23
1 Dawi gaw Hpilisti masha ni Kila mare hpe sa htim gasat nhtawm dan mahkawng da sai nsi naisi nnan lagu la kau ya ai shiga na wu ai.
2 Dai rai nna, shi gaw dai Madu hpe, ?Hpilisti masha ni hpe ngai sa gasat na kun?,? ngu nna san wu ai.
Dai Madu mung, ?Rai sa, shanhte hpe sa gasat nhtawm Kila masha ni hpe hkye la su,? ngu nna htan wu ai.
3 Rai ti mung, Dawi a masha ni chyawm gaw shi hpe, ?Ndai Yuda mung hta pyi hkrit nga ga yang, Kila mare de anhte sa nna Hpilisti masha ni a n-gun hpe daw kau ya ga, ngu ai lam gaw grau nna sawng mat wa na baw sha rai nga ai!,? ngu nna tsun dan mu ai.
4 Dai re ai majaw, dai Madu hpe Dawi lang mi bai san yu wu ai rai nna, dai Madu gaw shi hpe, ?Hpilisti masha ni hpe gasat dang lu ai awng padang ngai nang hpe jaw ya na de ai majaw Kila mare hpe sa htim gasat u,? ngu nna tsun wu ai.
5 Dai rai nna Dawi hte shi a masha ni Kila mare de sa nhtawm Hpilisti masha ni hpe gasat kau ma ai rai nna shanhte law law hte hpe sat kau nhtawm shanhte a yam nga ni hpe la mat wa ya ma ai. Ndai zawn rai nna Dawi gaw dai mare hpe hkye la wu ai.
6 Ahimelek a kasha Abiahta mahtang hprawng lawt mat wa nhtawm Kila mare e nga ai Dawi hte matut mahkai lu ai shaloi shi hte rau hpa hkai lawng hpe mung la sa wa wu ai.
7 Kila mare de Dawi sa mat wa sai lam Shawlu hpe tsun dan mu ai shaloi, shi gaw, ?Bunghku kum nna htinggrang hte chyip rai nga ai mare chyinghka ni rawng ai mare kata de sa shang rawng nga let shi hkum shi mahkam hkam la nu ai gaw, Karai Kasang shi hpe nye a lata hta ap ya ai lam rai nga ai,? ngu nna tsun wu ai.
8 Dai rai nna, Shawlu gaw Kila mare de hpyen rawt nna Dawi hte shi a masha ni hpe wang tawn na nga, shi a hpyen ma ni hpe shaga dat wu ai.
9 Shawlu gaw shi hpe htim gasat na lam maw mawn nga ai hpe Dawi na ai shaloi, shi gaw hkinjawng Abiahta hpe, ?Nang de hpa hkai lawng la wa rit,? ngu nna tsun wu ai.
10 Dai hpang, Dawi gaw, ?Madu Israela a Karai Kasang e, na a shangun ma rai nga ai nye a majaw, Shawlu gaw Kila mare de hpyen rawt nna sa hpya kau na matu maw nga ai lam ngai na se ai.
11 Kila masha ni ngai hpe Shawlu a lata de ap kau na rai ma ni? Ngai na da sai hte maren, Shawlu teng teng sa na rai wu ni? Madu Israela a Karai Kasang e, ngai hpe mahtai jaw na, ngai nang kaw akroi anoi hpyi nga nngai!,? ngu nna tsun wu ai.
Dai Madu gaw, ?Shawlu sa na ra ai,? ngu nna htan wu ai.
12 Dawi gaw kalang mi bai, ?Kila mare masha ni nye a masha ni hte ngai hpe Shawlu a lata de ap ya na rai ma ni?,? ngu nna san wu ai.
Shaloi dai Madu gaw, ?Shanhte ap kau na mara ai,? ngu nna htan wu ai.
13 Dai rai nna Dawi hte shi a masha kru tsa dang ngu na yawng hte gaw Kila mare kaw nna kalang lata pru mat wa nhtawm rawt hkawm mat wa ma ai. Shawlu gaw Kila mare kaw na Dawi hprawng lawt mat wa sai shiga na ai shaloi, shi shatawng shada ai amu hpe jahkring kau wu ai.
14 Dawi chyawm gaw Zihpa makau na nam mali e nga ai bum ga hkan makoi hkawm nga wu ai. Shawlu gaw shi hpe tut e tam shakut ti mung, Karai Kasang gaw Dawi hpe shi a lata de n ap kau wu ai.
15 Dawi gaw shi hpe sat na nga Shawlu pru hkawm nga ai hpe mu wu ai.
Dawi mahtang Zihpa makau na nam mali e nga ai Horesha e nga nga wu ai.
16 Yonahtan mung dai yang e nga ai Dawi hpang de sa nhtawm Karai Kasang a makawp maga ai chyeju teng teng hkam la lu na lam, shi hpe n-gun jaw let,
17 shi hpe, ?Hkum hkrit nga et. Nye a kawa Shawlu nang hpe machyi shangun lu na n rai wu ai. Nang gaw Israela a hkawhkam tai wa na lam hpe mung, ngai mung na a lawu na aya hpe hkam la lu na lam hpe mung, shi atsawm sha chye da nga ai.?
18 Shan lahkawng gaw shada jinghku atai nga na matu chyoi pra ai ga sadi tawn da ma ai. Dawi gaw Horesha e nga nga nna, Yonahtan mung nta de wa mat wa wu ai. Ref 23:18: 1Sa 18:3.
19 Zihpa mare masha nkau mi gaw Gibea mare e nga ai Shawlu hpang de sa nhtawm, ?Ya Dawi gaw Yuda nam mali a dingda maga de nga ai Hahkila bum ntsa na, anhte mung ga rai nga ai Horesha shara e makoi nga wu ai. Ref 23:19: Shk 54 Ga Baw.
20 Hkawhkam wa e, nang shi hpe rim la mayu nga ndai gaw anhte chye ga ai rai nna, anhte a mung ga de yu sa rit; nang shi hpe hkrak lu rim la lu na ndai hpe anhte teng teng kam nga ga ai,? ngu nna tsun ma ai.
21 Shawlu gaw, ?Nanhte ngai hpe matsan dum manit dai majaw, dai Madu gaw nanhte hpe shaman ya nga u ga law!
22 Ya kalang mi atsawm sha naw wa sagawn masu; shi gara shara hta hkrak nga ai hpe mung, dai yang e shi hpe kadai mu ai lam hpe mung, tam sagawn yu mu. Shi zai ladat hpaji grai rawng nga ai hpe ngai na nngai.
23 Dai re ai majaw, shi makoi nga ai shara ni hpe tup hkrak sagawn la lu jang mahtang, ngai kaw ading tawk shiga bai wa jaw mi. Shaloi ngai nanhte hte rau pru sa wa nna, dai ginwang hkan shi naw nga ai rai yang, Yuda mung ting ngai hkan sawk nna shi hpe hkan shachyut tam la na nngai,? ngu nna tsun wu ai.
24 Shanhte rawt nna Shawlu a shawng e Zihpa mare de nhtang mat wa ma ai; Dawi hte shi a masha ni chyawm gaw Yuda nam mali a dingda maga na akrin akraw re ai kadit hta nga ai Maon nam mali hkan e nga nga ma ai.
25 Shawlu hte shi a masha ni Dawi hpe tam na nga, rawt sa wa ma ti mung, shing rai hkawm sa wa ai lam hpe shi na jang, Maon nam mali e nga ai lunghkrung kawng langai mi de sa mat wa nhtawm dai yang e nga nga ai. Dai shiga hpe Shawlu na jang, Dawi a hpang de shi hkan tam mat wa wu ai.
26 Shawlu hte shi a masha ni gaw Dawi hte shi a masha ni hte lam n hkrum ai sha kawng a maga mi de, Dawi hte shi a masha ni mung maga mi de rai nga nga ma ai. Shanhte gaw Shawlu hte shi a masha ni shanhte hpe lu rim la hkra nga, ani sha kahtep sa wa ai Shawlu hte shi a masha ni a lata kaw na tin tin hprawng shaja nga ma ai.
27 Dai shaloi kasa langai mi du nna Shawlu hpe, ?Ya jang nhtang wa rit! Hpilisti masha ni anhte a mungdan de gasat shang wa mara ai!,? ngu nna sa tsun wu ai.
28 Dai re ai majaw, Shawlu gaw Dawi hpe shachyut hkawm nga ai kaw na jahkring kau nhtawm Hpilisti masha ni hpe gasat na matu rawt sa mat wa ai. Dai rai nna, shara dai hpe Jahka Kau Ai Kawng ngu nna shamying ma ai.
29 Dawi mung dai kaw nna pru wa nhtawm Engedi ginwang de sa wa nna sa makoi nga wu ai.