22
1 Dawi gaw Gat mare kaw nna hprawng mat wa nhtawm Adulam mare makau na lungpu hku langai mi de sa mat wa wu ai. Shi a kahpu ni hte ngam nga ai nta masha ni dai yang e shi nga nga ai hpe na mu yang, shanhte shi hpe sa matut mahkai la ma ai. Ref 22:1: Shk 57 Ga Baw; Shk 142 Ga Baw.
2 Dip gamyet sha hkrum nga ai ni, hka kap ai ni hte myit karen ai masha ni shi kaw sa ma ai rai nna, masha yawng mali tsa daram rai nga ai; shi mung shanhte a ningbaw tai wa sai.
3 Dawi gaw dai kaw nna Moba mung Mizpa mare de sa wa nhtawm Moba hkawhkam wa hpe, ?Karai Kasang ngai hpe hpa galaw shangun na lam hpe ngai mu tam ai aten du hkra nye nu yan wa hpe nang kaw nga shangun na matu, chyeju hte ahkang jaw e,? ngu nna tsun wu ai.
4 Dawi gaw shi kanu yan kawa hpe Moba hkawhkam a lata hta ap kau da nhtawm lungpu hku e Dawi makoi nga dingsa, dai yang e shan mung nga nga ma ai.
5 Dai hpang, myihtoi Gad gaw Dawi kaw sa nhtawm, ?Ndai yang e hkum nga nga sa; Yuda mung de she kalang lata sa wa su,? ngu nna tsun wu ai. Dai rai nna, Dawi mung pru mat wa nhtawm Heret nam maling de sa mat wa wu ai.
6 Lani mi na aten hta Shawlu gaw Gibea mare na kawng e tu ai ubyap hpun npu e, shi a lata hta nri lang da nhtawm dung nga wu ai; shi a du salang ni yawng mung shi a grup yin e tsap nga ma ai; shaloi Dawi hte shi a masha ni hpe mu tam tawn da sai lam tsun shana dan ma ai;
7 dai rai nna, shi gaw shi a du salang ni hpe, ?Benyamin masha ni e, madat mu! Dawi gaw nanhte yawng hpe yi sun hkauna hte sabyi sun ni jaw ya lu na re ngu, myit nawn da mu ni? Shi a hpyen dap hta du aya jaw lu na zawn nawn da mu ni?
8 Dai lam a majaw nanhte ngai hpe gumlau na maw mawn nga myit ni? Nye kasha nan Dawi hte jinghku galaw da masai mung, nanhte hta na kadai mung n tsun dan yu myit dai. Nye a matu langai mi mung myit n hkan tsang nang myit dai; nye kasha nan shi hpe n-gun jaw nhtawm ngai hpe sat kau na matu ndai aten hta ahkaw ahkang la mayu nga ai dai nye a masha hta na Dawi a lam, ngai hpe n tsun dan myit dai!,? ngu nna tsun wu ai.
9 Dai yang e Shawlu a du salang ni hte rau tsap nga ai Doeg gaw shi hpe, ?Dawi gaw Noba mare e nga ai Ahitub a kasha Ahimelek kaw sa ai hpe ngai mu nngai. Ref 22:9-10: 1Sa 21:7-9; Shk 52 Ga Baw.
10 Ahimelek mung Dawi hpa galaw ang ai hpe dai Madu kaw san ya nhtawm lusha nkau mi hpe mung, Hpilisti masha Goliat a nhtu hpe mung, Dawi a lata de ap ya dat nu ai,? ngu nna tsun wu ai.
11 Dai rai nna, Hkawhkam Shawlu gaw hkinjawng Ahimelek hpe mung, shi a jinghku ni yawng hpe mung, Noba mare na hkinjawng ni hpe mung shaga dat wu ai rai nna, shanhte mung shi kaw du sa ma ai.
12 Shawlu mung Ahimelek hpe, ?Ahimelek e, madat u!,? ngu nna tsun wu ai.
Shi mung, ?Madu e, madat na matu jin jin rai nga nngai,? ngu nna htan wu ai.
13 Shawlu gaw shi hpe, ?Nang hte Dawi hpa majaw ngai hpe gumlau na maw mawn myit ni? Nang gaw shi a matu Karai Kasang kaw hpa majaw san ya nhtawm lusha nkau mi hte nhtu langai mi jaw kau dat ya n ni? Ya chyawm gaw shi ngai hpe nhtang gumlau kau ni ai hte ngai hpe sat kau lu na ahkaw ahkang ginjang tam let ala nga ai!,? ngu nna tsun wu ai.
14 Ahimelek mung, ?Na a masha ni hta Dawi gaw sadi dung htum ai du rai nga ai! Shi gaw na a kahkri rai nna, nang hpe makawp maga ya ai du wa rai nga ai; shi gaw hkawhkam hkaw hta mung masha shagu a shagrau hkungga kaba hkam la hkrum ai wa rai nga ai.
15 Rai sa, shi a matu Karai Kasang kaw ngai san ai gaw ndai lang, shawng na lang sha n rai sai. Nang hpe gumlau na maw mawn ai lam hte seng nna, nang hkawhkam wa rai ti mung, ngai hpe mung, nye a dinghku masha kadai hpe mung mara shagun lu na ndai n rai. Ndai lam hte seng ai hpa lam hpe mung ngai n chye nngai!,? ngu nna htan wu ai.
16 Hkawhkam wa gaw, ?Ahimelek e, nang hte na a jinghku ni yawng si lu na rai myit dai,? ngu nna tsun wu ai.
17 Dai hpang shi gaw shi a makau e tsap nga ai sin langa ni hpe, ?Dai Madu a hkinjawng ni hpe sat kau mu! Shanhte gaw Dawi hte bungli mayun galaw ai lam yawng mayawng hpe shanhte chye nga ma ai lam hpe mung, shi hprawng mat wa ai lam hpe mung, chye nga ninglen n tsun dan ma ai,? ngu nna tsun wu ai. Rai ti mung, sin langa ni chyawm gaw dai Madu a hkinjawng ni hpe sat kau na matu lata n sharawt hkraw ma ai.
18 Dai rai nna Shawlu gaw Doeg hpe, ?Shanhte hpe sat kau u,? ngu nna tsun dat wu yang, Doeg mung shanhte yawng hpe sat kau wu ai. Dai shani e, atsam rawng nna hpa hkai lawng hpun ai hkinjawng matsat shi manga hpe sat kau wu ai.
19 Shawlu gaw Noba mare e shanu ai masha ni hpe mung, mare na hkinjawng ni hpe mung, numsha lasha, ma kaji ni hte chyu chyu ai ma ni, dumsu lawze hte sagu ni yawng hpe sat kau na matu hkang dat wu ai hte maren, dai ni yawng sat kau ai hkrum nga ma ai.
20 Rai ti mung, Ahimelek a kasha langai rai nga ai Abiahta mahtang hprawng lawt mat wa nhtawm, Dawi kaw sa let shi hte matut mahkai mat wu ai.
21 Shi gaw dai Madu a hkinjawng ni hpe Shawlu e kaning rai htau sat kau nu ai lam, shi hpe tsun dan wu ai.
22 Dawi gaw shi hpe, ?Dai yang e ngai Doeg hpe mu ai shani jang, Shawlu hpe shi teng teng tsun dan na rai wu ai gaw ngai chye da ni ai. Dai rai nna na a jinghku ni yawng a si hkrung si htan mara hpe ngai bai htang na we ai.
23 Ngai hte rau nga ga, hkum hkrit et. Shawlu gaw nang hte ngai hpe sat kau mayu wu timung, nang chyawm gaw ngai hte rau shim nga lu na rai ndai,? ngu nna tsun wu ai.