shangun dat ai lam nang na nu ni? Rai ti mung shi chyawm gaw shanhte hpe n kaw n law hkap di kau dat wu ai.
15 Kaning mi ngu ti mung, shanhte gaw anhte a ntsa e grai kaja nga ma ai rai nna anhte hpe galoi mung n sharu shatsang nga ma ai; shanhte hte anhte pa hkan e rau nga hkawm ai aten hte ting hta rai ti mung anhte madu da ai arai lama mi mung n lagu la hkrum yu ga ai.
16 Anhte a sagu ni hpe rem let shanhte hte anhte rau nga ai aten hte ting, shani shana anhte hpe makawp maga la mi ai.
17 Chyeju hte ndai lam hpe myit yu nna kaning rai galaw na lam daw dan hparan ya mi. Ndai amu gaw anhte a madu hte shi a dinghku masha ni yawng a matu tsin-yam tsindam shapraw ya lu nga ai. Shi mahtang grai n hkru ai wa rai nna kadai tsun ai ga hpe mung n kaw madat ya nga ai!,? ngu nna tsun wu ai.
18 Abigala gaw muk tawng lahkawng tsa, sabyi ntsin shanhpyi tau lahkawng hpring hpring, kakang da sai sagu manga, mam npaw dang lahkawng, sabyi si jahkraw sumbaw latsa, lakum si jahkraw hte galaw da ai muk lahkawng tsa, ni hpe alawan lahkawn shinggyin la nhtawm lawze ni hta htaw ma ai.
19 Dai hpang, shi gaw shangun ma ni hpe, ?Nanhte sa wa magang mu, ngai gaw nanhte a hpang e hkan nang na nngai,? ngu nna tsun wu ai. Rai ti mung, shi a madu wa Nabala hpe chyawm gaw hpa mung n tsun da wu ai.
20 Shi lawze jawn nna sa wa nga yang, kawng nhkrem langai a hpunggaw langai e Dawi hte shi a masha ni shi kaw sa wa nga ai ni hte akajawng sha sa hkrum wu ai.
21 Dawi gaw, ?Ndai nam mali e, ndai manang wa a sut gan hpe ngai hpa majaw makawp maga ya kau ni ai kun? Shi madu da ai arai lama mi hpe mung lagu la kau ya nga ga ai n rai. Dai gaw ngai shi hpe jaw ai karum la ai lam a majaw shi ngai hpe bai htang ai she rai nu hka!
22 Jahpawt de garai n du rau yang, ndai masha ni hpe ngai n sat kau ai sha ngam da hkrup ai rai yang, Karai Kasang mahtang ngai hpe adup nu ga,? ngu nna myit sumru yu wu ai.
23 Abigala gaw Dawi hpe mu ai shaloi, lawze kaw na tin tin yu nhtawm Dawi a lagaw nhpang e dingnyawm dagup ai hte
24 shi hpe, ?Madu e, chyeju hte ngai tsun ai ga madat ya e! Mara shagun hkam na ni ai.
25 Chyeju hte Nabala hpe hpa mung hkum sawn la ya e; shi gaw hpa n hkaw ai wa rai nga ai! Shi gaw shi a mying hte shabung nna angawk b 25:25: Angawk ai: Dai angawk ai ngu ai ga hpe Hebre ga hku Nabala ngu nna tsun ai. ai wa she rai nga ai! Madu e, na a shangun ma ni du ai aten hta ngai dai yang e n nga nga nngai.
26 Na a gumlau hpyen ni hpe sat na hte matai htang mayu nga ai kaw na, dai Madu nang hpe hkum da nga nit dai majaw, na a gumlau hpyen ni hte nang hpe machyi shangun mayu ai ni yawng gaw Nabala zawn ari jaw ai hkrum nga mu ga, ngu nna ahkrung nga ai dai Madu hta ngai dagam da nga nngai.
27 Madu e, chyeju hte na a matu ngai la sa ya ai ndai kumhpa ni hpe hkap la ya e; ndai ni na a masha ni hpe jaw u.
28 Madu e, chyeju hte ngai galaw shut kau sai mara ni hpe raw dat ya e law. Nang chyawm gaw nang hkrung nga ai hte yang, n hkru ai amu hpa mung n galaw nga ndai hte shi a majan ni hpe nang gasat ya nga ndai majaw dai Madu gaw nang hpe mung, na a matu mara ni hpe mung hkawhkam shatai na ra ai.
29 Nang hpe htim gasat ai hte sat kau na matu shakut ai wa nga dam ti mung, masha gaw manu dan ai sut rai hpe makawp da ai zawn dai Madu na a Karai Kasang mung nang hpe shim hkra makawp da na ra ai. Na a gumlau hpyen ni hpe chyawm gaw, masha wa e shi a lahpaw hte nlung shinggyin ni hte gap kau ai zawn shi shanhte hpe kabai kau na ra ai.
30 Dai Madu gaw nang hpe ga sadi tawn da nu ai hte maren, mai kaja ai amu yawng mayawng hpe galaw da ngut jang, nang hpe Israela hkawhkam shatai na ra ai rai nna,
31 mara kata e masha sat kau hkrup ai majaw mung, tinang myit machyu nna matai dawp kau ai majaw mung, lahpawt dum ai myit hte myit malai lu ai lam, nye madu hta hkam sha ai lam n nga u ga law. Dai Madu nang hpe shaman ya nit dai shaloi, Madu e, chyeju hte ngai hpe mung hkum malap kau nga e law,? ngu nna tsun wu ai.
32 Dawi gaw shi hpe, ?Dai ni ngai hte hkrum na matu nang hpe shangun dat ya ai dai Madu Israela a Karai Kasang hpe shakawn kungdawn nga ga law.
33 Na a mai kaja ai machye machyang hpaji a majaw mung, masha sat amu hte nye a myit machyu nna matai n dawp na matu ngai hpe sa hkum ai amu ndai hpe dai ni nang galaw nit dai majaw mung Karai Kasang gaw nang hpe chyeju jaw ya nga u ga law.
34 Dai Madu gaw nang hpe sharu shatsang na kaw na ngai hpe hkum kau nu ai. Rai ti mung, nang ngai kaw tin tin n sa hkrum ai rai taw gaw, jahpawt e pyi, Nabala a masha ni yawng sat shamyit kau hkrum ma na masai, ngu Israela a ahkrung nga ai Karai Kasang hta ngai dagam nga nngai!,? ngu nna tsun wu ai.
35 Dai hpang, Dawi gaw shi a matu la sa ya ai kumhpa ni hpe hkap la nhtawm, ?Nta de nhtang wa su; hpa mung hkum myit tsang nga sa. Nang ra ai lam ngai galaw ya na de ai,? ngu nna tsun wu ai.
36 Abigala mung hkawhkam wa a matu lusha poi galaw ai zawn shi a nta e poi galaw nga ai Nabala hpang de nhtang wa wu ai. Shi gaw chyaru nang nna grai pyaw nga ai majaw, hpang jahpawt du hkra hpa n tsun ai sha nga nga wu ai.
37 Dai hpang, shi chyaru bran wa ai shaloi, Abigala gaw shi hpe lam magup tsun dan wu ai. Shaloi shi salum kahprap wa nna tsep kawp hkum katsing si mat wu ai.
38 Dai hpang shi ya dang na jang, dai Madu gaw Nabala hpe sat kau ai hte shi si mat sai.
39 Nabala si mat sai shiga hpe Dawi na ai shaloi, shi gaw, ?Dai Madu hpe shakawn mu! Shi gaw ngai hpe n kaw n law di ai Nabala hpe matai dawp nu ai hte shut hpyit amu galaw shapraw na shi a shangun ma ngai hpe mung hkum kau nu ai. Dai Madu gaw shi galaw ai n hkru ai amu a majaw Nabala hpe ari jaw kau nu ai,? ngu nna tsun wu ai.
Dai hpang, Dawi gaw Abigala hpe hkungran la na matu kasa langai shangun dat wu ai.
40 Shi a shangun ma ni mung Hkarmela mare e nga ai Abigala hpang de sa nhtawm shi hpe, ?Dawi gaw shi a madu jan tai na matu, nang hpe la na nga nna, anhte hpe shangun dat mi ai,? ngu nna tsun ma ai.
41 Abigala gaw ga de dingnyawm dagup nhtawm, ?Ngai gaw nye a madu a shangun ma ni a lagaw kashin na daram sha re ai shangun ma langai mi she rai nga nngai,? ngu nna tsun wu ai.
42 Shi gaw tin tin rawt nna shi a lawze hta jawn let shi a mayam num manga mung hkan nang nhtawm Dawi a shangun ma ni hte rau hkan wa nna Dawi a madu jan tai nga ai.
43 Dawi gaw Yezrela mare na Ahinoam hpe mung hkungran la nu ai rai nna Abigala mung shi a madu jan tai nga nu ai.
44 Dai aten hta Shawlu chyawm gaw Dawi a madu jan tai yu sai shi a shayi sha Mihkala hpe Galim mare na Laisha a kasha Palati hpe jaw sha kau wu ai.