19
1 Shawlu gaw Dawi hpe sat kau na matu shi maw mawn da sai lam, shi a kasha Yonahtan hte shi a du salang ni yawng hpe tsun dan wu ai. Rai ti mung Yonahtan mahtang Dawi hpe grai tsaw ra nga ai rai nna,
2 shi gaw Dawi hpe, ?Nye wa gaw nang hpe sat na maw nga ai; dai rai nna chyeju hte hpawt de du hkra sadi maja let nga nga u; shim ai shara hta makoi nga u.
3 Ngai gaw nang makoi nga ai pa hta nye wa a makau e sa tsap nhtawm na a lam ngai shi hpe tsun dan na we ai, shaloi ngai chye machye nang hpe bai chye shangun na we ai,? ngu nna tsun wu ai.
4 Yonahtan gaw Dawi hpe shakawn let Shawlu hpe, ?Madu e, na a shangun ma Dawi hpe n galaw shut kau u ga law. Shi nang hpe galoi mung n galaw shut kau yu wu ai; shing re ai nhtan shai ai amu galaw na malai, shi galaw nu ai lam magup chyawm gaw nang hpe karum la ai lam kaba nga wu ai.
5 Shi gaw asak dan nna Goliat hpe sat kau nu ai majaw sha, Israela a matu awng padang kaba dai Madu jaw ya mani ai. Dai lam hpe nang mu nit dai shaloi kabu gara nga ndai. Dai rai yang, ndai hpa mara mung n shut, hpa mara mung n kap re ai Dawi hpe mara kata e hpa majaw shi hpe sat kau mayu nga n ni?,? ngu nna tsun wu ai.
6 Yonahtan tsun ai ga a majaw Shawlu myit hkawn wa nhtawm, Dawi si lu na wu ai n rai, ngu nna dai Madu a mying ningsang hta dagam shaka da wu ai.
7 Dai rai nna Yonahtan gaw Dawi hpe shaga la nhtawm dai lam mahkra shi hpe tsun dan wu ai; shaloi Yonahtan mung Dawi hpe Shawlu hpang de woi wa nna, shawng na zawn hkawhkam wa hpe daw jau nga wu ai.
8 Hpilisti masha ni hte majan byin wa ai rai nna, Dawi gaw shanhte hpe htim gasat nhtawm tsep kawp dang kau wu ai hte shanhte mung hprawng htaw mat wa ma ai.
9 Lani mi na aten hta, dai Madu kaw na n hkru ai wenyi gaw Shawlu hpe sa hkang nga ai. Shawlu gaw shi a lata e nri lang let shi a hkaw e dung nga yang, Dawi mung dai yang nga let tingse dum shapyaw ya wu ai.
10 Shing rai nga yang, shi a nri hte Dawi hpe shakum hta shatai let jinghkyen dat wu ai; rai ti mung Dawi yen kau wu ai majaw nri dai shakum hta jung mat ai. Dai rai nna Dawi mung kagat ai hte hprawng lawt mat wa wu ai.
11 Dai shana jang, Shawlu gaw shi a masha nkau mi, Dawi a nta hpe sin yu da shangun nna hpang jahpawt e shi hpe sat kau na matu shangun dat wu ai. Dawi a madu jan Mihkala chyawm gaw shi hpe, ?Nang dai na e n hprawng pru mat wa ai rai yang, si na rin dai,? ngu nna sadi jaw wu ai. Ref 19:11: Shk 59 Ga Baw.
12 Mihkala gaw shi hpe hkuwawt hku shayu kau dat wu ai rai nna hprawng lawt mat wa wu ai.
13 Dai hpang, shi gaw nta e naw ai hpara sumla la nhtawm yup ku hta galeng tawn nna bainam mun hte da ai bunghkum langai de a nhtung de tawn da let nba jahpun da wu ai.
14 Dawi hpe rim la na matu Shawlu a masha ni du ai shaloi, Dawi machyi nga ai ngu nna Mihkala shanhte hpe tsun wu ai.
15 Rai ti mung, Shawlu gaw Dawi hpe bai sa yu na masha shangun dat nhtawm shi shanhte hpe, ?Shi a yup ku hte hpawn ndai yang e hpai wa marit, ngai shi hpe sat kau na we ai,? ngu nna hkang dat wu ai.
16 Shanhte gaw kata de shang yu mu yang yup ku ntsa e nta e naw ai hpara sumla taw nga ai hpe mung, nhtung maga de bainam mun hte da ai bunghkum tawn da ai hpe mung sa mu nga ma ai.
17 Shawlu gaw Mihkala hpe, ?Nang ngai hpe ndai zawn hpa majaw masu hkalem nna nye a gumlau hpyen wa hpe shalawt kau dat n ni?,? ngu nna san wu ai.
Shi gaw, ?Ngai shi hpe lawt mat wa hkra n karum kau dat ai rai yang, shi ngai hpe sat na nga nna tsun ai,? ngu nna htan wu ai.
18 Dawi gaw hprawng lawt mat wa nhtawm Rama e nga ai Samuela kaw du sa let Shawlu shi hpe kaning rai galaw ai lam magup tsun dan wu ai. Dai hpang, shi hte Samuela gaw Nayut de sa mat wa nhtawm dai yang e sa nga nga ma ai.
19 Dawi gaw Rama ginwang Nayut mare e nga nga ai lam Shawlu na wu ai rai nna,
20 shi hpe sa rim la na matu masha nkau mi dat dat wu ai. Shanhte gaw Samuela woi awn let ka let jahtau garu nga ai myihtoi hpung ni hpe sa mu ma ai. Shaloi Karai Kasang a wenyi gaw Shawlu a masha ni hpe up hkang ai rai nna ka let jahtau garu hpang wa ma ai.
21 Shawlu dai lam na ai shaloi, kasa ni hpe jat nna shangun dat wu ai, shanhte mung ka let jahtau garu hpang wa ma ai. Masum lang ngu na kasa ni hpe bai shangun dat wu yang, shanhte hta mung dai zawn sha a byin nga ma ai.
22 Dai hpang, shi hkum nan Rama de rawt sa wa wu ai. Shi gaw Sehku shara na hka htung kaba de du ai shaloi, Samuela hte Dawi kanang nga ma ai lam san yu wu yang, Nayut shara e nga nga ma ai lam hkap tsun dan ma ai.
23 Shi gaw dai shara de sa wa wu yang, dai Madu a wenyi gaw shi hpe up hkang nga ai rai nna, Nayut shara de sa ai lam dingyang ka let jahtau garu nna sa wa wu ai.
24 Shi gaw shi a bu hpun palawng ni hpe raw kau nhtawm Samuela a man e ka let jahtau garu wu ai; dai shani tup, dai shana tup, hpun palawng n kap ai sha taw nga ai. (Dai re ai majaw, ?Shawlu mung myihtoi tai yu sani?,? nga nna npawt gawn tsun shalai ma ai.) Ref 19:24: 1Sa 10:11-12.