18
1 Shawlu hte ga tsun ngut ai hpang, Shawlu a kasha Yonahtan gaw Dawi hpe grai myit yu kap mat ai rai nna, shi hkum hte maren tsaw ra wu ai.
2 Shawlu mung dai shani kaw nna Dawi hpe hkap shingdang la nhtawm dum nta de wa na ahkang shi hpe n jaw ya sanu ai.
3 Yonahtan gaw Dawi hpe grai tsaw ra wu ai majaw shi hte htani htana myit hkrum manang tai nga u ga nga, dagam da wu ai.
4 Yonahtan mung shi hpun nga ai palawng galu raw la nhtawm dai hte hpawn shi hpun ai ninggang palawng, nhtu, ndan hte shingkyit Dawi hpe jaw wu ai.
5 Dawi mung Shawlu shi hpe shangun ai lam shagu hta awng dang nga ai majaw Shawlu a hpyen dap hta shi hpe hpyen du shatai da nga ai. Dai lam a majaw Shawlu a du salang ni yawng hte shi a masha ni yu ra sharawng nga ma ai.
6 Dawi gaw Goliat hpe sat kau ngut ai hpang, hpyenla ni dum nta de nhtang wa ma yang, Israela mare shagu hkan na numsha ni Shawlu hkawhkam hpe sa tau la na nga pru sa wa ma ai. Shanhte gaw kabu gara ai myit hte mahkawn mangoi let shup sheng hte tingse dum nga ma ai.
7 Numsha ni gaw shanhte hpe shagrau sha-a ai poi hta, ?Shawlu sat kau sai gaw hkying hkying, Dawi sat kau sai gaw mun mun,? ngu nna mahkawn ma ai. Ref 18:7: 1Sa 21:11; 29:5.
8 Shawlu gaw dai mahkawn ga hpe n na sharawng wu ai majaw grai pawt sindawng nga wu ai. Shi gaw, ?Dawi a matu mun mun, nye a matu hkying hkying sha mi tsun nna mahkawn ai gaw, shanhte shi hpe hpang na hkawhkam galaw shangun na matu rai nga ai!,? ngu nna tsun wu ai.
9 Dai shani kaw nna Dawi hpe yu manawn shatsang ai hte n rup mat wu ai.
10 Hpang shani e, Karai Kasang kaw na n hkru ai wenyi gaw Shawlu hpe akajawng sha sa hkang dat nga ai rai nna, mana langai mi zawn shi a hkaw kata e ndum ndam rai abrawp rawng taw nga ai. Dawi gaw shani shagu shi galaw nga ai hte maren tingse sumpyi dum nga yang, Shawlu gaw nri langai mi lang da nhtawm,
11 ?Ngai shi hpe shakum e jinghkyen shakap kau we ga,? ngu nna shi a kraw e tsun let, Dawi hpe lahkawng lang nri jinghkyen bun wu ai; rai ti mung lang shagu yen kau kau di wu ai.
12 Shawlu hpe kau tawn da sai dai Madu gaw Dawi hte rau nga nga ai majaw Shawlu shi hpe hkrit wu ai.
13 Dai rai nna, Shawlu gaw shi hpe jahka kau nhtawm masha hkying mi hpe sha up ai du shatai da wu ai. Dawi mung shi a masha ni hpe majan pa de woi sa ti mung,
14 dai Madu shi hte rau nga nga ai majaw shi galaw ai amu yawng mayawng awng dang nga ai.
15 Shawlu gaw Dawi galaw ai amu awng dang nga ai hpe chye jang, shi hpe grau nna pyi hkrit nga ai.
16 Rai ti mung, Dawi gaw awng dang ai ningbaw rai nga ai majaw Israela amyu ting hte Yuda amyu ni, shi hpe tsaw ra nga ma ai.
17 Shawlu gaw Dawi hpe, ?Nang e nye a shayi sha kaba Merab nga nga ai. Nang gaw nye a matu magrau grang ai hte sadi dung let dai Madu a majan ni hta shang gasat ai rai yang, ngai gaw shi hpe na a madu jan shatai na matu jaw ya na de ai,? ngu nna tsun wu ai. (Shawlu chyawm gaw ndai hku nna shi hkum nan n hkra ai sha, Hpilisti masha ni Dawi hpe sat kau mu ga, nga nna myit ai lam rai nga wu ai.)
18 Dawi gaw, ?Ngai zawn re ai wa hte nye a dinghku wa me, hkawhkam wa a kahkri tai ang na rai nga a ni?,? ngu nna htan wu ai.
19 Rai ti mung, Merab hpe Dawi kaw ya sha na aten du jang, Meholahti kaw na Adriela hpe mahtang ya sha kau wu ai.
20 Shawlu a shayi sha Mihkala chyawm gaw Dawi hpe tsaw ra da wu ai; dai lam hpe Shawlu na jang kabu nga ai.
21 Shi gaw, ?Mihkala hpe Dawi kaw ya sha na nngai; Dawi hpe mahkam hkam la na matu shayi sha hpe akyu jashawn na we ai. Shaloi shi gaw Hpilisti masha ni a lata hta sat kau ai hkrum na ra ai,? ngu nna shi kraw e myit da wu ai. Shawlu gaw Dawi hpe, ?Nang gaw nye a kahkri tai na rai ndai,? ngu nna lahkawng lang ngu na tsun wu ai.
22 Shi gaw shi a du salang ni hpe Dawi hpe ning ngu kahte tsun na matu hkang da wu ai: ?Hkawhkam wa nang hpe ra sharawng nga ai hte shi a du salang ni yawng mung shi hpe yu ra nga ma ai; nang shi a shayi sha hpe hkungran la na gaw, ya nan na a matu mai kaja ai aten rai nga lit dai.
23 Dai re ai majaw, ndai lam Dawi hpe shanhte tsun dan yang, shi gaw, ?Hkawhkam wa a kahkri tai nna hkik hkam ai shagrau sha-a lam hpe hkam la na gaw ngai zawn re ai ahkyak n re ai hte matsan mayan re ai wa a matu nau wa kaba la ai amu rai nga ai,? ngu nna htan wu ai.
24 Dai du salang ni mung Dawi tsun ai ga, Shawlu hpe tsun dan mu ai rai nna,
25 Shawlu gaw Dawi hpe ning ngu tsun na matu shanhte hpe hkang dat wu ai: ?Hkawhkam wa nang kaw na ra sharawng ai lam yawng gaw shi a gumlau hpyen ni hpe matai htang la lu hkra, si mat sai Hpilisti masha ni a hpyi matu latsa hpu ja bang ai hku sawn la ya na ra ai da.? (Ndai mung Hpilisti masha ni a lata hta Dawi sat kau ai hkrum u ga, ngu Shawlu maw mawn ai lam rai nga ai.)
26 Shawlu a du salang ni gaw Shawlu hkang da sai lam, Dawi hpe tang madun ma yang, hkawhkam wa a kahkri tai wa na hpe myit yu let kabu sharawng nga wu ai. Ya hkungran poi galaw na nhtoi garai n du yang,
27 Dawi hte shi a masha ni pru sa nhtawm Hpilisti masha lahkawng tsa hpe sat kau ma ai. Shi gaw shanhte a hpyi matu ni hpe hkawhkam wa hpang de la wa nhtawm dai ni yawng hpe shi a man e hti yu wu ai rai nna, hkawhkam wa a kahkri tai wa mai nu ai. Dai rai nna, Shawlu gaw shi a shayi sha Mihkala hpe Dawi hte hkungran na matu ap ya wu ai.
28 Shawlu chyawm gaw dai Madu Dawi hte rau rai nga ai mung, shi a shayi sha Mihkala shi hpe tsaw ra nga ai mung, asan sha dum chye da wu ai.
29 Dai rai nna, shi gaw Dawi hpe grau hkrit wa ai hte shi hkrung nga dingsa shi a hpyen tai nga nu ai.
30 Hpilisti hpyen luksuk ni sa gasat ma ti mung, majan gasat shagu kaga Shawlu a du salang ni hta Dawi gaw grau nna awng padang lu la nga wu ai. Shing re ai lam a majaw, Dawi gaw grai kajai gumhkawng ai wa tai wa sai.